TAUNET 25 - BUKUIT NE TILIL

Meetab Abraham

¹ Ak kiitun Abraham osotiot age ne kiguure Ketura.

² Ak kisikyi Simran, Joksan, Medan, Midian, Isbak, ak Sua.

³ Ak kisich Joksan Sheba, ak Dedan. Ak werikab Dedan ko ki Asurik, Letusik, ak Leumik.

⁴ Ak werikab Midian ko ki: Epa, Eper, Hanok, Abida, ak Eldaa. Chuto tugul ko ki lagokab Ketura.

⁵ Ak kiigochi Abraham Isak tuguk tugul che kitinyei.

⁶ Ago kiigochi Abraham werikab chebaigeinikyik, che kitinyei, kagochinoik; ak kilenji koba eng’ ole mi werinnyi Isak, koba emetab kong’asis, ye kita kosobei inendet.

⁷ Chu ko kenyisiek che kitar Abraham kosobei, kenyisiek bogol ak tamanwogik tisab ak mut.

⁸ Kiilil anyun Abraham koga koosit mising’, boiyot ne kiga konyi betusiekyik; ak kigiyum koboto bikyik.

⁹ Ak kitub inendet werikyik Isak ak Ismael eng’ kebenetab Makpela, ne mi mbaretab Epron, weritab Sohar Hitindet, ne tokyingei Mamre;

¹⁰ mbaret ne kiale Abraham bikab Het: yoto ye kigitupchi Abraham, ak Sara osotiondennyi.

¹¹ Ak kingo kagobata meetab Abraham, koberur Kamuktaindet Isak werinnyi; ak kimeny Isak ole negite keringetab beek ne kiguure Beer-lahari-roi.

¹² Chu ko ortinwekab Ismael, weritab Abraham, ne kisikyi Hagar Chemisriot otwogindetab Sara, Abraham.

¹³ Chu ko kainaikab werikab Ismael, ko u kainaikwak, ko u ortinwekwak: lakwet ne bo tai ne bo Ismael ko Nebaiot; ak Kedar, Adbeel, ak Mibsam,

¹⁴ Misma, Duma ak Masa;

¹⁵ Hadad, Tema, Jetur, Napis, ak Kedema:

¹⁶ chu ko werikab Ismael, ak chu kainaikwak, eng’ nganasokwak, ak eng’ meng’otenywa; bounik taman ak aeng’ ko u bororiosiekwak.

¹⁷ Ak chu ko kenyisiekab Ismael che kitar kosobei, kenyisiek bogol ak sosom ak tisab: si kome; ak kigiyum koboto bikyik.

¹⁸ Ak kimeng’ot koboch Abila agoi Sur ne tokyingei Misri, eng’ oret ne wendi Asuria: kiwa komeny oloto eng’ taitab tupchosiekyik tugul.

Sigetab Esau ak Jakobo, ming’inatenywa

¹⁹ Chu ko ortinwekab Isak, weritab Abraham: kisichei Abraham Isak:

²⁰ ki bo Isak kenyisiek artam si kotuni Rebeka, cheptab Betuel Suriaindet ne bo Padan-aram, chepkametab Laban Suriaindet.

²¹ Ak kirirji Isak Jehovah mising’ agobo osotiondennyi, amu ki sonen: ak kigasyi Jehovah rirekyik, ak kimanach Rebeka osotiondennyi.

²² Ak kiibelgei lagok eng’ moennyi; ak kile, Ngot ko u noto, ko kalya si ateb ko u ni? Ak kiwa koteebe Jehovah.

²³ Ak kilenji Jehovah, Mitei moeng’ung’ bororiosiek aeng’u, Ak tun pcheegei bororiosiek aeng’u che bunu moeng’ung’; Ak kogimitu bororiet age kosiir age; Ak koot ne o ne ming’in.

²⁴ Ak kingoit anyun betunnyi ne bo siget, ogeero, kimi saramek moennyi.

²⁵ Ak kiindoi ne o ak ki birir, ki sabul borto tugul ko u sambut; ak kiguure kainennyi Esau.

²⁶ Ak kongobata noto kesich ng’etab kamet, ak kinamonu kwariatab Esau; ak kigiguure kainennyi Jakobo: ak ki bo Isak kenyisiek tamanwogik lo ye kingosichei osotiondennyi lagochoto.

²⁷ Kieegitu werjoto: ki kiplogotiot ne ng’om Esau, chito ne bo timin; ak Jakobo ko ki chito ne tala ne kimeng’oti emaisiek.

²⁸ Ak kichamei Isak Esau, amu kiamei banyek che kiibune loget: ak kichamei Rebeka Jakobo.

²⁹ Ak kochob Jakobo sogoriek, ak kiit Esau kobunu timin, ko kang’et mising’.

³⁰ Kolenji anyun Esau Jakobo, Kaigai, ibaena tuguchu biriren amu katanui: kigiguure kainennyi anyun Edom amu noto.

³¹ Ak kilenji Jakobo, Aldawa rani etunateng’ung’ ne bo siget.

³² Ak kole Esau, Keero, negit ame: tos tilei nee eng’ ane etunatet ne bo siget?

³³ Ak kilenji Jakobo, Iyosiewa rani; ak kiiyosiechi anyun inendet ak kialdochi Jakobo etunatennyi ne bo siget.

³⁴ Ak kiigochi Jakobo Esau makatiat ak sogoriek; ak kiam ak koee, ak king’eet kwo: mata koiit anyun Esau etunatennyi ne bo siget koek kiy.