TAUNET 24 - BUKUIT NE TILIL

Kotunegei Isak ak Rebeka

¹ Ak kiga koosit Abraham; kinegit kwo kalilot; ak kiga koberur Jehovah Abraham eng’ tuguk tugul.

² Ak kilenji Abraham otwogindennyi, ne o ne bo gonnyi, ne kibou tugukyik tugul, Kaigai inde eung’ung’ kubestanyu:

³ amache iyosie eng’ Jehovah, Kamuktaindet ne bo kipsengwetisiek, Kamuktaindet ne bo ng’ony, ale ametunji werinnyu chepto ne bo Kananik che amenye kwenunywa:

⁴ ago ui agoi emennyu, oldab tilionutikyuk, si imutyi osotiot werinnyu Isak.

⁵ Kolenji otwogindet inendet, Abere esioi cheboto kosubwa agoi emoni: ara, tos nyolu amut wering’ung’ emonoto kiibunu?

⁶ Kolenji Abraham, Ripge, amemut werinnyu kwo oloto.

⁷ Jehovah, Kamuktaindet ne bo kipsengwetisiek, inendet ne kiimoong’wa eng’ gotab baba, ak eng’ emet ne kigisikyina, inendet ne king’alalwa, ak koyosiewa, kole, Agochini lagoguk emoni; iyoktoi inendet malaikaiyandennyi kondoenen, si imutyi werinnyu osotiot eng’ olindo.

⁸ Ak ngot ko macham cheboto kosubun, itiagage anyun eng’ kayosioninyu; ago agot nga no, ko memut werinnyu olindo.

⁹ Konde anyun otwogindet eunnyi kubestab Abraham kiptaiyandennyi, ak koyosiechi inendet agobo noto.

¹⁰ Ak kikwei otwogindonoto tambesik taman, eng’ tambesik che bo kiptaiyandennyi, ak kwo; koibei tuguk tugul che miachen che bo kiptaiyandennyi; ak king’eet kwo agoi Mesopotamia, agoi nganasetab Nahor.

¹¹ Ak kichob tambesik kogutung’so eng’ sang’utab nganaset ole negite keringetab beek koskoleny ye bendi kobogorisiek kosiile beek.

¹² Ak kole, Ee Jehovah Kamuktaindet ne bo kiptaiyandennyu Abraham, asain ale, iberura rani, iyachi ne mie Abraham kiptaiyandennyu.

¹³ Keero, atononi eng’ yu mi kondab beek; ole nyo kosiile beek tibikab bikab nganaset:

¹⁴ ingocham chepto ne asome alenjini, Ituu toreng’ung’, aee beek; ak kowolwa kolenja, Nganagin iee, ak asiilji tambesiguk agichek: Ingoek noto chepto ne kiilewenji otwogindeng’ung’ Isak; si anai eng’ noto ale, kaiyachi ne mie kiptaiyandennyu.

¹⁵ Ak kingotom kogesgei ng’alalennyi, ogeero koit Rebeka (ne kigisikyi Betuel weritab Milka, osotiotab Nahor, ng’etab kametab Abraham), koibu terennyi eng’ tigikyet.

¹⁶ Ki chepto ne kararan kot, bergeiyat, ak kitom kotuiyo ak muren: ak kichortagei agoi koit kondab beek, ak konyiit beek terennyi, ak kotogos kogeny.

¹⁷ Kilabat anyun otwogindonoto kotorokta, ak kolenji, Kaigai inaga beek tutigin aee, chu mi teroning’ung’.

¹⁸ Ak kile, Nganagin iee, kiptaiyandennyu: ak kiitu terennyi kochokyi eng’ eunnyi, ak konaga koee.

¹⁹ Ak ye kingo kagonaga beek koee, kolenji, Kaawe asiilji beek tambesik agichek koee, kot kobiyong’so.

²⁰ Ak kichakta kwo korong’ji beek moinget kogesyi, ak kolabat si kosiil alak eng’ keringet; kisiilji tambesikyik tugul.

²¹ Kigeer chichoto anyun kochiilji kong’, kosis; kole, konai ngo kagoberur Jehovah bandanyi anan ngo ma iberur.

