TAUNET 26 - BUKUIT NE TILIL

Komi Isak Gera ak koyosiechingei ak Abimelek

¹ Kibiit rubet eng’ emonoto ne ter eng’ rubet ne ki bo tai, ne kimi eng’ betusiekab Abraham. Kiwa Isak oldab Abimelek, laitoriatab Pilistik, agoi Gerar.

² Ak kimong’ji Jehovah inendet, ak kolenji, Amerekte iwe Misri; tebe emet ne ta aborun;

³ egu toondet eng’ emoni, ami koboten, ak aberurin; amu agonin inye, koboto lagoguk, emotinwechuto tugul, ak agimit kayosiet, ne kiayosiechi kwandang’ung’ Abraham;

⁴ Ak abaroi iyoteng’ung’ ko u kecheik che bo kipsengwetisiek, ak agochini iyoteng’ung’ emotinwechu tugul; ak kiberuri bororiosiek tugul che bo ng’ony eng’ iyoteng’ung’;

⁵ amu kigas it kutinnyu Abraham, ak kinam kotigonutikyuk, ak karureiywekyuk, ak etanutikyuk, ak ng’atutikyuk.

⁶ Ak kimeny Isak Gerar.

⁷ Ak kiteebe bikab oloto agobo osotiondennyi; ak kile, Inendet ko chebeiyo: amu kiiywei komwa kole, Osotiondennyu; amu kilen, si mabara bikab emoni agobo Rebeka: amu ki kararan kwonyoto.

⁸ Ak ye kingo kagotebe oloto betusiek che chang’, koititoe Abimelek, laitoriatab Pilistik, tirisiet, kogeer kole, urerendos Isak ak Rebeka osotiondennyi.

⁹ Ak kiguur Abimelek Isak, nyo kolenji, Osotiondeng’ung’ ni iman: kalya si imwa ile, Inendet ko chebeiyo? Ak kilenji Isak inendet, Kiamwae ko u noto ale, si mamei agobo inendet.

¹⁰ Ak kilenji Abimelek, Nee ni koiyaiywech? Kota iibwech ng’ogisto, amu ko nyamnyum koruiyo chi ak osotiondeng’ung’.

¹¹ Ak king’at Abimelek bik tugul kolenji, Kibarei chi age tugul ne twaei chichi anan osotiondennyi.

¹² Ak kigolso Isak eng’ emonoto, ak kinyor eng’ kenyinoto konyil bogol: ak kiiberur Jehovah inendet.

¹³ Ak kigieet mising’, ak kotesak berurtanyi kot kochang’it agoi koeet kot:

¹⁴ ak kitinyei akwotisiek che bo kechirek, ak che bo tuga, ak bik che chang’ che bo gonnyi: agoi koam ng’etkong’ Pilistik amu inendet.

¹⁵ Ak kiger Pilistik beek che bo keringonik tugul, che kiga kobal otwogikab kwandanyi Abraham, ak kotime ng’ung’unyek.

¹⁶ Kolenji anyun Abimelek Isak, Istoeneige; amu kiieetu, igimitu, isiirech.

¹⁷ Ak kiwa Isak eng’ oloto, kwo koteech emaisiekyik eng’ atebwetab Gerar, ak komeny oloto.

¹⁸ Ak kibal Isak kogeny keringonikab beek che kiga kebal eng’ betusiekab kwandanyi Abraham; amu kiga kotim Pilistik ye kingo kagome Abraham: ak kiguure kainaik che kiga kotochi kwandanyi.

¹⁹ Ak kibal otwogikab Isak atebwet, konyor keringetab beek che kutu.

²⁰ Ak kiborio mestowekab Gerar ak che bo Isak, kolen, Chechok beechu: ak kiguure keringonoto bo beek Esek; amu kicham komoitos.

²¹ Ak kibal keringetab beek age, ak koboriechi noto agine: ak kiguure noto Sitna.

²² Ak kiu eng’ oloto, yeityo kwo kobal keringet age; ak kima boriechi noto: ak kiguure noto Rehobot: ak kile, Kagobaroiywech Jehovah emet nguno, si keichi emonito.

²³ Ak kiwa eng’ oloto kotogosta agoi Beer-seba.

²⁴ Ak kimong’ji Jehovah kemounoto ak kolenji, A Kamuktaindet ne bo kwandang’ung’ Abraham: ameiywei, amu ami koboten, ak aberurin, ak abaroi iyoteng’ung’ amu otwogindennyu Abraham.

²⁵ Ak kiteech kaptisisiet eng’ oloto: ak koguur kainetab Jehovah ak kiteech emainnyi eng’ oloto: ak kibal otwogikab Isak keringetab beek eng’ oloto.

²⁶ Kiba oldab Isak Abimelek kobunei Gerar koboto choruennyi Ausat, ak Pikol kiptaiyatab lugennyi.

²⁷ Ak kiteebe Isak kolenji, Kobwanja amu nee, ak owecha, ak kioonwa eng’ oling’wong’?

²⁸ Kilenji ichek, Kigigeer komie kele, mi Jehovah koboten: ak kigile, Ingobiit kayosiet eng’ kwenunnyo, achek ak inye, ak kiyomisge;

²⁹ kele, si meyaiywech kiy ne ya, ko u ye kima kitwain, ak ko u ye kigiyaun ne mie kityo, ak kigiuten eng’ kalyet: ak inye nguno ko iberurot eng’ Jehovah.

³⁰ Kiyachi anyun igorta, ak kiamis ak koeeiso.

³¹ King’eetyo karon mising’ koyosiechigei: yeityo kounda Isak ichek ak kiba eng’ kalyet.

³² Ak eng’ betunoto anyun, kobwa otwogikab Isak, kobwa komwachi agobo keringetab beek ne kiga kobal, kolenji, Kagenyoru beek.

³³ Ak kiguure Siba: noto anyun, kiguure kainetab nganasanato Beer-seba agoi kora.

³⁴ Kingo kagotar Esau kenyisiek artam kotun Judit cheptab Beri Kitindet, ak Basemat cheptab Elon Hitindet.

³⁵ Ak kiarogenso Isak ak Rebeka mising’ agobo tipchoto.