TAUNET 41 - BUKUIT NE TILIL

Koweechi Josep karuotitaosiekab Parao, kot katiach ak kieet

¹ Ak ye kingogesgei kenyisiek aeng’u, koruotyi Parao, ogeer, kitonone inendet ye negite ainet.

² Ak ogeero, kitogosune tuga tisabu ainet, che kororon ak ko neriotin mising’; ak kiagete morong’iot.

³ Ak ogeero, kitogosune ainet tuga tisabu kosubu chugai, che ma kororon ak ko sogitiotin; ak kitononso eng’ ye mi tuga chun alage eng’ ngegut.

⁴ Ak kiam tuga che yaachen che sogitiotin tuga chun tisab che miachen che neriotin. Kosiir anyun Parao eng’ yoto.

⁵ Kiinuuch kogeny ak kiiruotyi ne bo aeng’: ogeero, kimong’une mopchot agenge ne bo baiywat itik tisabu che ruriotin ak ko kororon.

⁶ Ye kingobata choto komong’ itik tisabu che bo baiywat, che meiyotin, che kiimel usonet ne bunu kong’asis.

⁷ Ak kilugui itichoto bo bechato meiyotin chun tisab ruriotin ak ko neriotin. Ak kisiir Parao ak kigeer kole kaga karuotitoet.

⁸ Ak kingoeech karon, koiimgei eng’ muguleldanyi; ak kiiyokto keguur sirik tugul che ng’omen che bo Misri, che ng’orsei, ak bik tugul che ng’omen che kimitei: ak kitetyi Parao ichek karuotitoennyi; ago kima biit chi ne kiimuch koguiyechi Parao karuotitaosiekyik.

⁹ Ak kimwachi anyun ne o eng’ ribikab tuguk che kieei, Parao, kolenji, Kabwat rani lelutikyuk:

¹⁰ yu kiga nerekyi Parao otwogikyik, kogera, ane ak ne o eng’ che ribei kwang’set, kogerjech gotab kiptaiyatab ribik:

¹¹ ak kigiruotyi karuotitoet achek tuwai eng’ kemout agenge; ak kigiruotyi chi tugul ko u weeksetab karuotitoennyi.

¹² Ak kimi kobotech neranet age, Hebranindet, otwogindetab kiptaiyatab ribik; ak kigimwachi, ak kiiboruech karuotitaosiekyok; kiiweech ko u karuotitoetab chi age tugul.

¹³ Ak kiyaak ko u noto kiiborwech; kiiweekya boisiennyu, ak kigisonginin nin age.

¹⁴ Kiiyokto anyun Parao eng’ yoto keguur Josep, ak kigimoong’ inendet eng’ keringet, kechogune: ak kiinen tamnet, ak kowal ngoroikyik, ak kwo ole mi Parao.

¹⁵ Ak kilenji Parao Josep, Koaruotyi karuotitoet, ma biit chi ne koimuch koweech: ak koagas agobo inye kele, ngigas karuotitoet imuchi iweech.

¹⁶ Ak kiwolji Josep Parao kolenji, Mabota ane: igochin Kamuktaindet Parao wolunet ne bo kalyet.

¹⁷ King’alalji anyun Parao Josep, kolenji, Keero, koatononi eng’ ngegutab ainet eng’ karuotitoennyu:

¹⁸ ak keero, kotogosune ainet tuga tisabu, che neriotin mising’, ak ko kororon; ak koagete morong’iot:

¹⁹ ak keero, kotogos tuga alage tisabu kosubu chugai, che nyalulyotin ak ko yaachen ak ko sogitiotin, che kitom ageere eng’ emetab Misri komugul che yaachen che u choto:

²⁰ ak kiam tuchato sogitiotin ak ko yaachen tuga chun ka bo tai tisab neriotin:

²¹ ak ye kingo kagoam, koma kotook kele kagoam; amu kota ko yaachen ko u eng’ tai. Asiiru anyun.

²² Ak koageer eng’ karuotitoennyu, keero, komong’une itik tisabu mopchot agenge, che ruriotin ak ko miachen:

²³ keero, kimong’ itik tisabu che resiotin ak ko meiyotin, che kiimel usonet ne bunu kong’asis che koisubu choto:

²⁴ ak kolugui itichoto meiyotin itik chun tisab miachen: ak kiamwachi bichoto ng’orsei; ak ma biit ne koimuch koborua.

²⁵ Ak kilenji Josep Parao, Agenge karuotitoetab Parao: kagoborji Kamuktaindet Parao kit ne machei si koyai ko negit.

²⁶ Tuchato tisab che miachen ko kenyisiek tisab; ak itichoto tisab miachen ko kenyisiek tisab: agenge karuotitaonito.

²⁷ Ak tuchato tisab sogitiotin ak ko yaachen che koisubu chun ko kenyisiek tisab, ak kogeny itichoto tisab che ma ruriotin che kiimel usonet ne bunu kong’asis; koegu kenyisiek tisab che bo rubet.

²⁸ Noto ko kit ne kaamwachi Parao: kagoborji Kamuktaindet Parao kit ne machei si koyai ko negit.

