TAUNET 44 - BUKUIT NE TILIL

Kotiemei Josep tupchosiekyik

¹ King’at anyun chito ne kitononjin gonnyi, kolenji, Inyiit amitwogik lolotinwekab bichu, ko u che imuch koib, ak inde fedaisiekab chi tugul kutitab lolennyi.

² Ak inde kikombennyu, noto bo feda, eng’ kutitab loletab towet, koboto fedaisiekyik che bo bek. Ak kiyai ko u ng’olyot ne kiga mwa Josep.

³ Ye kingoeech kota ko karon, kounda bichoto koba, icheget ak sigirokwak.

⁴ Ak ye kingo kagomanda eng’ nganaset, ye kitom kolooegitu, kolenji Josep chito ne kitononjin gonnyi, Ng’eet, isub bichoto; ak ye inyoru ilenji, Amu nee si ogeere yaitiet ne mie?

⁵ Tos ma kikombani ne eeise kiptaiyandennyu, ak kong’orse? Koyai ne ya ngoyai ko u ni.

⁶ Kinyor anyun, ak kimwachi ng’alechato.

⁷ Ak kilenji ichek, Amu nee si komwa kiptaiyandennyu ng’alek che u choto? Ingolooit eng’ otwogiguk si mayai kiy ne u noto.

⁸ Ogeero, fedaisiek, che kiginyorji kutuswekab lolotinwekyok, kogiweekwok kogeny eng’ emetab Kanan: kimuktoi ano anyun kechore gotab kiptaindeng’ung’ feda anan ko tahabu?

⁹ Ingome age tugul eng’ achek otwogiguk ne kenorjin kioto, ak keegu achek otwogikab kiptaiyandennyo.

¹⁰ Ak kile, Ingotebi ko u ng’aleguk: egu inendet ne kenyorjin kioto otwogindennyu; ak magiityinok okwek yaitio.

¹¹ Ak kiitu chi tugul lolennyi kochokyi, ak kotiach chi tugul nenyi.

¹² Ak kicheng’, kotaune ne o, agoi kogesune ne ming’in; ak kiginorji kikombanato loletab Benjamin.

¹³ Kigerer anyun ngoroikwak, ak kiratyi chi tugul tugukyik sigiriennyi, koweektagei koba nganaset.

¹⁴ Kiit anyun Juda ak tupchosiekyik gotab Josep; amu kitom kwo ui Josep: ak kiibutyi ng’ony ichek eng’ tainnyi.

¹⁵ Ak kilenji Josep ichek, Nee ni koyai? Tos mongen ole imuchi kong’orso chito ne u ane?

¹⁶ Ak kile Juda, Tos kimwaun nee anyun, kiptaiyandennyu? King’alali kelen nee? Anan tos kiityindoitech ano imanda? Kagonai Kamuktaindet tengektab otwogiguk: Ogeero, ki otwogikab kiptaiyandennyo anyun acheget, ak inendet ne kaginyorji kikombet agine.

¹⁷ Ak kile, Ingolooit eng’ ane amayai ko u noto: ago egu otwogindennyu inendet ne kaginyorji kikombet; ago okwek, ko mie obe eng’ kalyet oldab kwandang’wong’.

¹⁸ Kirikyi anyun Juda Josep, ak kolenji, Bwa kiptaiyandennyu, asain ale, chamwa kiptaiyandennyu ane otwogindeng’ung’ amwaun ng’olyo, amenerekya ane, otwogindeng’ung’, eng’ koromnatet: amu i u aginye Parao.

¹⁹ Kiiteebenech achek otwogiguk, kiptaiyandennyu, ile, Otinye kwandang’wong’, ak ko mi werit age ne otupche?

²⁰ Ak kigimwaun inye, kiptaiyandennyo, kelenjin, Kitinye baba, boiyot ne os, ak kotinye lakwet ne bo osindanyi, ne ta koming’in; ak kigome ng’etab kamet, ak mi noto inegei ne bo kamenywa, ak kochamei kwandanyi inendet.

²¹ Ak kiilenjech, achek otwogiguk, Omutwa, kochorgei ole ami, si kobiit ageer inendet eng’ konyekyuk.

²² Ak kigimwaun inye, kiptaiyandennyo, kele, Maimuchi kobesio weroto ak kwandanyi: amu ngot kometo inendet kwandanyi, ko tos me kwandanyi.

²³ Ak kiilenjech achek otwogiguk, Ngot ko mobwa ochoruge koboto werit ne otupche ne ming’in ko momuchi ogeera togoch kogeny.

²⁴ Ak kingeit anyun oldab otwogindeng’ung’ kwandanyu, kemwachi inendet ng’aleguk, inye kiptaiyandennyu.

²⁵ Ak kilenjech baba, Oba kogeny oalwech amitwogik tutigin.

²⁶ Ak kigilenji, Magimuchi kechortege: ngo mi tupchennyo ne ming’in kobotech kechortege anyun kebe: amu magimuchi kegeer chichoto togoch kobate kemi ak tupchennyo ne ming’in.

²⁷ Ak kilenjech otwogindeng’ung’, kwandanyo, Ongen ole kisikwa osotiondennyu werik aeng’:

²⁸ ak kibetena age, ak kiale, Angen komie ale kigetonaton; ak koboch yoto, ko mata tun ageer:

²⁹ ak ngot omutena nito agine, ak konyor kiy ne ya, ko kogona arirat agoi tun amei.

³⁰ Noto anyun, ye ait oldab otwogindeng’ung’ baba, ama mi weri kobotech; amu kinamgei sobondanyi ak sobondab werito:

³¹ komei anyun baba ye keer kole mami lakwet, ak kigochini achek otwogiguk baba, otwogindeng’ung’, korirat agoi tun kome.

³² Amu kibunja ane otwogindeng’ung’ lakwanito, atononjinechi baba, alenji, Ngot ko mamutun inendet, ko kabunja chalwogoto betusiek tugul, eng’ taitab baba.

³³ Eng’ noto anyun, asain ale, Chamwa atebi aek otwogindeng’ung’, inye kiptaiyandennyu, ageeregei weri; ak ingowo weri kotogosta koboto tupchosiekyik.

³⁴ Amu amuktoi ano anyun awo atogosta oldab baba, ama kimi ak lakwet? Si mageer yaitiet ne tun nyoru baba.