TAUNET 48 - BUKUIT NE TILIL

Koberuri Jakobo Manase ak Epraim werikab Josep

¹ Ak kingobata tuguchuto, kolenji chito age Josep, Keero, miani kwandang’ung’: ak kiwa komut werikyik tuwai, Manase ak Epraim.

² Ak kilenji chito age Jakobo, Ineni wering’ung’ Josep, nyonei ole imi: ak kiigiilgei Israel kong’eet kotebe itogut.

³ Ak kilenji Jakobo Josep, Kimong’ja Kamuktaindet ne bo Kamuktaet eng’ Lus eng’ emetab Kanan, ak kiiberura,

⁴ ak kilenja, Keero, agonin iyotet, ak abarain, ak ayain iegu bororiosiek che chang’; ak tun agochini emoni iyotet ne biitu let eng’ inye, koek nenywa koigeny.

⁵ Chechuk anyun nguno werichuguk aeng’u, chu kigisigun eng’ emetab Misri, ye kitom aitu ole imi eng’ Misri; Epraim ak Manase, ko u Reuben ak Simeon.

⁶ Ak egu cheguk che tun isiche let eng’ chu; kiguurtoe kainaikab werik che tupcho eng’ bortenywa.

⁷ Ak kirebena meet Rael eng’ oret, eng’ oret eng’ Kanan abunu Padan, ye kita ko loo kitigin eng’ Eprat: ak kiatupchi oloto, oretab Eprat (noto ko Bet-lehem).

⁸ Ak kigeer Israel werikab Josep, ak koteebe kolenji, Ng’o chu?

⁹ Ak kilenji Josep kwandanyi, Werikyuk chu che kigona Kamuktaindet eng’ olito. Ak kile, Kaigai imutwa kobwa yu, si aberur.

¹⁰ Ak ki negit kogorio konyekab Israel amu osindo; kima kota komuchi kogeer kiy komie. Ak kiimut lagochoto korikyi inendet, ak king’utut, ak koue eunekyik.

¹¹ Ak kilenji Israel Josep, Kama kota abwati ale ta ageere togeng’ung’: ago, kagoborua Kamuktaindet lagoguk agichek.

¹² Ak kiisto Josep lagochoto eng’ kutung’oikab Jakobo; ak kiing’uruk inendet agoi ng’ony.

¹³ Ak kinam Josep ichek tuwai, kiname Epraim eunnyi ne bo tai kotokyi eutab katam ne bo Israel, ak koname Manase eunnyi ne bo katam kotokyi eutab Israel ne bo tai, ak komut korikyi kwandanyi.

¹⁴ Ak kiito Israel eunnyi ne bo tai kogonoor metitab Epraim, werit ne ming’in, ak kogonoor eunnyi ne bo katam metitab Manase, kiigonoor eunekyik ko u noto, kongen; amu ki werit ne bo tai Manase.

¹⁵ Ak kiiberur Josep, ak kole, Kamuktaindet ne kibendate tainnyi kwanisiekyuk Abraham ak Isak, Kamuktaindet ne kibaata atkinye tugul agoi kora,

¹⁶ malaikaiyat ne kiitiacha eng’ yaitwogik tugul, ingoberur lagochu; ak keguurtoe ichek kainennyu, ak kainaikab kwanisiekyuk agichek, Abraham ak Isak; ak ingotesogis kochang’a eng’ kwenutab ng’ony.

¹⁷ Ak kingogeer Josep kole kagogonoor kwandanyi eunnyi ne bo tai metitab Epraim, koyait eng’ tainnyi: konam anyun eutab kwandanyi kole koisto eng’ metitab Epraim si konde metitab Manase.

¹⁸ Ak kilenji Josep kwandanyi, Ma u noto, baba: amu ni ko werit ne bo tai; igonoor eung’ung’ ne bo tai metinnyi.

¹⁹ Ak kiesio kwandanyi, ak kole, Angen ale u noto, werinnyu, angen: egu agine inendet bororiet, ak tun eetu: ago eetu ng’etab kamet ne ming’in kosiir inendet, ak chang’aitu lagokyik koegu bororiosiek che chang’.

²⁰ Ak kiiberur ichek betunoto, kolen, Iberuri Israel bik amu inye, kole, Ingoyain Kamuktaindet ogergeitu ak Epraim ak Manase, ak kinam Epraim kondoe Manase.

²¹ Ak kilenji Israel Josep, Keero, negit ame: ago mi Kamuktaindet koboten, ak koweekten kogeny iwe emetab kwanisieguk.

²² Ak kaagonin kebeberta agenge ne siirei che bo tupchosieguk ne kialuule Amorik eng’ rotwennyu bo chok ak kwangennyu.