TAUNET 2 - BUKUIT NE TILIL

¹ Kigiges anyun yaetab kipsengwetisiek ak ng’ony ak chang’indanywa tugul.

² Kiiges Kamuktaindet boisionikyik che kiga koyai eng’ betut ne bo tisab; ak kiimuuny eng’ betut ne bo tisab eng’ boisionikyik tugul che kiga koyai.

³ Ak kiiberur Kamuktaindet betutab tisab, kotaban: amu kiimuuny eng’ betunoto eng’ boisionikyik tugul che kitoi Kamuktaindet koyai.

Komi Adam ak Awa mbaretab Eden

⁴ Chu taunaik che bo kipsengwetisiek ak ng’ony eng’ betunoto ne kiyai Jehovah Kamuktaindet kipsengwetisiek ak ng’ony.

⁵ Kitomo kobiit ket ne bo kewet eng’ ng’ony, ak kitomo kobityo ketik alak tugul che mengechen che bo kewet: amu kitomo kogochi Jehovah Kamuktaindet korobonji ng’ony, ak kima komi chi ne ibati ng’ony.

⁶ Ago kitogosta kibungweret eng’ ng’ony, ak kobis ng’ony komugul.

⁷ Ak kiyai Jehovah Kamuktaindet chito eng’ ng’ung’unyek, ak kobusyi serunekyik kabuset ne bo sobondo; kiek anyun chichoto, chito ne sobei.

⁸ Kigol Jehovah Kamuktaindet mbaret eng’ Eden eng’ komostab kong’asis, ak konde oloto chichoto kiga koyai.

⁹ Ak kiigochi Jehovah Kamuktaindet kobit ket age tugul eng’ ng’ony ne kararan eng’ keeret, ak ne mie eng’ amet; ak ketit ne bo sobondo eng’ kwenutab mbaret, ak ketit ne bo naet ne kinae ne mie ak ne ya.

¹⁰ Ak kimong’une Eden ainet ne ibisi mbaret; yeityo kopcheigei eng’ oloto, koek ainosiek ang’wan.

¹¹ Kainetab ne bo tai ko Pison: noto ne yiemei emet komugul ne bo Abila ole mi tahabu;

¹² miachen tahabu che bo emonoto: mitei oloto bedola ak soam.

¹³ Kiguure ainet ne bo aeng’ Gion: noto ne yiemei emet komugul ne bo Kus.

¹⁴ Kiguure ainet ne bo somok Hidikel, noto ne wendi komostab kong’asis ne bo Asuria. Kiguure ainet ne bo ang’wan Euprate.

¹⁵ Kiimut Jehovah Kamuktaindet chito kwo kotebe mbaretab Eden si kobiit kosemberi ak koribei.

¹⁶ King’at Jehovah Kamuktaindet chichoto kolenji, Imuchi iam logoek che bo ket age tugul ne imache ne mi mbaret;

¹⁷ ago amat iam che bo ketit ne bo naet ne kinae ne mie ak ne ya; amu eng’ betut ne keam che bo ketoto, imee ne matiny.

¹⁸ Kimwa Jehovah Kamuktaindet kole, Ma mie kotebi chi inegei; ayachini ne toreti ne kergei ak inendet.

¹⁹ Kiyai anyun Jehovah Kamuktaindet tiony age tugul ne bo ng’ony eng’ ng’ung’unyek, ak tarit age tugul ne bo barak, ak kokwerichi chichoto tiong’ichoto kogeer ole tochindoi kainaik; ak kainet ne kiguure chichoto kiy age tugul ne sobei, ko kiek kainennyi noto.

²⁰ Ak kitochi chichoto tuga tugul kainaik, ak taritik che bo barak, ak tiony age tugul ne bo ng’ony; ago kima biit ne toreti chichoto ne kergei ak inendet.

²¹ Kiigochi anyun Jehovah Kamuktaindet chichoto ruondo ne nyigis, konuuch: ak konem karasta agenge, ak kotuge yoto banyek kogeere karasato:

²² ak koyai Jehovah Kamuktaindet karasto kiinemune chichoto, koek kwondo; ak komutyi chichoto.

²³ Ak komwa chichoto kole, Ni anyun nguno ko kowet ne bo kowekyuk, ak banyek che bo banyekab bortanyu: kiguure kainennyi Kwondo, amu kaginemune Muren.

²⁴ Amu noto anyun, bagaktoi mureno kwandanyi ak kamennyi, ak konamgei ak kwondanyi; ak koek ichek borto agenge.

²⁵ Ak kitebyei tuwai ach ngor, chichoto ak kwondanyi, ak kima kolilandos.