TAUNET 23 - BUKUIT NE TILIL

Meetab Sara ak tubennyi eng’ Makpela

¹ Kenyisiek che kitar Sara kosobei ko ki bogol ak tiptem ak tisab: chuto ko kenyisiek che kitar Sara kosobei.

² Ak kimechi Sara Kiriat-arba (noto Hebron), eng’ emetab Kanan: ak kinyo Abraham konyo kote agobo Sara, ak korirji.

³ Yeityo kong’eet Abraham eng’ ole kimi musto, ak kong’alal ak bikab Het, kolenji,

⁴ A kiprutoiyo ak ko a bunotyo eng’ oling’wong’: ogona yeto eng’ oling’wong’ kobunja eng’ ole kitupchin bik atupchi musto, si ma ageere.

⁵ Kiwolji bikab Het Abraham anyun, kolenji,

⁶ Kasech, kiptaiyandennyu: i bounindet ne bo Kamuktaindet eng’ kwenunnyo: tupchi musto kererit ne kelewen eng’ kererisiekyok; mami chi eng’ achek ne imuchi koetenen kererinnyi si metupchi musto.

⁷ King’eet Abraham anyun, kong’urukyi bikab emet, bikab Het.

⁸ Ak king’alal koboto ichek kole, Ngochame atub musto si ma ageere, ko mie ogasa, osomwa eng’ Epron weritab Sohar,

⁹ kogona kebenennyi, ne mi Makpela, ne mi kiwotetab mbarennyi; ingogona eng’ taing’wong’ ole kitupchin bik kobunja eng’ kamanutiet ne yamegei ne bo feda.

¹⁰ Kitebe anyun Epron kwenutab werikab Het; ak kiwolji Epron Kitindet Abraham kogasei werikab Het, koboto tugul che kimong’ji ormarichetab nganasennyi, kolenji,

¹¹ Achicha, kiptaiyandennyu, ago kasa: kagonin mbaranato koboto kebenet ne mi oloto; kagonin eng’ taitab werikab bikyuk: tupchi musto.

¹² Kiing’uruk Abraham anyun eng’ taitab bikab emet.

¹³ Ak king’alal ak Epron, kogasei bikab emet, kole, Ago ngicham, ko mie igasa; agonin kamanutiet ne yamegei ak mbaranato; ee, taach anyun, si atupchi musto olindo.

¹⁴ Kiwolji Epron Abraham kolenji,

¹⁵ Kiptaiyandennyu, kasa, kimoitosi nee ak inye eng’ mbaret ne yamegei kamanutiennyi ak sekelisiek bogol ang’wan che bo feda? Tub musto.

¹⁶ Kigas anyun Abraham ng’alekab Epron; ak kigerji Abraham Epron fedaisiek che kiga mwa inendet eng’ taitab bikab Het, choto ko sekelisiekab feda bogol ang’wan, che kiboisie chemung’arainik.

¹⁷ Kigigamanji anyun komie Abraham mbaretab Epron, ne kimi Makpela, ne itoorjingei Mamre, mbaret, koboto kebenet ne kimi oloto, ak ketik tugul che kimi mbaranato, che kigiyieme kiwotet tugul,

¹⁸ kigigochi Abraham kobunji eng’ taitab werikab Het, ak eng’ taitab tugul che kimong’ji ormarichetab nganasennyi.

¹⁹ Kingobata choto kotub Abraham Sara osotiondennyi eng’ kebenet ne kimi mbaretab Makpela ne itoorjingei Mamre (noto ko Hebron), eng’ emetab Kanan.

²⁰ Kigamanji anyun bikab Het Abraham mbaret komie ak kebenet ne kimi oloto, koek ole kitupchin bik.