TAUNET 21 - BUKUIT NE TILIL

Kesichei Isak

¹ Kirutochi Jehovah Sara ko u ye kiga mwa, kiyachi Jehovah Sara ko u ye kiga ng’alalji.

² Ak kimanach Sara, ak kisikyi Abraham werit eng’ osindanyi, eng’ betunoto ne kiga koarorji Kamuktaindet.

³ Ak kiguure Abraham kainetab werinnyi ne kigisikyi, Isak, ne kisikyi Sara.

⁴ Ak kiyatita Abraham werinnyi Isak eng’ betut ne bo sisiit, ko u ye kiga ng’at Kamuktaindet inendet.

⁵ Ak kiga kotar Abraham kenyisiek bogol, si kesikyin werinnyi Isak.

⁶ Ak kile Sara, Kagona Kamuktaindet arori; ak age tugul ne kasei ng’olyondoni kororiei kobota.

⁷ Ak kile, Ng’o ne kita mwachin Abraham kolenjin, reriei lagok Sara? Amu kaasikyi werit eng’ osindanyi.

⁸ Kiner anyun lakwet, ak kigiluge: ak kiyai Abraham igorta ne o eng’ betut ne kigiluge Isak.

Keonei Hagar ak Ismael

⁹ Ak kigeer Sara weritab Hagar Chemisriot, ne kiga sikyi Abraham, kosasei.

¹⁰ Kimwachi anyun Abraham kolenji, On chebiosoni otwogin ak werinnyi: amu manamei tuguk weritab chebiosoni otwogin koboto werinnyu Isak.

¹¹ Ak kiyait mising’ ng’olyondoni eng’ Abraham agobo werinnyi.

¹² Kimwachi Kamuktaindet Abraham kolenji, Amegeer ko ya ng’olyondoni eng’ inye amu weri, ak amu chebiosoning’ung’ otwogin; kas ng’alekab Sara eng’ tuguchoto tugul kamwaun: amu bunu Isak oretab iyoteng’ung’.

¹³ Ak tun ayae weritab chebiosoni otwogin agine koek bororiet, amu inendet ko iyoteng’ung’.

¹⁴ Ak king’eet anyun Abraham karon mising’ ak kiib amitwogik ak sotet ne bo beek, kogochi Hagar ak lakwet, ak kiindechi tigikyennyi, ak kilenji, Ui, anyun: ak kiwa anyun, koombenot eng’ ong’atetab Beer-Seba.

¹⁵ Ak kiigesgei beek eng’ sotet, ak kibagakta lakwet eng’ sondit orit.

¹⁶ Yeityo kwo koteb ng’ony kotoorjigei inendet, eng’ ye loo kitigin, ye itei kipchabet ngemwokto: amu kile, Si mageer meetab lakwet. Kitebi kotoorjigei inendet, ak kiwaach korir.

¹⁷ Ak kigas Kamuktaindet kutitab weroto ak kiguur malaikaiyatab Kamuktaindet ne mi kipsengwet Hagar, ak kilenji inendet, Amin nee, Hagar? Ameiywei; amu kagogas Kamuktaindet kutitab lakwet eng’ ole mi.

¹⁸ Ng’eet, ui ing’eet lakwet, ak inamate eng’ eung’ung’; amu tun ayae inendet koek bororiet ne o.

¹⁹ Ak iyat Kamuktaindet konyekab kwonyoto, kogeer keringetab beek; ak kiwa, konyiit beek sotet, ak konaga lakwet.

²⁰ Kimi Kamuktaindet koboto lakwet, ak kiner koeet; ak kimeng’ot ong’atet, koek mwogindet.

²¹ Ak kimeng’ot ong’atetab Paran; ak kocheng’ji kamet Chemisriot kotun.

Koyosiechingei Abraham ak Abimelek

²² King’alalji eng’ betusiechoto Abimelek ak Pikol inendet ne ki kiptaiyatab askarikyik, Abraham, kolenji, Mitei Kamuktaindet koboten eng’ tuguk tugul che iyae:

²³ iyosiewa anyun nguno eng’ Kamuktaindet si metila let, anan eng’ werinnyu, anan eng’ mochogoronikyuk; ago ko u rirenet ne kiayaun iyaiywa aginye ko u noto, agot eng’ emet ole kigeegune toondet.

²⁴ Ak kilenji Abraham, Ayostosi.

²⁵ Ak kiger kong’ Abraham Abimelek amu keringetab beek, ne kiga rebe otwogikab Abimelek eng’ koromnatet.

²⁶ Ak kile Abimelek, Mangen inendet ne kiyai kioto: ak kima imwawa, ak kitomo agas ko u ni, kobate ra.

²⁷ Kinam anyun Abraham kechirek ak tuga, kogochi Abimelek; ak kiiyomisgei ichek tuwai.

²⁸ Ak kiitaban Abraham subenwek tisab che bo kechir, koba taban ichegei.

²⁹ Ak kiteebe Abimelek Abraham, kolenji, Bo nee subenwechu bo kechir tisab chu ketaban ichegei?

³⁰ Ak kile, Subenwechu tisab bo kechir, ko mie ikweri eng’ eunnyu, si koek baornatet eng’ ane, kobor kole, ane ne kiabale keringonito bo beek.

³¹ Kiguure yoto anyun Beer-Seba amu noto; amu kiiyosiechigei tuwai eng’ oloto.

³² Kiiyomisgei anyun eng’ Beer-Seba: ak king’eet Abimelek, ak Pikol ne ki kiptaiyatab askarikyik, koweeigei koba emetab Pilistik.

³³ Ak kimin Abraham ketit eng’ Beer-Seba, ak kiguur eng’ oloto kainetab Jehovah, Kamuktaindet ne bo Koigeny.

³⁴ Ak kiek toondet Abraham eng’ emetab Pilistik betusiek che chang’.