²² Ak kingo kagoee beek tambesik, konam chichoto peteitab tahabu, ne nyigisindanyi koyamei kebebertab sekel, ak karik aeng’ che bo tahabu che bo eunek che yamei sekelisiek taman;

²³ ak kiteebe kole, I cheptab ng’o? Kaigai imwawa. Tos mi ole kimuchi keru eng’ gotab kwandang’ung’?

²⁴ Kolenji, A cheptab Betuel weritab Milka, ne kisikyi Nahor.

²⁵ Kolenji kogeny, Kitinye mobek ak amitwogik che chang’ che kigigonor che bo tambesik, ak mi boroindo ole ruitos toek.

²⁶ Ak kiing’uruk chichoto, kolos Jehovah.

²⁷ Kole, Iberurot Jehovah, Kamuktaindetab kiptaiyandennyu Abraham, ne ma ete kiptaiyandennyu rirenennyi bo ge ak imaninnyi: Jehovah ne kiimutwa eng’ oret agoi aitu gotab tupchosiekab kiptaiyandennyu.

²⁸ Kolabat anyun cheboto, ak komwachi bik che bo gotab kamet ng’alechato tugul.

²⁹ Kitinye Rebeka ng’etab kamet, ne kigiguure Laban; kilabat Laban kwo ole mi chichoto eng’ ole mi kondab beek.

³⁰ Ak ye kingogeer peteit, ak karik che mi eunekab chepkamet, ak ye kingogas ng’alekab Rebeka chepkamet, komwachin ng’alek che kaga mwachi chichoto; kwo anyun ole mi chichoto; ak ogeero, kita kotononi chichoto eng’ ole negite tambesik ole mi kondab beek.

³¹ Kwo kolenji, Nyo inye ne iberurot eng’ Jehovah; amu nee si itonon eng’ sang’? Amu kaachob got, ak ole ruitos tambesik.

³² Kwo go anyun chichoto, yeityo kotiach tuguk che kilau tambesik; ak kiigochi tambesik mobek ak amitwogik che kiga kigonor, ak kiinaga beek koune kelyekyik ak che bo bik che kimi koboto inendet.

³³ Ak kigiipchi amitwogik kinde tainnyi: ago kile, Ma amisiei agoi amwawok ng’olyot ne kagiyogunena. Kolenji, Mwa anyun.

³⁴ Komwa anyun kole, A otwogindetab Abraham.

³⁵ Ak kigoberur Jehovah mising’ kiptaiyandennyu; ak kigotoror koeet: kigogochi inendet akwotisiek che bo kechirek ak che bo tuga, ak feda, ak tahabu, otwogik che murenik, otwogik che tibik, tambesik ak sigirok.

³⁶ Kisikyi kiptaiyandennyu werit Sara osotiondennyi ye kingo kagoosit: ak kigogochi kiptaiyandennyu werinnyi tuguk tugul che tinyei.

³⁷ Ak kimakwa kiptaiyandennyu ayosio, kole, Ametunji werinnyu cheptab Kananik, che amenye emenywa:

³⁸ ago ui gotab baba, oldab tilionutikyuk, iwe imutyi werinnyu chepto kotun.

³⁹ Ak kialenji kiptaiyandennyi, Abere matun chamei cheboto kosubwa.

⁴⁰ Ak kilenja, Iyogu Jehovah ne awendote tainnyi malaikaiyandennyi obe tuwai, koberur bandang’ung’; iwe imutyi werinnyu chepto eng’ tilionutikyuk eng’ gotab baba kotun:

⁴¹ eng’ yoto anyun itiagage eng’ kayosiennyu, ye kaiit oldab tilionutikyuk; ak ngo magonin cheboto, itiagage anyun eng’ kayosiennyu.

⁴² Ak kaitu rani ye mi kondab beek, ak ale, Ee, Jehovah Kamuktaindet ne bo kiptaiyandennyu Abraham, ngiberur bandanyu:

⁴³ keero, atonone yu negite kondab beek; ak igochi kocham chepto ne nyonei kosiilei beek, ak alenji anyun, Kaigai inaga beek tutigin aee, cho mi tereng’ung’;

⁴⁴ ak kowolwa, kole, Nganagin iee, ak asiilji tambesiguk agichek: ingoek noto osotiot ne kagolewenji Jehovah weritab kiptaiyandennyu.

