TAUNET 31 - BUKUIT NE TILIL

Komwee Jakobo Laban eng’ ung’ot

¹ Ak kigas Jakobo ng’alekab werikab Laban, kolen, Kigokweri Jakobo tugul che bo kwandanyo: ak kigonyor magornatoni te ni eng’ tugukab kwandanyo.

² Ak kigeer Jakobo togetab Laban kole, ogeero, ma ko u atkinye tai.

³ Ak kilenji Jehovah Jakobo, Ketitege, ui emetab kwanisieguk ole kigisikyinin; ak ami koboten.

⁴ Ak kiiyokto Jakobo chito kwo kewanin ole mi akwennyi koguur Rael ak Lea,

⁵ nyo kolenji, Ageere ale ma ko u togetab kwandang’wong’ atkinye tai; ago kigotebi Kamuktaindet ne bo baba kobota.

⁶ Ak ongen ole kiaot kwandang’wong’ eng’ kimnatennyu tugul.

⁷ Ak kigoberbera kwandang’wong’ ak kigowal melektanyu konyil taman; ago ma chamji Kamuktaindet koyaiywa ne ya.

⁸ Ye kingomwa kole, Egu melektang’ung’ che ibisionen, ko kiiyo anyun tugul che ibisionen: ak ye kingomwa kole, Egu melektang’ung’ che keronen, ko kiiyo anyun tugul che keronen.

⁹ U noto anyun kigetune Kamuktaindet kwandang’wong’ akwet si kogona.

¹⁰ Ak ye kingomachei korisyo nego, ageer eng’ karuotitoet, kwesik che lanyei nego ko ki keronen, ak che ibisionen ak che mologonen.

¹¹ Ak kiguura malaikaiyatab Kamuktaindet eng’ karuotitoet, kole, Jakobo: ak kiale, Ami yu.

¹² Ak kile, Keerote, si inai ile, keronen ak ko ibisionen ak ko mologonen kwesik tugul, che lanyei nego: amu kaageer choto tugul che yaun Laban.

¹³ Ane Kamuktaindet ne bo Betel, ole kiirong’jine mwaita toloita ole kiiyosieunena: ng’eet anyun, ui eng’ emoni, iweekyige ole kigisikyinin.

¹⁴ Kiwolji anyun Rael ak Lea kolenji, Tos mitei kebeberta anan kiy ne kinyoru eng’ gotab kwandanyo?

¹⁵ Tos magiitech kele ki bo or age? Amu kigoaldech ak kigoamenech tuguk.

¹⁶ Amu nenyo ak lagokyok magornatoni kigetune Kamuktaindet kwandanyo: ara anyun yai kiy age tugul ne kagomwaun Kamuktaindet.

¹⁷ King’eet anyun Jakobo, ak kichob lagokyik ak osotikyik kolany tambesik.

¹⁸ Ak kikweri akwotisiekyik tugul, ak tugukyik tugul che kiga koyum, agot akwotisiek che kiga konyor, che kiga koyum eng’ Padan-aram, si kobiit kouto anyun koba emetab Kanan, oldab kwandanyi Isak.

¹⁹ Ak kichor Rael kanamonikab kwandanyi Laban, amu kigawa Laban kotil kororikab kechirekyik.

²⁰ King’al Jakobo Laban Suriaindet, amu ma mwachi kolenji, amache awo; kiung’ategi.

²¹ Kimweito anyun tuguk tugul che kitinyei; ak king’eet kolandae ainet, kwo kotokyigei tulwetab Gilead.

²² Ak betut ne bo somok kemwachi Laban kelenji, Kogomwei Jakobo.

²³ Kiimut tupchosiekyik, koba koboto inendet kosub betusiek tisab; ak kinyorji tulwetab Gilead.

²⁴ Kinyonji Kamuktaindet Laban Suriaindet kemoi eng’ karuotitoet, kolenji, Ripge, amemwachi Jakobo ng’olyo ne mie anan ne ya.

²⁵ Ak kiit Laban ole mi Jakobo. Ak kiga teech Jakobo emainnyi eng’ tulwet. Ki inyo koteech Laban ak tupchosiekyik agichek tulwetab Gilead.

²⁶ Kolenji Laban Jakobo, Kiiyai nee kot ing’ala ak iung’anugei, ak imutu tibikyuk ko u luulenik che kiginame rotwetab chok?

²⁷ Kilya si imweu iung’anugei, ing’ala, ama imwawa, si kobiit aunden iwe eng’ boiboiyet ak tienwogik, ak sugutit ne ming’in ak ketubet;

²⁸ ak ma igang’wa ang’utut werikyuk ak tibikyuk? Kiiyai eng’ berberindo.

²⁹ Atinye kimnatet ayaiywok ne ya: ago kong’alalwa Kamuktaindet ne bo kwandang’wong’ amut lagat, kolenja, Ripgei, si memwachi Jakobo kiy ne mie anan ne ya.

³⁰ Ago angen ale koitau banda, amu amin emo agobo gotab kwandang’ung’, ago kilya si ichorena kanomonikyuk?

³¹ Kowolji Jakobo Laban kolenji, Amu kiaiyweisie, ale, abere imuchi irebena tibiguk eng’ kimnatet.

