TAUNET 40 - BUKUIT NE TILIL

Koweechi Josep eng’ korgoret karuotitaosiekab otwogikab Parao

¹ Ak kingobata tuguchu, kochalwogenji ribindetab tuguk che kieei, ak ribindetab kwang’set, kiptaiyandenywa laitoriatab Misri.

² Ak kinerekyi Parao kiboitinikyik tuwai, ne o eng’ che ribei tuguk che kieei, ak ne o eng’ che ribei kwong’set.

³ Ak kigiger icheget eng’ ole kiga kiratyi Josep.

⁴ Ak kiinde kiptaiyatab ribik Josep korib ichek, ak korib: ak kitebi ko kerotin eng’ betusiek che matia.

⁵ Ak kiiruotyi tuwai karuotitoet, chi tugul ak karuotitoennyi eng’ kemout agenge, age tugul ko u weeksetab karuotitoennyi, ribindetab tuguk che kieei, ak ribindetab kwang’set ne bo laitoriatab Misri, che kiga kiratyi korgoret.

⁶ Ak kinyo Josep karon ole mi ichek, ak kogeer, ogeero, kitinyei arogenet.

⁷ Ak kiteebe Josep kiboitinichoto bo Parao che kimi tugul ko ratotin eng’ gotab kiptaiyandennyi, kolenji, Kalya si oarogense rani?

⁸ Ak kilenji, Kogiruotyi karuotitoet, ak mami chi ne imuchi koboruech ole teptoi. Ak kolenji Josep, Tos ma bo Kamuktaindet weekset? Kaigai anyun omwawa.

⁹ Kimwachi anyun ribindet ne o ne bo tuguk che kieei, Josep, karuotitoennyi, kolenji, Ogeero, komi tainnyu ketitab sabibuk eng’ karuotitoennyu:

¹⁰ ak kitinyei ketoto temenik somok: ki u che ing’atos, ak kiyesio taptokyik; ak kii sabibuk che ruriotin:

¹¹ ak kimi eunnyu kikombetab Parao, ak kiabut logoechoto, ak abirji kikombetab Parao, ak kiande eutab Parao kikombanato.

¹² Ak kilenji Josep inendet, Ye kiweech ko u ni: temenichoto somok ko betusiek somok:

¹³ kotomo kobata betusiek somogu koeetin Parao, ak koweekyin boisieng’ung’: ak iwe inde eutab Parao kikombennyi, ko u ye kicham iyae yu kita ko i ribindennyi ne bo tuguk che kieei.

¹⁴ Ago mie tun ibwata ye tun kagomieit atebeng’ung’, ak irirena anyun, kaigai, ak imwaite eng’ gab Parao, si kimaanda eng’ goi:

¹⁵ amu kigichora iman eng’ emetab Hebranik: ak ma ayai kiy eng’ olito ne kigitoorjinena keringet.

¹⁶ Kingogeer ne o eng’ ribik che bou kwang’set kole, mie weeksonoto, kolenji Josep, Koaruotyi agane komi metinnyu aterusiek somoguk che bo makatinik che leelachen;

¹⁷ ak komitei ne bo barak eng’ tugul amitwogik alak tugul che bo Parao che kwanyei kwong’ik; ak koam taritik amitwogik che bo aterunoto komi metinnyu.

¹⁸ Ak kiwolji Josep kolenji, Ye kiweech ko ni: aterusiechoto somok ko betusiek somok;

¹⁹ kotom kogesgei betusiek somogu kotil Parao meting’ung’, ak kosongininin eng’ ketit; ak koam taritik bortang’ung’.

²⁰ Ak eng’ betutab somok, koit betut ne kigisige Parao, koyachi igorta otwogikyik tugul: ak kiieet ribindet ne o ne bo tuguk che kieei, ak ne o ne bo kwang’set eng’ otwogikyik.

²¹ Kiweekyi anyun ne o ne bo ribik che bo tuguk che kieei, boisiennyi; ak kiigochi anyun ribindonoto Parao kikombet konam:

²² ago kiisonginin ribindet ne o ne bo kwang’set: ko u ye kiga koweekyi Josep ichek ole teptoi karuotitoet.

²³ Ago kima ibwat Josep ne o ne bo tuguk che kieei, ago kiutie.