TAUNET 30 - BUKUIT NE TILIL

Logokab Jakobo

¹ Ak kingogeer Rael kole, mata kosikyi Jakobo lagok, koam ng’etkong’ Rael agobo chepkamet; ak kilenji Jakobo, Kona lagok, ak ngo megona, amee.

² Ak kigoromitu neregekab Jakobo eng’ Rael, kolenji, Tos ko ageeregei Kamuktaindet ne kaetenen iyotet?

³ Kolenji Rael Jakobo, Keero, mi otwogindennyu Bila, otuiyegei ak inendet: si kobiit kosigis eng’ kutung’oikyuk, si anyor lagok eng’ inendet.

⁴ Ak kiigochi otwogindennyi Bila koek osotiondennyi: ak kiituiyogei Jakobo ak inendet.

⁵ Kimanach anyun Bila, ak kisikyi Jakobo werit.

⁶ Ak kile Rael, Kagoyaiywa ne mie Kamuktaindet, ak kagogas kutinnyu ak kagogona werit: ak kiguure kainennyi Dan amu noto.

⁷ Kimanach kogeny Bila otwogetab Rael, ak kisikyi Jakobo werit ne bo aeng’.

⁸ Ak kile Rael, kagibelge ak chebeiyo eng’ kabeletab ge ne o, ak kaaterter: ak kiguure kainennyi Naptali.

⁹ Kingo kagogeer Lea kole, mata kosich lagok inendet, konam Silba otwogindennyi kogochi Jakobo koek osotiondennyi.

¹⁰ Ak kisikyi Silba otwogindetab Lea Jakobo werit.

¹¹ Ak kile Lea, Kagoek sobon ra! Ak kiguure kainennyi Gad.

¹² Ak kisikyi Silba otwogindetab Lea Jakobo werit ne bo aeng’.

¹³ Ak kile Lea, Agasige! Amu tun kuurena tibik ne igasegei: ak kiguure kainennyi Aser.

¹⁴ Ak kiwa Reuben eng’ betusiek che bo kesisietab nganok, ak kinyor tuguk che u labotik eng’ kewet, ak kiipchi kamet Lea. Kilenji Rael Lea eng’ yoto, Kaigai igona tuguchoto u labotik, cho kaibu wering’ung’.

¹⁵ Ak kilenji, Tos igeere ile ma kiy ngirebena manong’otiondennyu, ak imache irebena labotikab werinnyu agichek? Ak kile Rael, Mie koru gong’ung’ rani amu labotikab wering’ung’.

¹⁶ Ak ye kibunu Jakobo kewanin koskoleny kwo Lea kotorokta ak kolenji, Kanyol inyo iru gonnyu: amu kaalin eng’ labotikab werinnyu. Kiru anyun gonnyi kemounoto.

¹⁷ Ak kigas Kamuktaindet Lea, ak kimanach, ak kisikyi Jakobo werit ne bo mut.

¹⁸ Ak kile Lea, Kagogona Kamuktaindet melektanyu, amu kiagochi manong’otiondennyu otwogindennyu: ak kiguure kainennyi Isakar.

¹⁹ Ak kimanach Lea kogeny, ak kisikyi Jakobo werit ne bo lo.

²⁰ Ak kile Lea, Kagogonwa Kamuktaindet kanyiok che miach; koboch nguno ko kagitebi ak manong’otiondennyu, amu kiasikyi werik lo; ak kiguure kainennyi Sebulun.

²¹ Ak kingobata choto kosich chepto, ak kiguure kainennyi Dina.

²² Ak kiibwat Kamuktaindet Rael, ak kigas Kiptaiyat inendet, ak kiitiach moennyi.

²³ Ak kimanach, ak kisich werit: ak kole, Kagoistawa Kamuktaindet chotisiennyu.

²⁴ Ak kiguure kainennyi Josep, ak kile, Ingoteswa Jehovah werit age.

²⁵ Ak kingobata chuto, ye kingo kagosich Rael Josep, kolenji Jakobo Laban, Unda awo, si kobiit awo oldanyu, agoi emennyu.

²⁶ Chamwa osotikyuk ak lagokyuk amu kiaotin agobo icheget, unda awo: amu ingen inye otwognatennyu ne kiaotin.

²⁷ Ak kilenji Laban, Ngo kianyoru mieindo eng’ taing’ung’, kiageer komie ale kigoberura Jehovah agobo inye.

²⁸ Ak kilenji, Mwawa melekto ne imache, si agonin.

²⁹ Ak kiwolji Jakobo kolenji, Ingen inye ole teptoi otet ne kiaotin, ak ateptab tuguk che kiayagi.

³⁰ Amu kiitinye che ng’ering’ ye kitom aitu, ak kigotesogis kochang’ait; ak kigoberurin Jehovah koboch ngab aitu: ak nguno anyun, ko tos anyoru kotia si achopchi tuguk bikab gonnyu?

Ortinwekab Jakobo che kicheng’ jinegei magornatet

³¹ Ak kilenji Laban, Agonin nee? Ak kile Jakobo, Amegona kiy: ngot iyaiywa kii amache, amuchi ayagun akwotisieguk kogeny ak arib.

³² Achute akwotisieguk tugul rani alewenoti, ak ateri artet age tugul ne ibisia ak ne busie, ak aruet age tugul ne tuui, ak ne ibisia, ak ne busie, eng’ ng’ororek: ak koek choto melektanyu.

³³ Ak tun baorianjina imandanyu, ye tun inyo agobo melektanyu ne mi taing’ung’: ak nginyorja ne ma ibisia ak ne ma busie eng’ ng’ororek, ak ne ma tuui eng’ arek, iit ile kigichorei.

³⁴ Ak kile Laban, Keero, ingoteb ko u ye kaimwa.

³⁵ Ak kiiter Laban betunoto kwesik che keronen ak che busienen, ak iyuogik tugul che ibisionen ak che busienen, ak age tugul ne kitinyei che leelach, ak arek tugul che tuuen, kokweri kogochi werikyik;

³⁶ ak kiwa Laban koistoegei Jakobo ne te bandab betusiek somok: ak kiiyaga Jakobo nego che bo Laban che kiituuch.

³⁷ Ak kibut Jakobo korokwek che bo ketik che u siliboik che tuonen, ak che u mobonik ak che u kurinik, ak kiibony kolegenitu si kotook ole leelachen eng’ kirokwechoto.

³⁸ Ak kilumda kirokwechoto kiibony kotoorji togomwek eng’ ole ee beek nego; ak korisyo ko kabwa nyo koee beek.

³⁹ Ak kirisyo nego eng’ taitab kirokwek, ak kiiyo nego che keronen ak che ibisionen ak che busienen.

⁴⁰ Ak kiitaban Jakobo arek, ak kitokyi nego ole mi che keronen ak tugul che tuuen eng’ negab Laban; ak kiinde akwotisiekyik oldanyua ichegei, ma ituiyo ak che bo Laban.

⁴¹ Ak eng’ ui tugul ye ristos nego che neriotin, konde Jakobo kirokwek eng’ taitab konyekab nego eng’ togomwek, si korisyo eng’ oldab kirokwek:

⁴² ak kima indochi nego che sogitiotin: kibunji anyun Laban choto sogitiotin, ak kobunji Jakobo che neriotin.

⁴³ Ak kiek magorio chichoto mising’ ak kitinyei akwotisiek che chang’, ak tibik che otwogik ak murenik che otwogik, ak tambesik, ak sigirok.