TAUNET 22 - BUKUIT NE TILIL

Ketiemei kayanetab Abraham eng’ kagoitoetab Isak

¹ Kingobata tuguchoto, kotiem Kamuktaindet Abraham, kolenji, Abraham; ak kile, Ami yu.

² Kolenji, Imut wering’ung’, noto ne inegei, ne ichame, Isak, ui agoi emetab Moria; si igoite eng’ oloto koek kagochinet ne kibeelei eng’ tulwet age ne tun amwaun.

³ Ak king’eet Abraham karon mising’ komusta, ak kiito kit ne kitebe eng’ sigiriennyi si kobiit kolany, ak kiimut murenik aeng’ eng’ che kitinyei, koba koboto inendet, ak Isak werinnyi; ak kibet kwenik che bo kagochinet ne kibeelei, yeityo koba ole kiga koarorji Kamuktaindet.

⁴ Kitobendo Abraham eng’ betut ne bo somok ak kigeer koronoto kota ko loo.

⁵ Ak kilenji Abraham murenjoto chiget, Otebi eng’ yu koboto sigiriet, ak kebe olin ak weri; si kesa, ak keweeige kogeny.

⁶ Ak kinam Abraham kwenik che bo kagochinet ne kibeelei, kosutyi Isak werinnyi; ak kiib inendet eng’ eunnyi mat ak rotwet; ak kiba tuwai.

⁷ King’alalji anyun Isak kwandanyi Abraham, kolenji, Aba, ak kile, Ami yu, werinnyu. Ak kile, Keero, mi yu mat ak kwenik: ago mi ano aruetab kechir ne egu kagochinet ne kibeelei?

⁸ Ak kilenji Abraham, Werinnyu, cheng’jingei Kamuktaindet aruetab kechir ne egu kagochinet ne kibeelei: yeityo koba tuwai.

⁹ Ak kiit koronoto ole kiga koarorji Kamuktaindet; ak koteech Abraham kaptisisiet eng’ oloto, ak kitet kwenik, yeityo korat werinnyi Isak, ak kiinde inendet kwenik barak eng’ kaptisisiet.

¹⁰ Kiiyogoito anyun eunnyi Abraham, konam rotwet kolen kobare werinnyi.

¹¹ Eng’ yoto anyun koguur inendet malaikayatab Jehovah eng’ kipsengwet kolenji, Abraham, Abraham: kole, Ami yu.

¹² Kolenji, Ametwa lakwet, ameyachi kiy tugul: amu kaanai nguno ale, igonyiti Kamuktaindet, amu ma ietena wering’ung’, ne wering’ung’ ne inegei.

¹³ Kotobendo Abraham ak kogusgong’; ogeero, mengit ne kanam sondit kuinoikyik; ak kiwa Abraham koget mengit, si koeny koek kogochinet ne kibeelei, kogeere werinnyi.

¹⁴ Ak kiguure Abraham yoto Jehovah-jireh: ko u ye kimwaei agoi kora, kele, Kigonune tulwetab Jehovah.

¹⁵ Ak kiguur ne bo aeng’ malaikaiyatab Jehovah Abraham eng’ kipsengwet,

¹⁶ kolenji, Kayosiechige anege, mwaei Jehovah, amu keyai kii, ma ietena wering’ung’ ne inegei.

¹⁷ Eng’ kaberuret aberurin, ak eng’ kayabet ayabi iyoteng’ung’ kobarait kotenit kecheik che bo kipsengwetisiek, ak kotenit ng’aniek che bo ngegutab nyanjet; ak tun nyoboni lagoguk kurgetab bunikwak;

¹⁸ ak tun kiberuri bororiosiek tugul che bo ng’ony eng’ keswondeng’ung’; amu kegas it kutinnyu.

¹⁹ Ak kiweeigei anyun Abraham kwo ole mi murenjugachiget, ak king’eetyo koba tugul agoi Beer-Seba; ak kimeny Abraham Beer-Seba.

²⁰ Kingobata tuguchuto, kemwachi Abraham, kelenji, Keero, kogosikyi Milka agine ng’etab komet Nahor lagok;

²¹ lakwet ne bo tai ko ki Us, ak ng’etab kamet Bus, ak Kemuel kwandab Aram;

²² ak Kesed, Haso, Pildas, Jidlap, ak Betuel.

²³ Ak kisich Betuel Rebeka: chuto sisiit ko kisikyi Milka Nahor ng’etab kametab Abraham.

²⁴ Ak kisikyi Reuma chebaigeiyandennyi Teba, Gaham, Tahas, ak Maaka.