²⁹ Keero, bwanei kenyisiek tisabu che bo ruratet ne o eng’ emet komugul ne bo Misri:

³⁰ ak ye ibata choto koit kenyisiek tisabu che bo rubet; ak keutie ruratet eng’ emetab Misri; ak tun iwong’u emet tugul rubet;

³¹ ak ma ko naoksei ruratonoto eng’ emet amu rubonato isubu, amu egu rubet ne ng’wan mising’.

³² Kogiborji anyun Parao karuotitaonito konyil aeng’ amu kigochobok noto eng’ Kamuktaindet, ak chogune Kamuktaindet kiito kosulda.

³³ Ara ingocheng’ Parao chitab ruchinet ak ko ng’om, si konde koboi emetab Misri.

³⁴ Ingoyai Parao nito, ak ingonde ribik korib emet, si kobas kebeberta agenge eng’ mut eng’ emetab Misri eng’ kenyisiechoto tisab bo ruratet.

³⁵ Ak ingoyum amitwogik tugul che bo kenyisiechoto tisab miachen, che magoit, ak kogonor bek eng’ bounatetab Parao koek amitwogikab nganasok, ak ingorib.

³⁶ Ak koek amitwogichoto basanik che kibasyin emet eng’ kenyisiechoto tisab bo rubet, che tun biitu eng’ emetab Misri; si mame emet eng’ rubet.

³⁷ Ak kimieit ng’olyondonoto eng’ Parao ak eng’ otwogikyik tugul.

³⁸ Ak kilenji Parao otwogikyik, Kimuktoi ano kenyoru chito ne u chichi ne tinyei Tamirmirietab Kamuktaindet?

³⁹ Ak kilenji Parao Josep, Amu kagoborun Kamuktaindet choto tugul, mami anyun age ne tinyei ruchinet ak ng’omnatet ko u inye;

⁴⁰ inye ne kebou gonnyu ak ko u ng’olyondeng’ung’ ko kebou bikyuk tugul; kobate eng’ ng’echeretab laitornatet, ko ane ne o eng’ inye eng’ noto.

⁴¹ Kilenji anyun Parao Josep, Keero, kandein ibou emet komugul ne bo Misri.

⁴² Ak kiinemune Parao eunnyin peteinnyi ne bo ng’okset, ak konde eutab Josep, ak kolelesonji inendet eng’ ngoroik che kororon che bo katanit, ak konde sirimdo ne bo tahabu katatinnyi.

⁴³ Ak kiigochi Parao Josep kolany karinnyi ne bo aeng’ ne kitinyei, ak kiboldos bik eng’ tainnyi kolen, Ogutuny; ak kiinde inendet koboi emet komugul ne bo Misri.

⁴⁴ Ak kilenji Parao Josep, A Parao, ak maimuchi chi koiito eunnyi anan keldanyi eng’ emet komugul ne bo Misri ama ichamji.

⁴⁵ Ak kiguure Parao Josep Sapenatpanea; ak kiigochi kotun Asenat cheptab Potipera tisiindet ne bo On. Ak kiwendot Josep kobunot emetab Misri.

⁴⁶ Ak ki bo Josep kenyisiek sosom ye kitononi eng’ taitab Parao, laitoriatab Misri. Ak kiwa Josep eng’ ole mi Parao, ak kibunot emet komugul ne bo Misri.

⁴⁷ Ak kirurio bek mising’ eng’ emet eng’ kenyisiechoto tisab bo biyendo.

⁴⁸ Ak kiiyum amitwogik tugul che bo kenyisiechoto tisab che kimi emetab Misri, ak kigonore amitwogichoto nganasok; kigonor anyun amitwogikab mbarenik che kigayiem nganaset age tugul, kogonore nganasochato.

⁴⁹ Kiiyum Josep bek che chang’ mising’, che te ng’aniekab nyanjet, kot kometo koitet; amu kima kota koiitoksei.

⁵⁰ Ak kigisikyi Josep werik aeng’ kotom koit kenyitab rubet, che kisikyi Asenat, cheptab Potipera, tisiindetab On.

⁵¹ Ak kiguure Josep kainetab ne o Manase: kole, Amu kagona Kamuktaindet autie bichiindo tugul ne bo boisionikyuk, ak got tugul ne bo baba.

⁵² Ak kiguure ne bo aeng’ Epraim: kole, Amu kagona Kamuktaindet iyotet eng’ emet ne kianyorune nyalilda.

⁵³ Ak kiigesgei anyun kenyisiechoto tisabu bo ruratet eng’ emetab Misri.

⁵⁴ Ak kitoi anyun kobwa kenyisiek tisabu che bo rubet ko u ye kiga mwa Josep: ak kibiit anyun rubet eng’ emotinwek tugul; ago kimi amitwogik emet komugul ne bo Misri.

⁵⁵ Ak ye kingoam rubet emetab Misri komugul korirji bik Parao kosom amitwogik; ak kilenji Parao bik tugul che bo Misri, Oba oldab Josep; ak oyai kit age tugul ne kamwawok.

⁵⁶ Ak kiyom rubonato ng’ony komugul: koyat anyun Josep chogenik tugul, ak koaldochi Misrik; ak kieet rubonato mising’ eng’ emetab Misri.

⁵⁷ Kibwa anyun emotinwek tugul oldab Josep eng’ Misri kobwa koal bek; amu kieet rubonato eng’ ng’ony komugul.