TAUNET 4 - BUKUIT NE TILIL

Kaen ak Abil

¹ Kiituiyogei chichoto ak kwondanyi Awa; ak kimanach kosich Kaen, ak komwa kole, Kaasich muren eng’ toretab Jehovah.

² Ak kisich kogeny ne tupcho Abil. Ak kiiyagi Abil kechirek ago ki kabatindet Kaen ne kiibati ng’ony.

³ Ak kingobata betusiek alage, koipchi Kaen Jehovah kagochinet ne bo ruratetab mbar.

⁴ Ak kikwerichi Abil agine che kigitwatei che bo akwennyi che akwaen. Ak kicham Jehovah Abil ak kagochinennyi.

⁵ Ago ma cham Kaen ak kagochinennyi. Ak kinerech Kaen mising’, ak kisiriny togennyi.

⁶ Kolenji Jehovah Kaen, Amu nee si inerech inye? Ak kalya si isiriny togeng’ung’?

⁷ Ngot iyai ne mie, ko tos, magitaachin? Ago ngo meyai ne mie, komitei kurget tiseiywotab tengekto: ak tokyiningei magennyi ak ibou inendet.

⁸ King’alalji Kaen ng’etab kamet Abil. Ak ye kimi tuwai timin kong’eetyi Kaen ng’etab kam Abil ak kobar.

⁹ Koteebe Jehovah Kaen anyun kolenji, Mi ano ng’etab kamet Abil? Ak kole, Mangen: tos, a ribindetab tupchennyu?

¹⁰ Koteebe kolenji, Keyai nee inye? Rirjina tugetab korotikab ng’etab komet eng’ ng’ony.

¹¹ I chubot anyun, nguno, eng’ ng’ony, ne kayat kutinnyi kotaach korotikab ng’etab komet eng’ eung’ung’;

¹² si ye ibati ng’ony ko matesun kimnatetab ruratennyi: ak iegu ne mweoti ak koombenoti eng’ ng’ony.

¹³ Kolenji Kaen Jehovah, O birennyu kosiir ne te ne amuchi ala.

¹⁴ Keer anyun-o, keona ra eng’ ng’ony komugul; ak aung’age eng’ togeng’ung’; ak aegu ne mweoti ak koombenoti eng’ ng’ony; ak bara age tugul ne kanyorua.

¹⁵ Kilenji anyun Jehovah, Age tugul ne barei Kaen keyaakyin mugetut konyil tisab. Ak koyai anyun Jehovah kaborunet ago Kaen, si mabar chi age tugul ne kanyor.

¹⁶ Ak kiwa Kaen anyun, eng’ ole mi Jehovah, kwo komeny emetab Not, ne mi komostab kong’asis ne bo Eden.

¹⁷ Ak kiituiyogei Kaen ak osotiondennyi; ak kimanach, kosich Enok; ak kiteech nganaset, ak komwaitae nganasanato kainetab werinnyi Enok.

¹⁸ Kisich Enok Irat: ak kisich Irat Meujael: ak kisich Meujael Metusael: ak kisich Metusael Lamek.

¹⁹ Ak kiitun Lamek kwonyik aeng’: kainetab age ko ki Ada, ak kainetab age ko ki Sila.

²⁰ Ak kisich Ada Jabel: inendet ko kwandab icheget che kimeng’oti emaisiek, ak kotinyei tuga.

²¹ Ak kigiguure kainetab ne tupcho Jubal: inendet kwandab icheget che butei ketubosiek ak ndurerusiek.

²² Ak kisich Sila Tubal-Kaen agine, ne ki kitang’indetab sugunonik ak karik: ak kigiguure chepkametab Tubal-Kaen Naama.

²³ Ak kimwachi Lamek kwonyikyik kolenji, Ogas kutinnyu, Ada ak Sila; Oepchi it ng’alekyuk, kwonyik che bo Lamek; Amu kabar chito ne kagoguotena, Murenet ne kabira.

²⁴ Ngot ko kigiyaakyi mugetut Kaen konyil tisab, Ko agot Lamek ko konyil tamanwogik tisab ak tisab.

²⁵ Ak kiituiyogei Adam ak kwondanyi kogeny: ak kisich werit, ak kiguure kainennyi Set: amu kile, Kagona Kamuktaindet iyotet age kogeere Abil, ne kibar Kaen.

²⁶ Ak kisich Set agine werit; ak kiguure kainennyi Enos: eng’ betusiechoto anyun, kotoi bik koguur kainetab Jehovah.