TAUNET 39 - BUKUIT NE TILIL

Komi Josep gotab Potipar

¹ Kigimut Josep anyun kochortagei kwo Misri; ak kial inendet Potipar kiboitiotab Parao, kiptaiyatab ribik, Misrindet, eng’ eunekab Ismaelik, che kiimuti inendet kwo oloto.

² Ak kimi Jehovah koboto Josep, ak ki chito ne iberurot; ak kimi gotab kiptaiyandennyi Misrindet.

³ Ak kigeer kiptaiyandennyi kole, mi Jehovah koboto inendet, ak kiiberur Jehovah tuguk tugul che kiyaei.

⁴ Ak kichamak Josep eng’ inendet, ak kiboisiechin inendet: ak kiinde Potipar inendet koek ribindetab boisiennyi, ak kiinde tugukyik tugul eunekyik.

⁵ Ak kiiberur Jehovah gotab Misrindet amu Josep koboch ye kingoboi gonnyi ak tuguk tugul che bo Misrindonoto; ak kitebe berurtab Jehovah tuguk tugul che kitinyei eng’ gonnyi ak eng’ mbarenikyik.

⁶ Ak kibagakyi tuguk tugul che kitinyei eunekab Josep; ak kima kota kongen tugukyik, kobate amitwogik che kiamei. Ak ki chito ne kararan kot Josep eng’ bortanyi.

⁷ Ak kingobata tuguchoto, kogeer osotiotab kiptaiyandennyi Josep, ak kolenji, Ngeruiye tuwai.

⁸ Ago kiesio, ak kolenji osotiotab kiptaiyandennyi, Keero, manaei kiptaiyandennyu agot tugukyik che aribe eng’ gonnyi, ak kigonde eunekyuk tugul che tinyei;

⁹ mami age agoi ne o ne siira; ama mi kiy ne etena kobatenen inye, amu i osotiondennyi. Amuktoi ano anyun ayai tengegi te ni, ak achalwogenji Kamuktaindet?

¹⁰ Ak kicham kong’alaljin osotiondonoto Josep betut age tugul, ago kima cham kogasyi koruiyo tuwai, anan kotebi ichegei.

¹¹ Kiwa anyun Josep eng’ betusiechoto koyai boisiennyi eng’ go; ak kima komi mureno age ne bo goyoto koboto inendet eng’ go.

¹² Kinam anyun ngoriennyi, ak kolenji, Ngeruiye tuwai: ak kimetochi Josep ngoriennyi eutab osotiondonoto, ak komwei komanda sang’.

¹³ Ak ye kingogeer osotiondonoto kole, kagometochi ngoriet eunnyi ak komwei,

¹⁴ koguur anyun murenik che bo gonnyi, ak kong’alalji kolenji, Ogeero, kigomutwech inendet Hebranindet kochotech; kanyo ole ami kole keruiye tuwai, ak kaawach:

¹⁵ ak ye kangogas inendet awaach eng’ kutit ne o, kometoiywa ngoriennyi, ak komwei, komanda sang’.

¹⁶ Ak kigonor ngorionoto kwonyoto agoi koit ga kiptaiyatab Josep.

¹⁷ Ak kimwachi ng’alechato, kolenji, Konyonja kochota otwogindet Hebranindet ne kiimutwech:

¹⁸ ak ye kingawaach eng’ kutit ne o, kometoiywa ngoriennyi, ak komwei, kwo sang’.

¹⁹ Ak ye kingogas kiptaiyandennyi ng’alekab osotiondennyi, che kimwachi kolenji, Kiyaiywa ko u ni otwogindeng’ung’, konerech anyun ne ng’wan.

²⁰ Ak kinam Josep kiptaiyandennyi ak kotoorji korgoret, ole kigiratyin kimonjororinikab laitoriat: ak kitebe korgoronato.

²¹ Ago kimi Jehovah koboto Josep, ak kiriregei inendet, ak kiigochi konyor chamet eng’ bounindetab korgoret.

²² Ak kiigochi bounindetab korgoret Josep koboi kimonjororinik tugul che kimi korgoret; ak tuguk tugul che kigiyaei eng’ oloto, ko inendet ne kiyaei.

²³ Kima kota koribei bounindetab korgoret kiy age tugul ne kinamu Josep, amu kimi Jehovah koboto inendet; ak kiiberur Jehovah kiy age tugul ne kiyaei Josep.