TAUNET 34 - BUKUIT NE TILIL

Tewernatetab Dina, ak koyaaktoi mugetut tupchosiekyin Simeon ak Lawi

¹ Ak kiwa Dina cheptab Lea, ne kisikyi Jakobo, kwo kogeer tibikab emonoto.

² Ak kigeer Sekem, weritab Hamor ne bo Hibik, kiruogindetab emonoto, ak kinam inendet, koruiyo tuwai, ak kotewer.

³ Ak kicham muguleldanyi Dina cheptab Jakobo, kicham cheboto ak king’alalji inendet kogaigai.

⁴ Ak king’alal Sekem ak kwandanyi Hamor, kolenji, Weiywa koito cheboto si kobiit atun.

⁵ Ak kigas Jakobo kole, kigong’em chichoto cheptanyi Dina: ak kiiyagisiei werikyik eng’ kewanin: ak kisis Jakobo agoi koit.

⁶ Kiwa anyun Hamor kwandab Sekem kong’alaljin ak Jakobo.

⁷ Ak kingogas werikab Jakobo, kobwa ga kobunu kewanin: ak kigas ng’wanindo murenjoto, ak kinerekso kot, amu kiyai abusnatet eng’ Israel, amu kiruiyo ak cheptab Jakobo; kit ne magichamei keyai.

⁸ Ak king’alal Hamor ak icheget, kolenji, Machei Sekem werinnyu cheptang’wong’ mising’: asomok ale, ogochi inendet kotun.

⁹ Mie keegu bik che kigonegei: ogonech tibikwok, ak otun chechok ak okwek.

¹⁰ Ak ongemeng’jine: ak mi emoni taing’wong’; omeng’isie ak oyae mung’aret, ak onyoru magornatet eng’ olito.

¹¹ Ak kilenji Sekem kwandab Dina ak tupchosiekab Dina, Mie anyor chamet eng’ taing’wong’, ak kiy age tugul ne omwawa amuchi agonok.

¹² Agonok kanyiok che te che omache, ak kagochinoik: ago ogona chepto atun.

¹³ Ak kiwolji eng’ ng’alset werikab Jakobo, Sekem koboto kwandanyi Hamor, ak king’alalji, amu kiga ng’em tupchenywa Dina,

¹⁴ ak kilenji, Magimuchi keyai kit ne u nito, kigochi chi ne ma kimuratan tupchennyo; amu egu tewernat noto eng’ achek.

¹⁵ Kimuch kechamnyechi ak okwek eng’ ng’olyondoni kityo, ngocham oige achek, kele keyatita muren age tugul eng’ okwek;

¹⁶ eng’ noto anyun kegonok tibikyok, ak kitun tibikwok agichek, ak kemeny kobotok, ak keegu agenge.

¹⁷ Ago ngot ko mogasech ak ocham keyatitak; kimuti anyun cheptanyo, ak kebe.

¹⁸ Kicham anyun Hamor, ak Sekem weritab Hamor ng’alekwak.

¹⁹ Ak kima igagei murenonoto koyai ko u noto, amu kiga cham mising’ cheptab Jakobo, ak kigigonyiti inendet kosiir bik tugul che bo gotab kwandanyi.

²⁰ Ak kiba Hamor ak werinnyi Sekem ormarichetab nganasenywa, ak king’alal ak bikab nganasenywa, kolenjigei,

²¹ Kichamdosi ak bichuto; eng’ noto anyun, mie komeny emoni, ak koyai mung’aret eng’ olito, amu baraa emoni, yamei ichek; ongitun tibikwak ak kigochi chechok agichek kotun.

²² Ago imuchi bichoto kocham komeny kobotech, ak keegu agenge, ngot kechamnyechi kit agenge, noto ko kiyaitia muren age tugul eng’ achek, ko u ye yatitoi ichek.

²³ Tos mabunjinech akwotisiekwak che bo nego ak tugukwak ak tukwak tugul? Ongecham ng’olyondonito kityo, si komeny kobotech.

²⁴ Ak kicham ng’alekab Hamor ak Sekem werinnyi tugul che kimandae ormarichetab nganasennyi; ak kigiyatita muren age tugul, tugul che kimandae ormarichetab nganasennyi.

²⁵ Ak eng’ betutab somok ye kimiandos, konam age tugul rotwennyi bo chok, eng’ werjoto aeng’ bo Jakobo, Simeon ak Lawi, tupchosiekab Dina, koba nganaset eng’ nyiganatet, kobar murenik tugul.

²⁶ Ak kibar Hamor ak Sekem werinnyi eng’ rotwetab chok, ak komut Dina eng’ gotab Sekem, koba oldanyua.

²⁷ Ak kibwa werikab Jakobo ole mi bik che kagebar, ak kiluul nganaset, amu kiga kong’em chepkametinywa.

²⁸ Kiluul kechirekwak ak tukwak ak sigirokwak ak kiy age tugul ne kimi nganaset, ak tuguk che kimi mbarenik;

²⁹ ak tugukwak tugul, ak lagokwak ak osotikwak, kiluul tugul, kiib agot che kimi gorik.

³⁰ Ak kilenji Jakobo Simeon ak Lawi, Kaoiima, ak kaogona aek ne kiwechei eng’ bik che menyei emoni, eng’ Kanaik ak Perisik: ak koyumjagei, kobara kowong’wa koboto gonnyu, ago achek, kota ko ki ng’ering’.

³¹ Ak kile ichek, Tos kanyolu koyai tupchennyo koek chepkugonio?