TAUNET 46 - BUKUIT NE TILIL

Kochortogei Jakobo Misri koboto bikab gonnyi

¹ Ak kinam banda anyun Israel koboto tugul che kitinyei, ak kiit Beer-seba ak kiigochi tiseiywek Kamuktaindet ne bo kwandanyi Isak.

² Ak king’alalji Kamuktaindet Israel eng’ ng’ang’utik che bo kemoi, kolenji, Jakobo, Jakobo, Ak kile, Ami yu.

³ Ak kile, A Kamuktaindet, Kamuktaindet ne bo kwandang’ung’: ameiywei, ichortege iwe Misri; amu ayain iegu bororiet ne o eng’ oloto:

⁴ ak achortege agane koboten awendi Misri; ak tun amutun iman itogosu kogeny; ak kotwae Josep eunnyi konyeguk.

⁵ King’eet anyun Jakobo eng’ Beer-seba: ak kiimut werikab Israel Jakobo kwandanywa, ak lagokwak, ak osotikwak, eng’ karisiek che kiga koyok Parao si kobiit kimute inendet.

⁶ Kikweri tukwak, ak kiib tugukwak che kiga konyor eng’ emetab Kanan, ak kiit Misri, Jakobo, koboto lagokyik tugul:

⁷ werikyik ak tibikyik koboto mochogoronikyik che werik ak tibik, ak kiimut lagokyik tugul koba Misri.

⁸ Chu kainaikab lagokab Israel, che kiit Misri, Jakobo ak werikyik: Reuben, werit ne bo tai ne bo Jakobo.

⁹ Ak werikab Reuben chu; Hanok, Palu, Hesron, ak Karmi.

¹⁰ Ak werikab Simeon chu; Jemuel, Jamin, Ohad, Jakin, Sohar, ak Shaul weritab Chepkananindet.

¹¹ Ak werikab Lawi chu; Gerson, Kohat, ak Merari.

¹² Ak werikab Juda chu; Er, Onan, Sela, Peres, ak Sera: ago kibek Er ak Onan eng’ emetab Kanan. Ak werikab Peres ko ki Hesron ak Hamul.

¹³ Ak werikab Isakar chu; Tola, Pupa, Job, ak Simron.

¹⁴ Ak werikab Sebulun chu, Seret, Elon, ak Jaleel.

¹⁵ Chuto ko werikab Lea che kisikyi Lea Jakobo eng’ Padan-aram, koboto cheptanyi Dina: ki sosom ak somok werikyik koboto tibikyik.

¹⁶ Ak werikab Gad chu; Sipion, Hagi, Suni, Esbon, Eri, Arodi, ak Areli.

¹⁷ Ak werikab Aser chu; Jimna, Isba, Isbi, Beria, ak Sera chekametinywa: ak werikab Beria chu; Heber, ak Malkiel.

¹⁸ Chuto ko werikab Silpa ne kiigochi Laban Lea cheptanyi, kisikyi Jakobo choto, ki bik taman ak lo.

¹⁹ Chu werikab Rael osotiotab Jakobo; Josep ak Benjamin.

²⁰ Ak kigisikyi Josep eng’ emetab Misri Manase ak Epraim, che kisikyi Asenat cheptab Potipera tisiindet ne bo On.

²¹ Ak werikab Benjamin chu; Bela, Beker, Asbel, Gera, Naaman, Ei, Ros, Hupim, ak Ard.

²² Chuto werikab Rael che kisikyi inendet Jakobo: ki bik taman ak ang’wan.

²³ Ak werikab Dan ko Husim.

²⁴ Ak werikab Naptali chu; Jaseel, Guni, Jeser, ak Silem.

²⁵ Chuto ko werikab Bila, ne kiigochi Laban Rael cheptanyi, kisikyi Jakobo chuto: ki bik tisab tugul.

²⁶ Ak bik tugul che kiit Misri koboto Jakobo, ko ki bik tamanwogik lo ak lo che kimong’une bortab Jakobo, kobate osotikab werikab Jakobo.

²⁷ Ak werikab Josep, che kigisikyi eng’ Misri, ko ki aeng’: bik tugul che bo gotab Jakobo che kiit Misri, ko ki tamanwogik tisab.

²⁸ Ak kiiyokto Jakobo Juda kondoe inendet kwo oldab Josep, koarorji oret ne wendi Gosen; ak kiit anyun emonoto kiguure Gosen.

²⁹ Kichob anyun Josep karinnyi, ak kwo kotorokta kwandanyi Israel agoi Gosen; ak kiiborjigei Josep, ak kotoroigei, ak korir eng’ kaatinnyi konyil ak konyil.

³⁰ Ak kilenji Israel Josep, Kamee anyun, amu kaageer togeng’ung’, ak kaga taisobe kora.

³¹ Ak kilenji Josep tupchosiekyik, ak bikab gotab kwandanyi, Katogoste anyun awe amwachi Parao, alenji, Kagobwanja werik che ketupche, ak bikab gotab baba, che kimi emetab Kanan;

³² ak bichoto ko kayogik, ak icheget ko bikab tuga; ak kaget kechirekwak, tukwak ak tugukwak tugul che tinyei.

³³ Ak eng’ yoto anyun ye kuurok Parao, koteebenak kole, Boisieng’wong’ ko nee?

³⁴ Olenji, Achek otwogiguk ko ki bikab tuga koboch ko ki mengech agoi kora, achek, ak kwanisiekyok agichek; si kobiit omeny emet ne kiguure Gosen; amu chi age tugul ne iyagisiei ko ng’wan eng’ Misri.