TAUNET 20 - BUKUIT NE TILIL

Koesioi Abraham Sara kole ma asotiondennyi

¹ Ak kiu Abraham eng’ oloto kwo emet ne bo Murot ne bo Tai, kwo komeny kwenutab Kades ak Sur: kiek toondet eng’ Gerar.

² Kimwa Abraham agobo Sara osotiondennyi, kole, Inendet ko tupchennyu: ak kiiyokto Abimelek laitoriatab Gerar, kimutyi Sara.

³ Ago kinyonji Kamuktaindet Abimelek eng’ karuotitoet kemoi kolenji, Keero, i chito ne kagome, amu kwondo ne kaimutyige; amu inendet ko osotiotab chi.

⁴ Ago kitomo korikyi Abimelek inendet: ak kilenji, Ee Kiptaiyat, tos ibare agot bororiet ne bo iman?

⁵ Tos ma mwawa inendet kole, Inendet ko tupchennyu? Ak kimwa osotiondonoto agine kole, Inendet ko tupchennyu: kiayai nito eng’ muguleldo ne bo iman ak eng’ eunek che tililen.

⁶ Ak kimwachi Kamuktaindet inendet eng’ karuotitoet, kolenji, Wei, angen ale kiiyae nito muguleldang’ung’ ne bo iman, ak kiaetenen agane si meyaiywa tengek: noto anyun ma achamun itwa inendet.

⁷ Ara anyun imutyi nguno kwonyi chitab kobo; amu maotio inendet si kosa agobo inye, si isob: ago ngo meweekyi, inai ile, imee iman, inye, ak tugul che itinye che mi koboten.

⁸ King’eet anyun Abimelek karon mising’, ak koguur otwogikyik tugul, ak komwachi tuguchoto tugul koba itikwak: ak kiiyweis bichoto mising’.

⁹ Kiguur anyun Abimelek Abraham, koteebe kolenji, Koiyaiywech nee? Ak nee chalwok ne koayaun, kot igesenja ak bororiennyu tengegi te ni? Koiyaiywa tuguk che manyolu keyai.

¹⁰ Ak kilenji Abimelek Abraham, Koigeer nee, si iyai kii?

¹¹ Ak kile Abraham, Kialen, mami olito iman kaiyweetab Kamuktaindet: ak, imuchi kobara amu kwondanyu.

¹² Ago iman, inendet ko tupchennyu, bo sietab chebiosennyo; ak kiatun:

¹³ ak ye kingo kagomoong’wa Kamuktaindet eng’ gotab baba, ak kogona awendot, alenji anyun inendet, Rireneng’ung’ ni ne tun iborua; imwae eng’ komasta age tugul ole kibendi ile, Inendet ko tupchennyu.

¹⁴ Kiigochi anyun Abimelek Abraham kechirek ak tuga, ak otwogik che murenik ak otwogik che tibik, ak koweekyi Abraham Sara osotiondennyi.

¹⁵ Ak kilenji Abimelek, Keero, mi taing’ung’ emoninyu: meny ole ichame.

¹⁶ Ak kilenji Sara, Keero, kaagochi tupcheng’ung’ fedaisiek elfut agenge: ak koek choto che tugun konyek eng’ bik che mi koboten, ak kagiityin imanda eng’ taitab bik tugul.

¹⁷ Kisa anyun Abraham Kamuktaindet, ak kiisoob Kamuktaindet Abimelek, ak osotiondennyi, ak chebaigeinikyik; ak kisich lagok.

¹⁸ Amu kiga korat Jehovah mootinwek tugul che bo gotab Abimelek, amu Sara kwondab Abraham.