TAUNET 42 - BUKUIT NE TILIL

Kobendi Misri werik tamanu che bo Jakobo koalei bek

¹ Kigas anyun Jakobo kole mitei bek Misri, ak kolenji Jakobo werikyik, Amu nee si ogeeregei kityo?

² Ak kilenji, Ogeero, koagas kele mitei bek Misri: ochortege olindo oalwech bek eng’ olindo: si kobiit kesopche, si ma kibegu.

³ Kichortagei anyun werik tamanu che tupche ak Josep koba Misri, koal bek.

⁴ Ago kima iyokto Jakobo Benjamin ng’etab kametab Josep, koboto tupchosiekyik; amu kile, Si manyor kiy ne ya.

⁵ Ak kibwa anyun werikab Israel koboto che kibwanei koalisiei: amu kimitei rubet emetab Kanan.

⁶ Ak ki bounindet Josep ne bo emet: inendet ne kialdochin bek bik tugul che bo emet: ak kibwa anyun tupchosiekab Josep, ak kong’uruk eng’ tainnyi kotokyi metowekwak ng’ony.

⁷ Ak kigeer Josep tupchoisiekyik ak konyit, ak kiyaigei koigei chi ne maingen icheget, ak kong’alalji icheget eng’ koromnatet; ak kiteebe kolenji, Obunu ano? Ak kiwolji kolenji, Kibunu emetab Kanan, kibwane keale amitwogik.

⁸ Ak kinai Josep tupchosiekyik, ago kima nai ichek inendet.

⁹ Ak kiibwat Josep karuotitaosiek che kiga koruotyi agobo ichek, ak kilenji, O segeik; kobwa ogeer nyerotietab emet.

¹⁰ Ak kilenji, Achicha, kiptaiyandennyu, ago kagibwane otwogiguk keale amitwogik.

¹¹ Ki werikab chito agenge achek tugul; ki bik che bo iman, ma ki segeik achek otwogiguk.

¹² Ak kilenji ichek, Achicha, ago kobwa ogeer nyerotietab emet.

¹³ Ak kilenji, Kitupche achek otwogiguk, ko ki taman ak aeng’, ki werikab chito agenge ne bo Kanan; keero, mitei ne ming’in agot eng’ betuni koboto kwandanyo, ak kigobetito age.

¹⁴ Ak kilenji Josep ichek, Noto anyun ne kamwawok alenjok, O segeik.

¹⁵ Kimuchi ketiemenak ng’olyondoni: ko u ye sobei Parao, ko momuchi obe eng’ oli, ngo manyo yu ng’etab komet ne ming’in.

¹⁶ Oyokte age eng’ okwek, komut ng’etab komet, ak keratak kot kenai ng’alekwok ngo mi imanit eng’ okwek: ak ngo ma u noto, ko ko u ye sobei Parao, ko kaga o segeik.

¹⁷ Ak kiger tugul kib agenge betusiek somok.

¹⁸ Ak eng’ betutab somok kolenji Josep ichek, Oyai ko u ni, si osopche; amu aiywei Kamuktaindet:

¹⁹ ngo o bikab iman, kerati agenge eng’ okwek, eng’ got ne kogigerjok; si obe okwek, oib amitwogik amu rubet ne mi gorikwok.

²⁰ Ak omutwa ng’etab komet ne ming’in; si kotook ng’alekwok ngo bo iman, si mobegu. Ak kiyai ko u noto.

²¹ Ak king’alaljigei ichegei kole, Kagonamech kiruoget iman agobo tupchennyo, amu kigigeer nyalildab muguleldanyi, ye kiigaigaech, ak kima kicham kegasyi; kanyonjech anyun nyalili amu noto.

²² Ak kiwolji Reuben, kolenji, Kima amwawok, alenjok, Amoyachi kiy ne ya lakwet; ak kima ocham ogas? Ogeer anyun-o, kiyaachei korotikyik.

²³ Ak kima nai kole kasei Josep ng’alekwak; amu kimi weegindet ne kiiweechi ng’alekyik.

²⁴ Ak kiweeigei kotuktochi batai, ak korir; ak kiweleljigei icheget kogeny kong’alalji, ak kiinem Simeon eng’ kwenunywa, korat inendet eng’ tainywa.

²⁵ King’at Josep anyun kinyiit lolotinwekwak bek, ak keweekyi chi tugul fedaisiekyik kinde kinnyi, ak kogochi amitwogik che bo oret: ak kigiyachi ko u noto.

²⁶ Ak kiratyi bechato chuaget sigirokwak, ak koba.

²⁷ Ak kingotiach age lolennyi eng’ gotab toek, kole kogochi sigiriennyi amitwogik che konorotin, kogeer fedaisiekyik ko mi kutitab lolet.

²⁸ Ak kilenji werik che tupcho, Kageweech fedaisiekyuk; ogeero, mitei iman lolennyu, ak kiarogenso, kogeeregei kobotandos, kolen, Nee ni kayaiywech Kamuktaindet?

²⁹ Kiit anyun ichek oldab Jakobo kwandanywa eng’ emetab Kanan, ak kitetyi inendet tuguk tugul che kibiityi eng’ oret, kolenji,

³⁰ King’alalwech chito, ne kiptaiyatab emet, eng’ koromnatet, amu kilen ki segeik che kisegei emet.

³¹ Ak kigilenji, Ki bik che bo iman; ma ki segeik.

³² Kitupche achek ko ki taman ak aeng’, ki werikab kwandanyo; mami age, ak mi ne ming’in koboto kwandanyo eng’ emetab Kanan.

³³ Ak kilenjech chichoto, kiptaiyat ne bo emonoto, Anaenok ni, ngo o bik che bo iman; obagakwa ng’etab komet age, ak obe oipchi bek bikwok che mitei ga:

³⁴ ak omutwa werit ne otupche ne ming’in: si anai anyun ale, ma o segeik, ago kaga o bik che bo iman: ak agonok werit ne otupche kogeny, ak oyai mung’aret eng’ emet.

³⁵ Ak kingoabuch lolotinwekwak, ogeero, kimi fedaisiek che bo chi tugul lolennyi ko ratotin: ak ye kingogeer ichek koboto kwandanywa fedaisiekwak che ratotin, koarogenso.

³⁶ Ak kilenji Jakobo kwandanywa, Kiobetena lagokyuk, mami Josep, ak mami Simeon, ak omache omutena Benjamin agine: kabwanja tuguchu tugul.

³⁷ Ak kilenji Reuben kwandanyi, Tun ibar werikyuk aeng’ ngo mamutun inendet kogeny: kona kotebe eunekyuk, ak amutun inendet kogeny.

³⁸ Ak kile, Mochortoige koboto werinnyu; amu kigome ng’etab kamet, ak inegei kityo ne ng’etunot: ak ngot konyor kiy ne ya eng’ oret ne obendi, ogona arirat agoi tun amei.