TAUNET 33 - BUKUIT NE TILIL

Kotuitos Jakobo ak Esau eng’ kalyet

¹ Kitobendo Jakobo, kogeer konyonei Esau, koboto bik bogol ang’wan. Ak kipchei lagok kopchjechi Lea, ak Rael, ak otwogichoto aeng’ che tibik.

² Ak kichob kondo kwonyichoto otwogik ak lagokwak, yeityo korub Lea ak lagokyik, kolet eng’ tugul Rael ak Josep.

³ Kiindoe inendet ichek, yeityo kong’uruk agoi ng’ony konyil tisab, agoi korikyi ng’etab kamet.

⁴ Ak kilabat Esau kotorokta, ak konam koue eut, kosuub kaatinnyi, kong’utut: ak koririo.

⁵ Ak kingotobendo, kogeer osotik ak lagok; ak kiteebe kolenji, Ng’o chu omi tugul? Ak kile, Lagok che kiigochi Kamuktaindet otwogindeng’ung’, eng’ rirenennyi bo ge.

⁶ Kirik anyun kwonyichoto otwogik ak lagokwak, ak kobwa kong’urukso.

⁷ Ak kirik Lea agine ak lagokyik kobwa kong’urukso: ak kingobata korik Josep ak Rael, nyo kong’urukso agichek.

⁸ Ak kiteebe kolenji, Bo nee akwotisiechu tugul kaatuiye? Kolenji, Si kobiit anyor chamet eng’ taitab kiptaiyandennyu.

⁹ Ak kile Esau, Atinye che yama, tupchennyu; ingobunjin choto itinye.

¹⁰ Ak kilenji Jakobo, Achicha, asain ale, ngo kaanyoru chamet eng’ taing’ung’, ko mie itaach chu kagonin eng’ eunnyu: amu kaageer togeng’ung’, ko u ye kigeerei togetab Kamuktaindet, ak ageere anyun ale ibaibai eng’ ane.

¹¹ Asain ale, taach inye che kagonin che kagigetun; amu kiyaiywa Kamuktaindet ne mie, ak amu atinye che yama. Ak kiigaigai kot kocham kokweri.

¹² Ak kile Esau, Ongenam banda, kebe, si andoenen.

¹³ Ak kilenjin Jakobo Esau, Ingen inye kiptainandennyu, ile mengechen lagok, ak kotinyei nego arek, kotinyei tuga moek: ak ngot kekweri eng’ betut komugul, komuch kobek akwotisiek tugul.

¹⁴ Asain kiptaiyandennyu ale, indoena ane otwogindeng’ung’: si aree ane mutyo, ko u bandab akwet ak ne bo lagok, agoi ait ole mi kiptaiyandennyu eng’ Seir.

¹⁵ Ak kile Esau, Ngabagagun bikyuk alak che mi kobota. Ak kile, Koyai nee? Ingogaswa kiptaiyandennyu ko u noto.

¹⁶ Kiweek anyun Esau betunoto eng’ bandanyi agoi Seir.

Komeng’isiei Jakobo eng’ kanan

¹⁷ Ak kiwa Jakobo agoi Sukot, kwo koteekyigei got, ak kiteech kaptugusiek: kigiguure anyun yoto Sukot.

¹⁸ Kiit Jakobo anyun eng’ kalyet nganasetab Sekem, ne mitei emetab Kanan, ye kibunu Padan-aram; ak kiwa koteech emainnyi ole tokyingei nganaset.

¹⁹ Ak kial koret eng’ bikab Hamor, kwandab Sekem, eng’ fedaisiek bogol agenge, ole kigateech emainnyi.

²⁰ Ak kiteech kaptisisiet eng’ oloto, ak kiguure kaptisisionoto El-eloe-Israel.