TAUNET 35 - BUKUIT NE TILIL

Koteechei Jakobo kaptisisiet eng’ Bet-el

¹ Kilenji Kamuktaindet Jakobo, Ng’eet, ui togoste Betel, imeny olindo: ak iteekyi Kamuktaindet kaptisisiet eng’ oloto, inendet ne kimong’jin ye kiimwee ng’etab komet Esau.

² Kimwachi Jakobo anyun bikab gonnyi, ak tugul che kimi koboto inendet, kolenji, Olakte kanaamonik che mi kwenung’wong’ che bo bororiosiek alak, ak oanyingei, ak owal ngoroikwok:

³ ong’eetye anyun, kebe ketogoste Betel; si awo ateekyi Kamuktaindet kaptisisiet eng’ olindo, inendet ne kiwolwa eng’ betutab bichiindanyu ne kimi kobota eng’ bandanyu.

⁴ Kiigochi anyun bichoto Jakobo kanamonichoto tugul bo bororiosiek alak che kitinyei, ak munaok che kimi itikwak, ak kiuny Jakobo choto eng’ ketit kel ne kimi Sekem.

⁵ Kiba anyun: ak kitebe nganasok che kimi ole negite icheget, kamuisetab Kamuktaindet, ak ma isub werikab Jakobo.

⁶ Kiit Jakobo Lus anyun (noto ko Betel), ne mi emetab Kanan, inendet ak bik tugul che kimi koboto inendet.

⁷ Ak kiteech kaptisisiet eng’ oloto, ak kiguure oloto El-bet-el: amu yoto ko ye king’ang’jinegei Kamuktaindet, ye kimwee ng’etab kamet.

⁸ Ak kime Debora cheblakwetab Rebeka, ak kigitupchi ole negite Betel, eng’ ketit kel ne kimi oloto: ak kigiguure ketoto Alon-bakut.

⁹ Komong’ji Kamuktaindet Jakobo kogeny, koberur, ye kibunu Padan-aram.

¹⁰ Ak kilenji Kamuktaindet inendet, Kaineng’ung’ ko Jakobo: ma keguurenen Jakobo kogeny, ago ngeguurenen Israel, ak kiguure kainennyi Israel.

¹¹ Ak kilenji Kamuktaindet, A Kamuktaindet ne bo Kamuktaet: ii ak itesage; ak tun mong’unenen inye bororiet ak chang’indab bororiosiek, ak mong’une bortang’ung’ laitorinik;

¹² ak tun agonin emonoto kiagochi Abraham ak Isak, ak agochini lagoguk agichek che tun biitu let.

¹³ Ak kiwa anyun Kamuktaindet eng’ yoto kotogosta eng’ ole king’alale.

¹⁴ Ak kilumda Jakobo toloita eng’ yoto king’alale, toloita ne bo koita: ak kirong’ji kagochinet ne bo tuguk che kieei, yeityo korong’ji mwaita.

¹⁵ Ak kiguure Jakobo kainetab yoto Betel ole king’alale ak Kamuktaindet.

Meetab Rael, ak kalilatetab Isak

¹⁶ Kiba anyun eng’ Betel; ak kingo tom koit Eprat, koam moet Rael, ak kinyor bichiindo eng’ moonato.

¹⁷ Ak ye kimachei kosigis eng’ bichiindo, kolenji korgetab sigisio, Ameiywei amu imache isich ng’etet age nguno.

¹⁸ Ak ye kingo machei kome koguure kainennyi Ben-oni ak kome: ago kiguure inendet kwandanyi Benjamin.

¹⁹ Ak kime Rael, ak kigitupchi oret ne wendi Eprat (yoto ko Bet-lehem).

²⁰ Ak kilumda Jakobo toloita eng’ kererinnyi: ak kereritab Rael toloata agoi kora.

²¹ Kiu anyun Israel, ak kiteech emainnyi ole negite teekset ne koi ne bo Eder komosin.

²² Ak ye kita komenyei Israel emonoto, kwo Reuben koipgei ak Bila, chebaigeiyatab kwandanyi: ak kigas Israel ng’olyondonoto. Ki taman ak aeng’ werikab Jakobo:

²³ Chu ko werikab Lea: ne bo tai ko Reuben, ne o ne bo Jakobo, ak Simeon, Lawi, Juda, Isakar, ak Sebulun.

²⁴ Chu ko werikab Rael: Josep ak Benjamin.

²⁵ Chu ko werikab Bila, kwondo ne ki otwogindetab Rael: Dan ak Naptali.

²⁶ Chu ko werikab Silba, kwondo ne ki otwogindetab Lea: Gad ak Aser: chuto ko ki werikab Jakobo che kisichei eng’ Padan-aram.

²⁷ Ak kiit Jakobo Mamre, oldab Isak kwandanyi, agoi Kiriat-arba (noto ko Hebron), oloto ole kicham komenyei Abraham ak Isak ye ki ta ko toek.

²⁸ Ak kenyisiekab Isak ko ki bogol ak tamanwogik sisit.

²⁹ Ak kiilil Isak, ak kigiyum koboto bikwak, boiyot ne kiga koosit mising’: ak kitub inendet werikyik Esau ak Jakobo.