⁴⁵ Ak ye kata ang’alali eng’ muguleldanyu, keero, kochun Rebeka koibu terennyi eng’ tigikyennyi; kochortagei kwo kondab beek kosiil beek: alenji, Kaigai inaga beek aee.

⁴⁶ Ak kotu terennyi ne kami tigikyennyi kochokyi, ak kole, Nganagin iee, ak asiilji tambesiguk agichek: aee anyun, yeityo konaga tambesik agichek.

⁴⁷ Ak ateebe alenji, I cheptab ng’o? Ak kolenja, A cheptab Betuel, weritab Nahor, ne kisikyi Milka inendet; ande anyun peteit, ak karik eng’ eunekyik.

⁴⁸ Ak ang’uruge asa Jehovah, ak aweekyi kongoi Jehovah Kamuktaindet ne bo kiptaiyandennyu Abraham, ne kigondoiywa eng’ oret ne mie si amutyi werinnyi cheptab ng’etab kametab kiptaiyandennyu.

⁴⁹ Ak nguno anyun ngocham oyachi kiptaiyandennyu ne mie ak ne bo iman, omwawa: ak ngo ma u noto, omwawa si kobiit aweekyige eutab tai, anan ko eutab katam.

⁵⁰ Kowolji Laban ak Betuel anyun, kolenji, Bunu Jehovah ng’olyondoni: magimuchi kemwaun ng’olyot ne ya anan ne mie.

⁵¹ Rebeka no, mi taing’ung’, imut, oba, ingoek osotiotab weritab kiptaiyandeng’ung’, ko u ye kimwa Jehovah.

⁵² Ak ye kingogas otwogindetab Abraham ng’alekwak, kong’uruk agoi ng’ony eng’ taitab Jehovah.

⁵³ Kiib anyun otwogindet tuguk che bo feda, ak che bo tahabu, ak ngoroik, kogochi Rebeka; ak kogochi ng’etab kamet ak kamet agine tuguk che kororon.

⁵⁴ Kiamis ak koeeiso inendet ak bik che kimi koboto inendet, ak kiruiyo: ak kong’eetyo karon, ak kole, Ochamwa awo oldab kiptaiyandennyu.

⁵⁵ Ak kile ng’etab kamet ak kamet, Ingota kotebi lakwani kobotech betusiek che ng’ering’, che te betusiek taman; ak ye ibata choto, kwo.

⁵⁶ Ak kimwachi kolenji, Amata ogaa, amu kigoberur Jehovah bandanyu; ochamwa awo gab kiptayandennyu.

⁵⁷ Ak kile, Mie keguur lakwanato, konyo keteebe inendet.

⁵⁸ Koguur anyun Rebeka, nyo koteebe, kolenji, Tos ichame obe ak chichi? Kole, Wei, awendi.

⁵⁹ Kichamji anyun Rebeka ng’etab kamet kwo, koboto cheblakwennyi, ak otwogindetab Abraham, ak bikyik.

⁶⁰ Ak kiiberur Rebeka, kolenji, Ne kitupche, egu kametab elfusiek konyil elfusiek taman, ak konyaban lagoguk kurgotikab che wechei icheget.

⁶¹ King’eet anyun Rebeka, ak tibikyik che otwogik, kolany tambesik, kosub chichoto: komut anyun otwogindonoto Rebeka ak koba.

⁶² Ak kinyo Isak kobun oretab Beer-lahai-roi; amu kimenyei inendet emetab Murot ne bo Tai.

⁶³ Ak kiwendoti Isak eng’ kewet koskoleny kobwatoti; ak kitobendo, kogeer, ak ogeero, tambesik che bwanei.

⁶⁴ Ak kitobendo Rebeka, ak ye kingogeer Isak, kochorgei eng’ tambesiet.

⁶⁵ Ak kiteebe otwogindent kolenji, Ng’o chichin nyonei eng’ kewanin kotorokwech? Kolenji otwogindet, Kiptaiyandennyu noto: ak kinam ngoriet ne bochin metit agoi kelyek kotugegei.

⁶⁶ Komwachi otwogindet Isak anyun tuguk tugul che kiga koyai.

⁶⁷ Ak kiimut Isak Rebeka kwo emaitab Sara kamennyi, ak kotun Rebeka koek osotiondennyi; ak kicham inendet kot: ak konyor Isak kagaigaet amu kiga kome kamet.