TAUNET 38 - BUKUIT NE TILIL

Ng’alek agobo Juda

¹ Kichortagei anyun Juda eng’ betusiechoto, kwo eng’ ole mi tupchosiekyik, agoi ye mi Adulamindet age ne keguure kainennyi Hira.

² Ak kigeer Juda eng’ oloto cheptab Kananindet age ne kiguure kainennyi Sua; ak kiitun, ak kiituiyogei ak inendet.

³ Ak kimanach, ak kisich werit; ak kiguure kainennyi Er.

⁴ Ak kimanach kogeny, kosich werit ak kiguure kainennyi Onan.

⁵ Ak kisich werit kogeny, ak kiguure kainennyi Sela: ak kimi Juda Chesib ye kingesichei noto.

⁶ Ak kiitunji Juda, Er werinnyi ne bo tai, osotiot, ne kigiguure kainennyi Tamar.

⁷ Ak ki chi ne sogoran Er eng’ taitab Jehovah, inendet taita ne bo Juda; ak kibar Jehovah inendet.

⁸ Ak kilenji Juda Onan, Mie otuiyegei ak osotiotab ng’etab komet, iichi, ilal matab ng’etab komet.

⁹ Ak kinai Onan kole, Magimuchi kiityi inendet lagochoto kele kobunji; ak ye kingotuiyogei ak osotiotab ng’etab kamet, kotumji ng’ony, si mailaalji mat ng’etab kamet.

¹⁰ Ak kiyait kioto kiyai eng’ taitab Jehovah: ak kibar inendet agine.

¹¹ Kolenji anyun Juda Tamar osotiotab werinnyi, Tebe gotab kwandang’ung’, ko i mosok, kot koeet Sela werinnyu: amu kile, Si mame agine ko u werichun tupcho. Kiwa Tamar anyun kotebe gotab kwandanyi.

¹² Ak kingosiirto betusiek alage kome cheptab Sua, kwondab Juda; ak kigigaigai Juda, ak kiwa ole mitei bik che tilei kororikab kechirekyik eng’ Timna, inendet koboto choruennyi Hira Adulamindet.

¹³ Ak kigimwachi Tamar, kelenji, Keero, wendi Timna kwandab manong’otiot king’ung’, wendi kotilei kororikab kechirekyik.

¹⁴ Kiireek anyun ngoroikyik che bo mosognatet, ak kiilaach ngoriet ne koi, kotugegei, ak kotaegei ngorionoto, ak kitebe ormarichetab nganaset ne kiguure Enaim, ne mi oret ne wendi Timna: amu kigeer kole kigoeet Sela, ak ma kigochi inendet kotun.

¹⁵ Kingogeer Juda inendet, kolen abere chepkugonio, amu kiga tuch togennyi.

¹⁶ Ak kiwa ole mi eng’ oret taban, ak kolenji, Kaigai icham kituiyegei; amu kima nai kole inendet ko osotiot ki bo werinnyi. Ak kilenji, Igona nee, si kobiit inyonja?

¹⁷ Ak kile, Ayogun aruetab ng’oror ne bunu akwet. Ak kile, Igona nee koek kayosieng’ung’ agoi iyogu kegetwa?

¹⁸ Ak kile, Nee kayosiet ne agonin? Ak kilenji, Ng’okseng’ung’ ak rogoet ak siaring’ung’ no iting’e eung’ung’. Ak kiigochi inendet tukchoto, kotuiyogei anyun ak inendet, ak kimanage inendet.

¹⁹ Ak king’eet kwo, ak koreek ngoriennyi ne koi, ak kolaach ngoroikyik che bo mosognatet.

²⁰ Ak kiiyokto Juda aruetab ng’oror koyoktae eutab choruennyi Adulamindet, si kobiit koweekyi mosoganato tugukab kayosiennyi, ago kimanyor chichoto inendet.

²¹ Kiteebe anyun Adulamindonoto murenikab oloto, kolenji, Mi ano chepkugoniot ne kimi oret taban eng’ Enaim? Kowolji ichek kolenji, Kima komi chepkugonio oli koboch keny.

²² Ak kiweektagei kwo ole mi Juda ak kolenji, Ma anyoru inendet; ak kile murenikab oloto agichek, Kima komi chepkugonio olito koboch keny.

²³ Ak kile Juda, Ingobunji inendet, si ma kitewerech: keero, kaayoktaenen aruani, ago ma inyoru.

²⁴ Ak kingobata betusiek che negit arawek somok, kemwachi Juda kelenji, Kigoek chepkugonio Tamar osotiotab werit king’ung’; kot ko nguno, kotinyei moet ne bo ibetab ge. Ak kile Juda, Omutu kebeel.

²⁵ Ak ye kingo kagimut koyokto kemwachi kwandab manong’otiondennyi kelenji, kole, Kiamanage chitab kobo tuguchu atinye: ak kile, Inyit tuguchu kaigai si inai chitab kobo, ng’okset ak rogoet ak siarit.

²⁶ Kiinyit anyun, ak kole, Bo iman kwonyi kosiira; amu ma agochi inendet Sela werinnyu. Ak kimata kotuiyogei ak inendet kogeny.

²⁷ Ye kingoit betutab sigisiet, ogeero, kimi saramek moennyi.

²⁸ Ak ye kisigisiei, komoong’ lakwet age eut: ak kiratyi korgetab sigisio eunoto borowet ne birir, ak kole, Kagondoi nito.

²⁹ Ak ye kingogetita eunnyi, kesich ng’etab kamet: ak kile korgetab sigisio, Amu nee si imong’u eng’ kimnatet inyegei? Kigiguure anyun kainennyi Peres amu noto.

³⁰ Ak ye kingobata kesich ng’etab kamet ne tinyei borowet ne birir eng’ eut: ak kigiguure kainennyi Sera.