TAUNET 37 - BUKUIT NE TILIL

Kealdoi Josep kwo Misri amu kiwech tupchosiekyik inendet

¹ Kimeny anyun Jakobo emetab Kanan ole kiegunote kwandanyi toondet.

² Chu ortinwekab Jakobo. Kiga koit Josep kenyisiek taman ak tisab, ye kiiyagoti akwetab kerichek koboto tupchosiekyik; ak kimi weroto koboto werikab Bila, ak werikab Silba, osotikab kwandanyi: ak kiibu Josep ng’alekwak che yaachen komwachin kwandanywa.

³ Ak kichamei Israel Josep kosiir werikyik tugul, amu kisichei koga koosit: ak kinapchi ngoriet ne koi ne bochin agot eunek.

⁴ Ak kigeer werik che tupcho kole, chamei kwandanywa inendet kosiir tupchosiekyik tugul; ak kiwech inendet, kot komata kocham kong’alalji inendet eng’ kalyet.

⁵ Ak kiiruotyi Josep karuotitoet, ak kimwachi werik che tupcho: ak kites kowech inendet kosiir.

⁶ Ak kilenji ichek, Kaigai ogas karuotitaoni koaruotyi:

⁷ ogeero, kogirate bek che mi ak mobek eng’ mbar, ak kong’eetyo bekyuk che koarat, kotononso: ogeero, koyiem bekwok che koorat, bek chechuk ak kong’urukyi.

⁸ Ak kilenji werik che tupcho, Ilen tos tun ilaitoranenech? Anan tos tun iboiywech? Ak kites kowech inendet kosiir amu karuotitaosiekyik, ak ng’alekyik.

⁹ Ak kiiruotyi karuotitoet age kogeny, ak kimwachi tupchosiekyik kolenji, Ogeero, koaruotyi kogeny karuotitoet; ogeero, koing’urukya asista ak arawet ak kecheik taman ak agenge.

¹⁰ Ak kimwachi kwandanyi ak werik che tupcho: ak kiger kong’ kwandanyi inendet, ak koteebe kolenji, Nee karuotitaoni koiruotyi? Tos king’urukyin agoi ng’ony iman agot ane ak komet ak tupchosieguk?

¹¹ Ak kiam ng’et kong’ tupchosiekyik agobo inendet; ago kigonor kwandanyi ng’olyondonoto eng’ muguleldanyi.

¹² Ak kiba tupchosiekyik koyaga akwetab kechirek che bo kwandanywa eng’ Sekem.

¹³ Ak kilenji Israel Josep, Tos maiyagi werik che otupche akwet eng’ Sekem? Nyo anyun ayokten iwe ole mi icheget. Ak kilenji inendet, Ami yu.

¹⁴ Ak kilenji, Ui anyun nguno, igeer ngo chamegei tupchosieguk koboto akwet; si inyo imwawa. Kiiyokto anyun kwo eng’ atebwetab Hebron, kiit anyun Sekem.

¹⁵ Ak kinyor inendet chito age, ogeero, kicheng’soti eng’ kewet; ak kiteebe inendet kolenji, Icheng’e nee?

¹⁶ Ak kile, Acheng’oti werik che kitupche: kaigai imwawa ole iyagisie.

¹⁷ Ak kilenji chichoto, Kogoba eng’ oli: amu kiagas komwaei kolen, Ongebe Dotan. Ak kisub Josep tupchosiekyik, ak kinyorji Dotan.

¹⁸ Ak kigeer icheget inendet kota komi ole loo, ak kingotom korik ole mi, kotil ng’alek ole bartoi inendet.

¹⁹ Ak king’alaljigei kole, Ogeero, nyonei chitab karuotitoet.

²⁰ Ongebe anyun kebar, si kewirji keringet, ak kemwa kele, Kaam tiondo ne ya: si kegeer kit ne egu karuotitaosiekyik.

²¹ Ak kigas Reuben, ak kisor inendet eng’ eunekwak, kolenji, Amongebar.

²² Kilenji Reuben, Amotumde korotik: owirji keringoni mi ong’atet, amoyachi kiy ne ya: si kosor inendet eng’ eunekwak, si koweekyi inendet kwandanyi.

²³ Ak kingoit Josep ole mi tupchosiekyik, koreegune Josep ngoriennyi, ngorionoto koi ne kiilaachi;

²⁴ kiimut anyun inendet, ak kowirji keringet: kimi buch keringonoto, kima komi beek.

²⁵ Ak kiteb ng’ony koamis: kitobendo anyun, kogeer bikab Ismaelik kobwanei, kobunu Gilead, koboto tambesikwak che kilaei tuguk che ng’uu ne anyiny, ak mwanik che kinyaise, ak tuguk che u igomoik, kochortagei Misri.

²⁶ Ak kilenji Juda werichoto tupcho, Tos mi kelunet nee ngebar tupchennyo ak keuny korotikyik?

²⁷ Ongebe anyun kealdochi Ismaelik, ago amongeyachi kiy ne ya; amu inendet ko tupchennyo, ak ko bo korotikyok. Ak kigas tupchosiekyik ng’alekyik.

²⁸ Yeityo kosiir yoto chemung’arainik che bo Midian; ak kiimoong’ Josep kolong’ eng’ keringet, ak koaldochi Joseph Ismaelik eng’ fedaisiek tiptem. Kiimut anyun Josep kwo Misri.

²⁹ Ak kiweeigei Reuben kwo ole mi keringet; ak ogeero, kima komi Josep keringet; ak kigerer ngoroikyik.

³⁰ Kiweektagei anyun kwo ole mi tupchosiekyik, ak kile, Mamitei lakwet; ara, si awo ano anyun?

³¹ Ak kinam ngorietab Josep ak koeny kwesta, ak koiile ngoriet korotik;

³² ak kiiyokto ngorionoto koi, keipchi kwandanywa; ak kile, Kaginyoru ngorioni; inyit anyun ngo ngorietab wering’ung’ anan ma nenyi.

³³ Ak kiinyit, ak kole, Ngorietab werinnyu iman; kagoam inendet tiondo ne ya; kagetonaton Josep iman.

³⁴ Ak kigerer Jakobo ngoroikyik, ak kogermenegei kuniet, ak kirirji werinnyi betusiek che chang’.

³⁵ Ak king’eetyo werikyik tugul ak tibikyik tugul kole kogaigai inendet; ago kiesio inendet kigaigai; ak kile, Eng’ noto anyun, arirjini werinnyu agoi ait oldab che kigobek. Kirirji anyun kwandanyi inendet.

³⁶ Ak kialda Midianik Josep kwo Misri, koal Potipar, kiboitiotab Parao, kiptaiyatab ribik.