TAUNET 47 - BUKUIT NE TILIL

Komuti Josep kwandanyi ak tupchosiekyik koba taitab Parao

¹ Kiwa anyun Josep komwachi Parao, kolenji, Kagoit baba ak werik che kitupche, ak kechirekwak, ak tukwak, ak tugukwak tugul che tinyei kobunu emetab Kanan; ak keero, mitei nguno emetab Gosen.

² Ak kiimut werik mut eng’ werik che tupcho, ak kobarta eng’ taitab Parao.

³ Ak kiteebe Parao werik che tupcho ak Josep, kolenji, Nee boisieng’wong’? Ak kiwolji Parao, kolenji, Achek otwogiguk, ko ki kiptichin, koboto kwanisiekyok.

⁴ Ak kilenji Parao, Kageuchi emoni ko ki toek; amu mami ole kiyage akwotisiekab otwogiguk; amu ng’wan rubet eng’ emetab Kanan: ara anyun, kagisain kele, chamwech achek otwogiguk kemeny emetab Gosen.

⁵ Ak king’alalji Parao Josep, kolenji, Kait oldang’ung’ kwandang’ung’ ak werik che otupche:

⁶ mi taing’ung’ emonito bo Misri; igochi kwandang’ung’ ak werik che otupche komeny emet ole kararan mising’ kosiir tugul; ingomeny anyun emetab Gosen: ak ngot ingen bik alak eng’ ichek che ng’omen, igochi korib tukyuk.

⁷ Kiimut anyun Josep kwandanyi kwo taitab Parao: ak kiiberur Jakobo Parao.

⁸ Ak kiteebe Parao Jakobo, kolenji, Ata betusiekab kenyisieguk?

⁹ Ak kiwolji Jakobo Parao, kolenji, Kenyisiekyuk che kiatar eng’ rutoitanyu ko bogol ak sosom: ng’ering’ ak ko yaachen kenyisiekyuk che kiatar, ak ma it kenyisiekyuk che kiit kenyisiekab kwanisiekyuk eng’ rutoitonywa.

¹⁰ Ak kiiberur Jakobo Parao, yeityo kwo eng’ ole kimi Parao.

¹¹ Ak kimeng’isiechi Josep kwandanyi ak werik che tupcho, ak kogochi ole bunjin eng’ emetab Misri, eng’ ole kararan kosiir tugul eng’ emonoto, eng’ emetab Rameses, ko u ye kiga ng’at Parao.

¹² Ak kibai anyun Josep kwandanyi, ak tupchosiekyik, ak bik tugul che bo gotab kwandanyi, eng’ amitwogik, ko u ye ki te lagokwak.

Kochobei oret ne kitorete Misri ak kondochine

¹³ Ak kima kota komi amitwogik eng’ emet komugul; amu king’wanit mising’ rubet, ak kinyalul emetab Misri ak emetab Kanan amu rubet.

¹⁴ Ak kiiyum Josep fedaisiek tugul che kibiit eng’ emetab Misri ak emetab Kanan che kigoib koale bek: ak kiib Josep fedaisiechato kobwa gotab Parao.

¹⁵ Ak ye kingogesgei fedaisiek che bo emetab Misri, ak che bo emetab Kanan, kobwanji Misrik tugul Josep, ak kolenji, Konech amitwogik: amu nee si kebegu eng’ taing’ung’? Amu kogogesgei fedaisiek.

¹⁶ Ak kilenji Josep, Ogonu tukwok: ak ngogesgei fedaisiek agonok amitwogik che ogeere tukwok.

¹⁷ Kigetyi anyun Josep tukwak: ak kiigochi Josep amitwogik che kiale mbartanyisiek, ak akwotisiek, ak tuga, ak sigirok: ak kibae kenyinoto amitwogik che kiale tukwak tugul.

¹⁸ Ak ye kingogesgei kenyinoto, kobwanji inendet eng’ kenyit ne bo aeng’, kobwa kolenji, Magimuchi keung’e kiptaiyandennyo, kele kogogesgei fedaisiekyok tugul; ak kigobunji tukyok kiptaiyandennyo; ma komi kiy ne ng’etunot ne ta keipchini kiptaiyandennyo, kobate borwekyok kityo, ak emotinwekyok;

¹⁹ amu nee anyun si kebegu eng’ taing’ung’, achek ak emennyo? Alech achek koboto emennyo, si kenyoru amitwogik, ak kebunji achek Parao koboto emennyo keegu otwogikyik: konech keswek, si kesopche, si ma kibegu, si maguber emet.

²⁰ Kialji anyun Josep Parao emet komugul ne bo Misri; amu kialda chi tugul eng’ Misrik mbarennyi, ak kieetyi rubet ichek: kibunji anyun Parao emet.

²¹ Ak kiyai Josep bik koek otwogikyik kong’eete tabanda age agoi tabanda age ne bo Misri.

²² Kobate emetab tisiik ne ma al inendet; amu kicham konyoru tisiik amitwogik chechuak eng’ Parao, si koamei kebebertanywa ne kiigochin Parao: kima alda anyun emenywa amu noto.

²³ Kilenji Josep bik anyun, Ogeero, kaalak rani, okwek ak emeng’wong’, obunji Parao: ogeero, irochu keswek, si ogole mbarenik.

²⁴ Si ye ogesisie ogochi Parao kebeberta ne bo mut, ak kobunjok kebeberwek ang’wanu, si koek keswekab mbarenik, ak koek amitwogikwok, ak che bo bikab gorikwok, ak amitwogik che bo lagokwok.

²⁵ Ak kile, Kaisoru sobonwekyok: mie kenyoru chamet eng’ taitab kiptaiyandennyo, ak keegu otwogikab Parao.

²⁶ Ak kiyai Josep ng’olyondonoto koek ng’atutiet eng’ emetab Misri agoi rani, kele kobunji Parao kebeberta ne bo mut; kobate emetab tisiik inegei ne mabunji Parao.

²⁷ Kimeny anyun Israel emetab Misri, eng’ emetab Gosen; ak kiek magore eng’ oloto, ak kiiyo ak kotesogis mising’.

²⁸ Ak kimeny Jakobo emetab Misri kenyisiek taman ak tisab: ak kenyisiek tugul che kitar Jakobo kosobei ko ki bogol ak artam ak tisab.

²⁹ Ak kirik anyun betusiek che bo kalilotetab Israel: kiguur anyun werinnyi Josep, ak kolenji, Ngo kaanyoru chamet eng’ taing’ung’, inde anyun eung’ung’ kubestanyu, iyaiywa ne mie, ak ne bo iman; kaigai ametupcha Misri:

³⁰ ago ye alil koboto kwanisiekyuk, isuta amanda eng’ Misri, ak itupcha kererisiekwak. Ak kile, Ayae ko u ye kaimwa.

³¹ Ak kile, Iyosiewa: ak kiiyosiechi. Ak kiing’uruk Israel eng’ olebo itogunnyi meto.