TAUNET 32 - BUKUIT NE TILIL

Kochobegei Jakobo kotuiyo ak Esau

¹ Kiwa anyun Jakobo bandanyi, ak kituiyo ak malaikaisiekab Kamuktaindet.

² Ak ye kingogeer Jakobo, kole, Lugetab Kamuktaindet ni: ak kiguure kainetab yoto Maanaim.

³ Ak kiiyokto Jakobo bik kondoe inendet koba ole mi ng’etab kamet Esau agoi emetab Seir, noto ko koretab Edom.

⁴ Ak king’at ichek kolenji, Omwachi kiptaiyandennyu Esau ko u ni; olenji, Kamwa otwogindeng’ung’ Jakobo ko u ni, Kiatoondenji Laban ak kiatebe oloto agoi rani:

⁵ ak atinye eik, ak sigirok ak akwotisiek che bo nego, ak otwogik che murenik, ak otwogik che tibik, ak kaayogu nyo kemwaun inye, kiptaiyandennyu, si kobiit anyor chamet eng’ taing’ung’.

⁶ Ak kiweekyigei Jakobo che kiga kiyokto, nyo kole, Kogeit ole mi ng’etab komet Esau, ak nyonei agine kotorogun, nyonei koboto bik bogol ang’wan.

⁷ Kiiywei Jakobo mising’ anyun, ak kiarogen: ak kipchei bik che kimi tugul, ak nego, ak tuga, ak tambesik, kopcheune aeng’;

⁸ ak kile, Ngo tuiyo Esau ak che bo tai, ak kobar, komuchi kochililso che bo let.

⁹ Ak kile Jakobo, Ee, Kamuktaindet ne bo baba Abraham, ak Kamuktaindet ne bo baba Isak, Ee Jehovah ne kiimwawa ilenja, Iweekyige emeng’ung’, oldab tilionutiguk, ak ayaun ne mie:

¹⁰ Manyoljina anyor rireneng’ung’ ne bo ge tugul, ak imanit tugul, ne kiiborji otwogindeng’ung’; amu kialandae ainoni bo Jordan ak kiroktanyu kityo; ak nguno, ko kapcheunege aeng’.

¹¹ Asain ale, isorua eng’ eutab tupchennyu Esau: amu aiywei inendet, ale nyonei nyo kobara, koboto kamet ak lagok.

¹² Ak kiimwa ile, Ayaun ne mie iman, ak ayae iyoteng’ung’ kochang’ait ko u ng’aniekab nyanjet che maiitoksei amu chang’.

¹³ Ak kiru yoto lagatunato; ak kichob kagochinet eng’ tugukyik che kitinyei si kogochi ng’etab kamet Esau;

¹⁴ iyuogik bogol aeng’ che bo ng’ororek koboto kwesik tiptem, ak iyuogik bogol aeng’ che bo kechirek, koboto mengichik tiptem,

¹⁵ tambesik che abaen sosom koboto moekwak, ak tuga iyuogik artam koboto kirugik taman, ak iyuogik tiptem che bo sigirok ak moek taman che bo sigirok.

¹⁶ Ak kiigochi otwogikyik kokweri akwet age tugul inegei; ak kilenji otwogikyik, Oba olande ondoena, among’ korikyi akwet age akwet age.

¹⁷ Ak king’at ne bo tai, kolenji, Ye tuiyenen Esau tupchennyu, ak koteebenen kole, I bo ng’o? Ak iwendi ano? Ak bo ng’o chu mi taing’ung’?

¹⁸ Ilenji anyun, Bo otwogindeng’ung’ Jakobo; kagochinet ne kiyokyin kiptaiyandennyu Esau: ak nyonei inendet eng’ let.

¹⁹ Ak king’at ne bo aeng’ agine, ak ne bo somok, ak tugul che isubi akwotisiek, kolenji, Ye otuiye ak Esau, omwachi ko u ni, olenji,

²⁰ Keero, nyonei eng’ let otwogindeng’ung’ Jakobo. Amu kile, Amuchi agaigai eng’ kagochinet ne wendi eng’ tainnyu; ye ibata amuchi ageer togennyi; tamangab kocham kotaacha.

²¹ Kiindo anyun kagochinet kolanda: ak kiru inendet lagatunato koboto bik.

Kokwetegei Jakobo ak malaikaiyat

²² Ak king’eet lagatunato, komut osotikyik tuwai, ak otwogikyik tuwai che tibik, ak lagokyik taman ak agenge, agoi koyoiyo tabartab Jabok.

²³ Ak kiimut koba kolandae kererunoto, koboto tugukyik che kitinyei.

²⁴ Ak king’eet Jakobo inegei: ak kibiit chito ne kikwetgei tuwai agoi koeech.

²⁵ Kingogeer kole mata komuch koterter, kotwa ole tuiyechin kowekab ngoroet; ak king’uliel kubestab Jakobo, ye kikwetegei ak inendet.

²⁶ Ak kile, Unda awo, amu machei koeech. Ak kilenji, Maundoin ama iberura.

²⁷ Ak kiteebe, kolenji, Ng’o kaineng’ung’? Ak kilenji, Kiguurena Jakobo.

²⁸ Ak kilenji, Ma keguurenen Jakobo agoi, ago kagiguurenen Israel: amu kaobelgei ak Kamuktaindet ak bik agichek, ak kaiterter.

²⁹ Ak kiteebe Jakobo kolenji, Asain ale, mwawa kaineng’ung’. Ak kilenji, Amu nee si iteebena kainennyu? Ak kiiberur eng’ yoto.

³⁰ Kiguure anyun Jakobo kainetab yoto Peniel: amu kaager togetab Kamuktaindet kimni, ak kota asobe.

³¹ Ak kichor asista ye kilandae Penuel, ak kiing’walati amu kubestanyi.

³² Maamei bikab Israel tigitiotab ngoroet koboch yoto, agoi kora, amu noto: amu kitwa ole tuiyechin kowekab ngoroetab Jakobo eng’ tigitiotab ngoroet.