TAUNET 3 - BUKUIT NE TILIL

Yomset ak kabutetab chito

¹ Ki ng’alindet ndaret kosiir tiony age tugul ne bo ng’ony ne kiga koyai Jehovah Kamuktaindet. Kilenji anyun kwondo, Tos, iman kimwa Kamuktaindet kole, Amat oam logoek che bo ketit age tugul ne bo mbaret?

² Ak kilenji kwondo ndaret, Kichamwech keam logoek che bo ketikab mbaret:

³ ago kimwa Kamuktaindet kole, Amat oam logoek che bo ketit ne mi kwenutab mbaret, amat otwa, si mobegu.

⁴ Kolenji ndaret kwondo, Iman, mobegu:

⁵ amu ingen Kamuktaindet kole, eng’ betut ne koam che bo ketoto koyatogis konyekwok, ak ogergeitu ak Kamuktaindet, onai ne mie ak ne ya.

⁶ Ak ye kingogeer kwondo kole mie ketoto eng’ amet, ak ko kararan eng’ konyek, ak ko ketit ne kichamei ne ing’omiti chi, kobut anyun logoekyik koam; ak kogochi manong’otiondennyi ne kimi tuwai koam agine.

⁷ Koyatogis anyun konyekwak ichek tuwai, ak konai kole mi ach ngor; konabanab anyun sogekab mogoiywet, konapchigei ngoroik che kigermenegei.

⁸ Ak kigas Jehovah Kamuktaindet kowendoti eng’ mbar ye kiga kogaititit koskoleny; koung’gei koistoegei ole mi Jehovah Kamuktaindet chichoto ak kwondanyi, eng’ ketik orit che mi mbar.

⁹ Koguur anyun Jehovah Kamuktaindet chichoto, kolenji, Imi ano?

¹⁰ Kowolji inendet, kolenji, Kagas kuting’ung’ eng’ mbar, ak kaiywei, amu ami acho ngor, kaung’ge anyun amu noto.

¹¹ Ak komwa kole, Ng’o ne kamwaun kole, Imi ach ngor? Keam che bo ketoto kiang’atin ale amat iam?

¹² Kolenji chito, Kwondo ne kiigona ketebi tuwai, inendet ne kagona che bo ketit, ak kaam.

¹³ Kolenji Jehovah Kamuktaindet kwondo, Nee ni kaiyai? Kole kwondo, Kagoberbera ndaret ak kaam.

¹⁴ Kolenji Jehovah Kamuktaindet ndaret, Amu kaiyai kii, kagichubin keistaenen tuga tugul, ak tiony age tugul ne bo ng’ony; ichuutegei moeng’ung’, ak iame ng’ung’unyek betusieguk tugul ko ta isobe;

¹⁵ ak ande bunyondit kwenung’wong’ inye ndaret ak kwondo; ak kwenutab iyoteng’ung’ ak nenyi; ak kotui inendet meting’ung’, ak iguoten aginye kwariandennyi.

¹⁶ Kolenji kwondo anyun, Atesun mising’ nyalildang’ung’ eng’ manageng’ung’; isiche lagok eng’ ng’wanindo; ak inyali manong’otiondeng’ung’ eng’ mageng’ung’, ak koboun.

¹⁷ Kolenji anyun Adam, Amu kegas ng’alekab kwondang’ung’, ak kaiam che bo ketit ne kiang’atin, ale, Amat iam che bo ketoto: kagichub ng’ony agobo inye; iame che bo ng’ony eng’ nyalilda betusieguk tugul, kote isobe;

¹⁸ iiun ng’ony katok ak katablelinik; ak iame ngwek alak tugul che bo emet;

¹⁹ ak iame amigwogik eng’ kaotik che bo togeng’ung’, kot iweekyige ng’ony; amu kiginemunenen yoto; amu i ng’ung’unyek, ak iweekyige ng’ung’unyek.

²⁰ Ak kiguure Adam kwondanyi Awa; amu inendet kametab tugul che soptos.

²¹ Ak kinapchi Jehovah Kamuktaindet Adam ak kwondanyi sumotik, ak kolaakyi.

²² Ak kimwa Jehovah Kamuktaindet kole, Ogeero; kagogergeit chichi ak age eng’ achek, ne ingen ne mie ak ne ya; ak nguno anyun, ko si mata koyogoito eunnyi, ak kobut agine che bo ketitab sobondo, ak koam ak kosob koigeny:

²³ eng’ noto anyun, kimaanda Jehovah Kamuktaindet inendet eng’ mbaretab Eden, si kobiit kobat ng’ony ole kiginemune.

²⁴ Kion anyun chichoto komanda, ak konde Kerubik kotebe komostab kong’asis ne bo mbaretab Eden, ak rotwetab chok ne ilyeli ne tokyingei komosi ak komosi, koribe oret ne wendi oldab ketitab sobondo.