TAUNET 27 - BUKUIT NE TILIL

Koberberi Jakobo Isak si konyor kaberuret

¹ Ak kingo kagoosit Isak, ak kiga kogorio konyekyik kot ko ma kogeerei kiy, koguur Esau werinnyi ne o, nyo kolenji, Werinnyu: ak kile, Ami yu.

² Ak kilenji, Keero, kaaositu, amangen betut ne amee.

³ Kaigai, inam anyun kariguk, motieng’ung’ ak kwangeng’ung’, ak iwe kewanin, iibwa banyekab loget;

⁴ ak inyo igerekwa koanyinyitu ko u ye achame, ak iibwa nyo aam; si koberurin muguleldanyu kotom amei.

⁵ Ak kigasei Rebeka ye king’alaljin Isak werinnyi Esau. Kiwa Esau anyun loget kewanin si koipchi.

⁶ Ak king’alalsechi Rebeka werinnyi Jakobo, kolenji, Keero, kaagas kong’alaldos kwandang’ung’ ak ng’etab komet Esau, kolenjin,

⁷ Ibwan banyekab loget, ak inyo igerekwa koanyinyitu, si aam, ak aberurin eng’ taitab Jehovah kotom amei.

⁸ Noto anyun werinnyu, kas kutinnyu, ko u ye ang’atin.

⁹ Ui nguno ole mi akwet, igetwa arek aeng’ che miachen che bo ng’oror; si agerekyi kwandang’ung’ koanyinyitu, ko u che chamei:

¹⁰ si iipchi kwandang’ung, koam, si koberurin kotom kome.

¹¹ Ak kilenji Jakobo kamennyi Rebeka, Keero, sabul Esau tupchennyu; ago tilil bortanyu.

¹² Abere imuchi kosapsaba baba, ak aegu kaberberindet eng’ inendet; si aek ne kisasei, ama anyoru berurto.

¹³ Kilenji kamet, Ingobunja sasisieng’ung’, werinnyu: kas kutinnyu kityo, ak iwe igetwa.

¹⁴ Kiwa anyun kogetyi kamet: ak kigerech kamet koanyinyitu, ko u che chamei kwandanyi.

¹⁵ Ak kinam Rebeka ngoroik che kororon che bo Esau werinnyi ne o, che kitinyei eng’ go, ak kolaakyi Jakobo werinnyi ne ming’in.

¹⁶ Ak kiratyi eunekyik ak kaatinnyi ole tilil, magatok che bo arekab ng’oror.

¹⁷ Ak kiigochi Jakobo werinnyi banyechato anyiny ak makatiat, kondechi eunnyi, choto kiga kochob.

¹⁸ Ak kiwa oldab kwandanyi, ak kole, Baba: ak kole, Ami yu; i ng’o, weri?

¹⁹ Ak kilenji Jakobo kwandanyi, A Esau wering’ung’ ne bo tai; kaayai ko u ye kagemwawa: kaigai, ing’eet, itebi ng’ony, si iam tugukyuk che bo loget, si koberuran muguleldang’ung’.

²⁰ Ak kiteebe Isak werinnyi kolenji, Nee ni kesib iibu-o, werinnyu? Ak kole, Noto ne kaonwa Jehovah Kamuktaindeng’ung’.

²¹ Ak kilenji Isak Jakobo, Kaigai, nyo rigu, si asapsabin, werinnyu, anai ngo i werinnyu Esau anan ngo ma i inendet.

²² Kirikyi anyun Jakobo kwandanyi Isak; ak kosapsab, ak kole, Kutit ko bo Jakobo ago eunek ko bo Esau.

²³ Ak kima inyit inendet, amu ki sabulen eunekyik, ko u eunekab ng’etab kamet Esau: koberur anyun.

²⁴ Ak kiteebe kolenji, I werinnyu Esau iman? Kole, A inendet.

²⁵ Ak kilenji, Ibwa korik anyun, si aam banyek che kaibwa werinnyu, si koberurin muguleldanyu. Kiipchi anyun korik, ak kiam: ak kiipchi divaik, koee.

²⁶ Ak kilenji kwandanyi Isak, Nyo yu negit anyun, werinnyu, si ing’ututa.

