TAUNET 29 - BUKUIT NE TILIL

Komi Jakobo ak Laban: kotunegei Jakobo ak Lea ak Rael

¹ King’eet anyun Jakobo kwo bandanyi, agoi koit emetab bikab kong’asis.

² Ak kigeer, ogeero, keringetab beek eng’ kewet, ak ogeero, kimi akwotisiek somogu che bo kechirek koruitos eng’ ole negite keringonoto bo beek; amu kiigoigochi akwotisiekwak eng’ keringonoto be beek: ak ki o koita ne kigigere keringet.

³ Ak kigituiyechin yoto akwotisiek tugul che bo kechirek: ak kimilda koita ne kigigere keringet, si konaga beek kechirek, ak yeityo koweech koita kwo ole kami kogere keringet.

⁴ Kiteebe anyun Jakobo kolenji, Obunu ano, tupchosiekyuk? Ak kilenji, Ki bo Haran.

⁵ Ak kiteebe ichek kolenji, Tos ongen Laban weritab Nahor? Ak kile, Kingen inendet.

⁶ Ak kiteebe kolenji, Chamegei? Ak kile ichek, Chamegei: keero, nyonei cheptanyi Rael, kogetu kechirek.

⁷ Ak kile, Ogeero, ta ko bet, ak tom koyam sait ne kirote tuga: onage beek kechirek, yeityo okweri koba koaget.

⁸ Ak kile, Magimuchi agoi kotuiyo akwotisiek tugul, si komilda koita eng’ keringet; yeityo kinage beek kechirek.

⁹ Ak ye kingota kong’alaljindos, koit Rael kogetu kechirekab kwandanyi: amu inendet ne kiiyagi.

¹⁰ Ak ye kingogeer Jakobo Rael cheptab Laban tupchetab kamet, koboto kechirek che bo Laban, tupchetab kamet, korikta Jakobo komilda koita eng’ keringet, ak kogoigoch akwetab kechirekab Laban tupchetab kamet.

¹¹ Ak king’utut Jakobo Rael, yeityo kowaach korir.

¹² Ak kilenji Jakobo Rael, Kitupche ak kwandang’ung’, a weritab Rebeka: kilabat anyun Rael komwachi kwandanyi.

¹³ Ak kingogas Laban ng’alekab Jakobo weritab chepkamet, kolabat kotorokta inendet, ak konam koue eunekyik, kong’utut ak komut kwo gonnyi. Ak kimwachi Laban ng’alechu tugul.

¹⁴ Ak kimwachi Laban kolenji, Angen komie ale, i kowekyuk ak banyekyuk. Ak kitebi ak inendet arawet agenge.

¹⁵ Kimwachi anyun Laban Jakobo kolenji, Tos iota buch amu i tupchennyu? Mwawa, nee melektang’ung’?

¹⁶ Kitinyei Laban tibik aeng’: kigiguure ne o Lea, ak kigiguure ne ming’in Rael.

¹⁷ Ki kubusen konyek Lea, ak kitinyei borto ne kararan ak toget ne kararan Rael.

¹⁸ Ak kicham Jakobo Rael: ak kolenji Laban, Mie aotin kenyisiek tisab, si atun Rael cheptang’ung’ ne ming’in.

¹⁹ Ak kile Laban, Mie agonin kosiir ye kata agochini chi age: tebi kobota.

²⁰ Ak kiot Jakobo inendet kenyisiek tisab agobo Rael; ak kigeer ko u betusiek che ng’ering’ choto, amu chamnyet ne kiting’e inendet.

²¹ Ak kilenji Jakobo Laban, Kona anyun osotiondennyu, amu kagogesgei betusiek, si kobiit kituiyegei.

²² Ak kiiyum Laban bik tugul che bo yoto, ak koyai igorta.

²³ Ak ye kingo kagoimen, komutyi Laban Jakobo cheptanyi Lea; ak kiituiyogei.

²⁴ Ak kiigoito Laban Silba otwogindennyi kogochi Lea koek otwogindet.

²⁵ Ak kingo kagoeech, kogeer kole, Kaga Lea: kolenji Laban, Nee ni koiyaiywa? Kima aotin agobo Rael? Amu nee si igena?

²⁶ Ak kile Laban, Ma biteetab olinyo kitun ne ming’in kotom kitun ne o.

²⁷ Iwong’u betusiek tisab che bo Lea, si kobiit kegonin Rael agine, amu otwognatet ne tun iota kenyisiek alak tisab.

²⁸ Ak kiyai ko u noto Jakobo, kowong’ betusiechoto tisab, ak kiigochi Laban Jakobo cheptanyi Rael koek osotiondennyi.

²⁹ Ak kiigoito Laban otwogindennyi Bila kogochi Rael koek otwogindennyi.

³⁰ Ak kiituiyogei ak Rael agine, ak kichamei Rael kosiir Lea, ak kiot Jakobo Laban kenyisiek alak tisab.

³¹ Ak kigeer Jehovah kole, kiwechei Lea, ak kiigochi anyun inendet iyotet: ago kisonen Rael.

³² Ak kimanach anyun Lea, kosich werit, ak kiguure kainennyi Reuben: amu kile, Kageer Jehovah nyalildanyu; noto anyun imuchi kochama manong’otiondennyu nguno.

³³ Ak kimanach kogeny, ak kosich werit, ak kole, Amu kagas Jehovah weget ne kiwecha, kagona werit nito agine amu noto: ak kiguure kainennyi Simeon.

³⁴ Ak kimanach kogeny, ak kisich werit; ak kile, Ni ne igochin manong’otiondennyu kenamge, amu kaasikyi werik somok: ak kigiguure kainennyi Lawi amu noto.

³⁵ Ak kimanach kogeny, ak kisich werit: ak kile, Alosu Jehovah eng’ sigoni: kiguure kainennyi Juda amu noto; ak kitebi, mata kosich lagok.