³² Meei age tugul ne koi inyorjini kanamoniguk: inyit eng’ taitab tupchosiekyok kiy age tugul neng’ung’ ne atinye, si iib. Amu kima nai Jakobo kole kichor Rael tuguchoto.

³³ Kimanda anyun Laban emait ne bo Jakobo, ak emaitab Lea, ak emaitab otwogik aeng’ che tibik; ago manyor kanamonichoto. Yeityo komong’ eng’ emait ne bo Lea, komanda ne bo Rael.

³⁴ Ki Rael ne kiga ib kanamonichoto, kwo konde tuguk orit che kiitoe tambesik; yeityo kotebe. Ak kiisiach Laban ola tugul kosapsabat eng’ emait ago manyor.

³⁵ Ak kilenji Rael kwandanyi, Amat konerekya kiptaiyandennyu, amu mamuchi ang’eet eng’ taing’ung’; amu kanama atebetab kwonyik. Ak kicheng’ kot, ak kima nyor kanamonik.

³⁶ Ak kinerech Jakobo, kobolyo ak Laban: ak kiwolji Jakobo Laban kolenji, Nee lelutiennyu? Nee chalwoktanyu, kot isubwa ko u ni eng’ neregek?

³⁷ Ak kaisiach isapsabate tugukyuk tugul, nee ne bo tugukab gong’ung’ ne kenyoru? Nde yu, taitab tupchosiekyuk ak tupchosieguk, si kobiit kobesiewech achek tuwai.

³⁸ Kiatebi koboten eng’ kenyisiechu tiptem; ma oos kechireguk ak ng’ororeguk, ama aam mengichikab akweng’ung’.

³⁹ Ak kima aibun ne kibar tiondo kotonaton; kiageerunenen nenyu; kiimagena noto, ngo ne kigichor bet anan ngo ne kichor kemoi.

⁴⁰ Kiatebi ko u noto; kibira kiptoret bet, ak kibara kaititiet kemoi; ak kima kota anuuchi.

⁴¹ Kiatebe gong’ung’ eng’ kenyisiechu tiptem; kiaotin kenyisiek taman ak ang’wan agobo tibiguk aeng’, ak kiaotin kenyisiek lo agobo akwotisieguk: ak kiiwal melektanyu konyil taman.

⁴² Ak nda kima komi kobota Kamuktaindet ne bo baba, Kamuktaindet ne bo Abraham, ak Inendet ne iywei Isak, ko kiteona awo buch. Kogogeer Kamuktaindet nyalildanyu ak boisietab eunekguk, sk kogerin kong’ lagat anyun amu noto.

⁴³ Ak kiwolji Laban Jakobo kolenji, Tipchu ko tibikyuk, ak lagochu ko lagokyuk, ak akwotisiechu ko akwotisiekyuk, ak tukchu tugul igeere ko chechuk: ara alyonjini anyun tipchuchuk rani, ak lagokwak che kigosich?

⁴⁴ Ara anyun, nyo kiyosiechige, inye ak ane; si koek baornatet eng’ kwenunnyo, inye ak ane.

⁴⁵ Ak kinam Jakobo koita kolumda koek toloita.

⁴⁶ Ak kolenji Jakobo tupchosiekyik, Oyum koik; ak kiiyum koik, yeityo koruruch: ak kiamis eng’ ye negite karurugutionoto bo koik.

⁴⁷ Ak kiguure Laban yoto Jegar- saduta: ago kiguure Jakobo Galed.

⁴⁸ Ak kile Laban, Karurugutioni kobaornatet eng’ kwenunnyo, inye ak ane ra. Kigiguure anyun kainetab yoto Galed amu noto:

⁴⁹ ak kigiguure kogeny Mispa, amu kile, Ingoek Jehova ribindet eng’ kwenunnyo, inye ak ane, ye magigeerege.

⁵⁰ Ngot ko tun ius tibikyuk, anan ngot ko tun itun osotik alak isione tibikyuk, ko mami chi kwenunnyo; keero, baoriat Kamuktaindet eng’ kwenunnyo, inye ak ane.

⁵¹ Ak kilenji Laban Jakobo, Keer karurugutioni, keer toloi, ne kaalumde eng’ kwenunnyo, inye ak ane.

⁵² Baoriat karurugutioni, ak baoriat toloi, ale si masiiru karurugutioni nyo ayaun kiy ne ya, ak si mesiiru aginye karurugutioni ak toloi, inyo iyaiywa kiy ne ya.

⁵³ Ingoruokseiywech Kamuktaindet ne bo Abraham, ak Kamuktaindet ne bo Nahor, Kamuktaindet ne bo kwandanywa. Ak kiiyosio Jakobo agobo Inendet ne iywei Isak kwandanyi.

⁵⁴ Ak kiigoito Jakobo tiseiywot eng’ tulwet, yeityo koguur tupchosiekyik kobwa koamis: ak kiamis, ak kiruiyo tulwonoto eng’ lagatunato.

⁵⁵ Ak king’eet Laban karon mising’, kong’utut werikyik ak tibikyik, ak kiiberur: kiwa anyun Laban koweektagei oldanyi.