TAUNET 43 - BUKUIT NE TILIL

Bandab aeng’ ne bo tupchosiekab Josep kobendi Misri

¹ King’wanit rubet mising’ eng’ emet.

² Ak kingo kagotar bek che kiibune Misri, kolenji kwandanywa, Oweektagei kogeny, oalwech amitwogik tugigin.

³ Ak kilenji Juda, Kiigimgimech chichoto kolenjech, Momuchi ogeera togoch ngot ko mobwane ak werit ne otupche:

⁴ ngot iyoktech koboto tupchennyo kechortegei anyun kealun amitwogik:

⁵ ago ngot ko mechamji kwo, ko magichortoige: amu kilenjech chichoto, Momuchi ogeera togoch, ngot ko mobwane ak werit ne otupche.

⁶ Ak kile Israel, Amu nee si oyaiywa yaitioni te ni, kot ong’ang’ji chichoto olenji, Kitinye werit age ne kitupche?

⁷ Ak kile, Kiginenech mising’ chichoto atebosiekyok, ak ole kigisikyinech, kolen, Ta kosobei kwandang’wong’? Ak, Otinye werit age ne otupche? Ak kigiborji ko u ye kiteeb: Tos kigimuch kenai kele, mwawech kolenjinech, Omutu werit ne otupche kochorgei?

⁸ Ak kilenji Juda kwandanyi Israel, Iyogu werito kebe tuwai, si keng’eetye kebe; si kobiit kesopche, ama kibegu, achek, ak inye, ak lagokyok agichek.

⁹ Ingobunja atononji inendet; ak image inendet eunnyu: ngot ko mamutun inendet nyo ande taing’ung’, kobunjina chalwogoto betusiek tugul:

¹⁰ amu nda kima kigage, ta kiga keweeige iman ne bo aeng’ nguno.

¹¹ Ak kilenji kwandanywa Israel, Ngo u noto anyun, oyai ko u ni; oib tuguk che miachen mising’ che bo emet eng’ lolotinwekwok, oipchi chichoto kagochinoik ko u mwanik tutigin che kinyaise, koboto kumiat kitigin, ak tuguk che ng’uu ne anyiny, ak tuguk che u igomoik, koboto tuguk che u njuguk ak logoek che kiguure almond.

¹² Ak oib eng’ eunekwok fedaisiek otes che yamegei ak kamunutionoto konyil aeng’; ak che kiga kiweech eng’ kutuswekab lolotinwekwok; oweekte choto agichek; abere kima nai bik che kiindoi:

¹³ ak omut werit ne otupche agine, ong’eetye oba kogeny oldab chichoto:

¹⁴ ingorirenak Kamuktaindet ne bo Kamuktaet, eng’ taitab chichoto, si kobiit kotiakwok werit ne otupche nin linda, ak Benjamin. Ak ngo betena lagokyuk ko kagobetyo.

¹⁵ Kiib anyun bichoto kagochinoichoto, ak kiib fedaisiek che yamegei ak kamanutionoto konyil aeng’, ak king’eetyo koboto Benjamin koba Misri, ak kitononso eng’ taitab Josep.

¹⁶ Ak kingogeer Josep Benjamin komi koboto ichek, kolenji ne tononjin gonnyi, Imutu bicho kobwa go, ak oeng’ji, ak ochob kiy tugul; amu kiamisie tugul ak bichoto bet kwen.

¹⁷ Ak kiyai chichoto ko u ye kiga mwachi Josep; ak kiimut anyun chichoto bichoto kobwa gotab Josep.

¹⁸ Ak kiiyweis bichoto, amu kigimut koba gotab Josep; ak kile, Kagimutwech kebwa go amu fedaisiek che kigiweekte eng’ lolotinwekyok yu kiga kibwa tai; si kobiit konyor ng’olyot ne igikyinenech, ak kogerjech go, yeityo koyaech keegu otwogik, koboto sigirokyok.

¹⁹ Ak kirikta ye mi chito ne tononjin gotab Josep, ak kong’alalji inendet eng’ ole negite kurget,

²⁰ ak kile, Ee kiptaiyandennyu, kigichoruge iman eng’ banda ne bo tai, keal amitwogik:

²¹ ak kingeit anyun gotab toek, kitiach lolotinwekyok, ogeero, kimi fedaisiekab chi tugul kutitab lolennyi; kimi tugul: ak kagiibu choto kogeny.

²² Ak kagiibu fedaisiek alak che kiale amitwogik: magingen chito ne kiinde fedaisiekyok lolotinwekyok.

²³ Ak kilenji, Ingoteb kalyet eng’ okwek; amoiyweisie: kigonok Kamuktaindeng’wong’, Kamuktaindet ne bo kwandang’wong’, konoruet ne mie ne ung’at eng’ lolotinwekwok: kiataach fedaisiekwok. Ak kiimutyi Simeon komong’.

²⁴ Kiimut anyun chichoto bichoto koba gotab Josep, ak konaga beek, ak kiun bichoto kelyekwak; ak kibae sigirokwak amitwogik che ki konorotin.

²⁵ Ak kichopchi ichek Josep kagochinoik eng’ sait ne itune, bet kwen: amu kigas kele tagoi koamisiei eng’ oloto.

²⁶ Ak kingoit Josep ga, koipchi bichoto inendet kagochinoik che kiibu, kobwa go, ak kiing’uruk eng’ tainnyi agoi ng’ony.

²⁷ Ak kiteebe icheget chametab ge, kolenji, Chamegei kwandang’wong’, boiyondonoto ne kigomwawa? Tos ta kosobei?

²⁸ Ak kilenji, Chamegei otwogindeng’ung’ kwandanyo. Ta kosobei. Ak kiing’urukyi.

²⁹ Ak kitobendo Josep, ak kigeer tupchennyi Benjamin, ng’etab kamet, ak kile, Tupcheng’wong’ ne ming’in ni, ni kigomwawa? Ak kilenji, Ingorirenen Kamuktaindet, weri.

³⁰ Ak kichirjiren Josep; amu kieet emosto eng’ muguleldanyi amu ng’etab kamet: ak kicheng’ ole wendi korire; ak kimanda gonnyi ne bo orit, kwo korir.

³¹ Ak kiun togennyi, ak komong’: ak kimuita si marir, ak kile, Oibu amitwogik.

³² Ak kiginde chechik oldanyi inegei, ak kiginde oldanywa chechuak ichegei, ak che bo Misrik oldanywa ichegei, che kicham koamisiei koboto inendet: amu kima kochamei Misrik koamis tugul ak Hebranik; amu ki ng’wan eng’ Misrik koamjin.

³³ Ak kitebe tainnyi werit ne bo tai ko u sigennyi, ak ne ming’in ko u ming’inatennyi: ak kikwong’io bichoto.

³⁴ Ak kiigochi bichoto kererutikab amitwogik che kimi tainnyi: ago kieet kererutietab Benjamin kosiir che bo alak konyil mut. Ak kieeiso, ak koboiboitu koboto inendet.