²⁷ Ak kiwa korikta, ak kong’utut: ak king’uchi siptab ngoroikyik, ak kiiberur inendet, kile, Keero, kergei siptab werinnyu Ak ng’uunetab emet ne kiiberur Jehovah:

²⁸ Ingogonin Kamuktaindet rewotab kipsengwet, Ak akwaiyetab ng’ony, Ak chang’indab bek ak divaik:

²⁹ Ingootin bororiosiek, Ak ingong’urukyin bororiosiek; Egu kiptaiyat eng’ tupchosieguk, Ak ingong’urukyin werikab komet; Chubot inendet ne chubin, Ak iberurot inendet ne iberurin.

³⁰ Ak kingo kagoges Isak kaberuret ne kiiberuri Jakobo, ak eng’ yoto ko kata kwo Jakobo eng’ ye mi kwandanyi, koit ng’etab kamet Esau kobunu loget.

³¹ Kigerech agine banyek koanyinyitu, ak koipchi kwandanyi: ak kilenji kwandanyi, Ingong’eet anyun baba, si koam banyek che kaipchin werinnyi, si koberura muguleldang’ung’.

³² Koteebe anyun kwandanyi Isak kolenji, I ng’o inye? Ak kile, A wering’ung’, ne o, Esau.

³³ Ak kibotan Isak mising’ kot, ak kole, Ng’o anyun ne kacheng’ tugukab loget ak koibwa, ak kaamisie kotom iitu, ak kaaberur inendet? Ee, ak koberurot inendet.

³⁴ Ak kingogas Esau ng’alekab kwandanyi, kote eng’ kateet ne o eng’ ng’wanindo, ak kolenji kwandanyi, Iberura agane, ee, baba.

³⁵ Ak kile, Kanyo ng’etab komet eng’ ng’alset, nyo koreb berurtang’ung’.

³⁶ Ak kole, Tos kima kitochi kainennyi Jakobo komie? Amu kagotila let konyil aeng’: kirebena etunatetab sigennyu; ak keero, kagorebena nguno berurtanyu. Ak kole, Tos ma itukwa berurto?

³⁷ Kiwolji Isak Esau kolenji, Kayai inendet koek kiptaiyandeng’ung’, ak kaagochi tupchosiekyik tugul koek otwogikyik; ak kaagimit inendet eng’ bek ak kivaik: ara, ta ayaun nee anyun, werinnyu?

³⁸ Ak kilenji Esau kwandanyi, Tos itinye berurto agenge kityo, baba? Iberura agenge, ee, baba. Kiwaach anyun Esau, korir.

³⁹ Ak kiwolji Isak kwandanyi kolenji, Keero, looitu meng’oteng’ung’ eng’ oldab akwaiyetab ng’ony, Ak eng’ rewotab kipsengwetisiek ne bunu barak;

⁴⁰ Ak isobe rotweng’ung’ bo chok, ak iote ng’etab komet; Ak ye itiagage, Ilelekte bounatennyi koistoegei kaating’ung’.

⁴¹ Ak kiwech Esau Jakobo amu berurto ne kiiberur kwandanyi: ak kile Esau eng’ muguleldanyi, kagorik betusiek che kerirjin baba; si abar tupchennyu Jakobo.

⁴² Ak kigimwachi Rebeka ng’alekab Esau werinnyi ne o; ak kiiyokto keguur Jakobo werinnyi ne ming’in, ak kinyo kolenji inendet, Keero, igoigoegei Esau ng’etab komet, kobwatin, kole, tun kobarin.

⁴³ Eng’ noto anyun werinnyu, kas ng’olyondennyu; ng’eet, mwechi oldab Laban werit ne kitupche ne menyei Haran;

⁴⁴ ak iwe otebi ak inendet eng’ oloto, betusiek che ng’ering’ agoi kogesgei neregek che ng’wonen che bo ng’etab komet;

⁴⁵ agoi kogesgei neregekab ng’etab komet eng’ inye, ak koutie kit ne kiiyachi inendet: si ayok chi nyo koguurin eng’ oloto: amu nee si obegunena okwek tuwai eng’ betut agenge?

⁴⁶ Kolenji anyun Rebeka Isak, Ageere kaiimetab ge betusiechu amu tibikab Het: ngot kotun Jakobo chepto eng’ tibikab Het che u tipchu bo emoni, kotilei nee sobondanyu?