TAUNET 45 - BUKUIT NE TILIL

Koborjingei Josep tupchosiekyik

¹ Kima imuch Josep anyun komuita eng’ taitab bik tugul che kitonondos eng’ ole negite inendet; ak kibol kole, Omaande chi tugul kwo eng’ ole ami. Ak ma ng’et chi ne kimi tuwai ak Josep, ye king’ang’jigei inendet tupchosiekyik.

² Ak kirir kowaach: ak kigas Misrik, ak kigas gab Parao agichek.

³ Ak kilenji Josep tupchosiekyik, A Josep; tos ta kosobei baba? Ak kima imuch kowolji tupchosiekyik; amu kiiyweis eng’ tainnyi.

⁴ Ak kilenji Josep tupchosiekyik, Kaigai origu yu ami: Ak kirikta anyun. Ak kilenji, A tupcheng’wong’ Josep, ne kioalde kwo Misri.

⁵ Noto anyun, amata oarogense, anan onerekyige okwege eng’ okwege, amu kioalda anyo oli: amu Kamuktaindet ne kiiyokwa andounenok si kobiit asor bik.

⁶ Amu kigobiit rubet eng’ emet eng’ kenyisiechu aeng’: ak ta komi kenyisiek mutu alage, che mabiitu kabatisiet anan kesisiet.

⁷ Ak kiiyokwa Kamuktaindet andounenok, si kobiit aribwok che ng’etu eng’ ng’ony, ak asoruok osopche eng’ sorunet ne o.

⁸ Ara anyun, ki ma ko okwek che kiomutwa anyo oli, ago Kamuktaindet: ak kigoyaa aek kwanda eng’ Parao, ak aegu kiptaiyatab gonnyi tugul, ak bounindetab emet komugul ne bo Misri.

⁹ Ara anyun, ochakte otogoste ole mi baba, ak olenji, Kamwa ko u ni wering’ung’ Josep, Kiyaa Kamuktaindet aek kiptaiyatab Misri komugul: choruge nyo ole ami, amegage:

¹⁰ ak inyo imeny emetab Gosen, si inegitena, inye ak lagoguk, ak mochogoroniguk, ak kechireguk ak tuga cheguk, ak tuguk tugul che itinye:

¹¹ ak abain eng’ oloto si mebanan, inye ak gong’ung’, ak tugul che itinye; amu ta komi kenyisiek mutu che bwanei che bo rubet.

¹² Ak ogeero, keerei konyekwok, ak kogeerei Benjamin tupchennyu agine, ole, kutinnyu ne ng’alalwok.

¹³ Ak omwachi baba teegistanyu tugul eng’ Misri, ak tuguk tugul che kaogeer; ak ochakte omutu baba konyo oli.

¹⁴ Ak kisuub kaatitab ng’etab kamet Benjamin, ak kirir; ak kirir Benjamin agine komi kaatitab Josep.

¹⁵ Ak king’utut tupchosiekyik tugul, ak korir: ak ye ibata noto kong’alalji tupchosiekyik inendet.

Koguurei Parao Jakobo ak bikab gonnyi kobwa komeng’is eng’ Misri

¹⁶ Kigigas ng’alechato eng’ gotab Parao, kele, kagoit tupchosiekab Josep: ak kiibaibai Parao noto, koboto otwogikyik.

¹⁷ Ak kilenji Parao Josep, Ilenji tupchosieguk, Oyai ni; oratyi sigirokwok tugukwok, ak obe, agoi emetab Kanan;

¹⁸ ak omutu kwandang’wong’ ak bikab gorikwok, ak obwa ole ami: si agonok tuguk che miach che bo emetab Misri, ak oam akwaiyetab emet.

¹⁹ Ara anyun, kaging’atak, oyai ko u ni; oib karisiek che bo emetab Misri amu lagokwok, ak osotikwok, ak obwa, omutu kwandang’wong’.

²⁰ Ago amobwat tugukwok; amu chekwok tuguk tugul che miachen che bo emetab Misri.

²¹ Ak kiyai ko u noto werikab Israel: ak kiigochi Josep ichek karisiek, ko u ng’atutietab Parao, ak kiigochi amitwogik che amoti eng’ oret.

²² Ak kiigochi chi age tugul ngoroik che kiwalawale alak; ago kiigochi Benjamin fedaisiek bogol somok, ak ngoroik mut che walawali.

²³ Ak kiiyokyi kwandanyi tuguk ko u ni; sigirok taman che kilae tuguk che miach che bo Misri, ak sigirok che iyuogik taman che kilae bek ak makatinik ak amitwogik alak che tun amonu eng’ oret.

²⁴ Kimonorisiechi anyun Josep tupchosiekyik, ak kiba: ak kilenji, Amonerekyinotege eng’ oret.

²⁵ Kiba anyun kotogosta eng’ Misri agoi koit emetab Kanan oldab Jakobo kwandanywa.

²⁶ Ak kimwachi kolenji, Ta kosobei Josep, ak inendet ko bounindetab emet komugul ne bo Misri. Ak kitanui muguleldab Jakobo, amu ma iyan icheget.

²⁷ Ak kimwachi ng’alek tugul che bo Josep, che kiga komwachi Josep werjoto: ak ye kingogeer Jakobo karisiek che kiiyok Josep kimutune inendet, kosob tamirmirietab Jakobo kwandanywa:

²⁸ ak kile Israel, Yamei ko u noto; ta kosobei werinnyu Josep; awendi anyun ageere inendet kotom amei.