TAUNET 19 - BUKUIT NE TILIL

Kotaachei Lot malaikaisiek aeng’ eng’ Sodom

¹ Kiit anyun malaikaisiechoto aeng’u Sodom koskoleny; ak kimi Lot ormarichetab Sodom: ak kigeer Lot ichek, kong’eet kotorokta, ak kong’uruk kot kotiiny togennyi ng’ony;

² ak kole, Kasaak ale, omosu, obwa anyun kiptainikyuk gotab otwogindeng’wong’, ak otebi kemouni komugul, ak oun kelyek, si osib ong’eetye, omuste. Ak kile ichek, Achicha, kitebe sang’ kemout komugul.

³ Ak kiigaigai Lot mising’; kimasta anyun ichek koba gonnyi: ak kiyachi inendet igorta, kobeelji makatinik che ma kinde mermerek, si koam ichek.

⁴ Ago ye kitomo koruiyo, kobwa bikab nganaset, bichoto bo Sodom, neranik koboto che osen, bik tugul che kibun komasta age tugul, kobwa koyiem got:

⁵ ak kiguur Lot kolenji, Ngorjo bik che kabwa gong’ung’ kemouni? Imutwech kobwa sang’, si kobiit kenai ichek.

⁶ Ak kimanda Lot kwo ole mi ichek eng’ kurgat, ak koger kurget.

⁷ Ak kilenji, Asaak, che kitupche, amoyai sogornatani te ni.

⁸ Ogeero, atinye tibik aeng’ che tom kotuiyo ak chi; ochamwa amutwak, si oyachi ko u ye ogeere: ago amoyachi kiy bichu; amu kagobwa gonnyu.

⁹ Ak kile, Istege. Ak kole, Kitoondenjinech chichi, ago kaga machei koek kiruogindet: kimache anyun keyaun ne ya kosiir icheget. Ak kirieb mising’ ichek chichoto, noto ko Lot, ak korikyi kurget kolen kobut.

¹⁰ Ak kiiyogoito eunekwak bichoto, kochuut Lot konyo go, ak koger kurget.

¹¹ Ak kibire koratet bichoto kimitei kurgetab got, che mengechen ak che eechen; agoi kong’etyo kocheng’ei kurget.

Keng’emei Sodom ak Gomora, ak kesoru Lot

¹² Ak koteebe bichoto Lot kolenji, Tos ta itinye alak? Ngo mi sandetab cheptang’ung’, ak weriguk, ak tibiguk, ak chi age tugul ne itinye ne mi nganaset; imut komanda eng’ olito.

¹³ Amu kimache keng’em olito, amu kogoeet kateiyenywa eng’ taitab Jehovah; ak kagoyokwech Jehovah kebwa keng’em.

¹⁴ Ak kimanda Lot, kwo kong’alal ak sanik che kiitun tibikyik, kolenji, Ong’eetye, oba eng’ olito; amu machei kong’em Jehovah nganasani. Ago ki u inendet eng’ sanichato chito ne urerenjin.

¹⁵ Ak ye kingoeech, kochirji malaikaisiek Lot, kolenji, Ng’eet, imut kaing’ung’, ak tipchuguget aeng’ mitei yu; si ma kiwong’un amu tengektab nganasani

¹⁶ Ago kiigagei: ak konam bichoto eut, ak eutab osotiondennyi, ak eunekab tibikyik aeng’; amu kirire Jehovah inendet: ak kiimaanda eng’ nganaset, ak kobagakta eng’ sang’.

¹⁷ Ak ye kingo kagomaanda, kolenji, Mwei, soruge; amat igeer let, ametonone oldo tugul eng’ atebwoni; mwechi tulwet, si ma kiwong’un.

¹⁸ Ak kilenji Lot, Achicha, kiptaiyandennyu:

¹⁹ asain ale, kagonyor otwogindeng’ung’ chamet eng’ taing’ung’, ak kaites rireneng’ung’ bo ge ne kaiborua, amu kesoru sobondanyu; ago anyun, mamuchi amwechi tulwet, si manyorua nyalil, ak kogona ame:

²⁰ keer anyun-o, negit nganasani, mie amwechi, amu ming’in: Ee, chamwa amwechi (tos ma nganaset ne ming’in?) Si kosob sobondanyu.

²¹ Ak kilenji, Kaagasun agobo ng’olyondonito agine, ale mang’eme awong’u nganasanato kaimwa.

²² Chakte, mwechi oloto; amu mamuchi ayai kiy agoi iit oloto. Kigiguure Soar nganasanato amu noto.

²³ Kiga kochor asista ye kingoitei Lot Soar.

²⁴ Eng’ yoto anyun kotumji Jehovah Sodom ak Gomora koik che laldos ak mat che bunu Jehovah eng’ kipsengwet;

²⁵ ak king’em kobeel nganasochoto, ak atebwet komugul, ak bik tugul che kimenyei nganasochoto, ak tuguk tugul che bitos eng’ ng’ony.

²⁶ Ago kigusgong’ osotiotab Lot eng’ let, ak kiwalak koek tulwet ne ming’in ne bo munyuk.

²⁷ Ak king’eet Abraham karon komusta kwo agoi koit ole kitonone eng’ taitab Jehovah:

²⁸ ak kitobendo kogeerot olin bo Sodom ak Gomora, agot emet tugul ne bo atebwet, ak kigeer iyeto ne bo emet kotogostoi ko u iyeto ne bo mat ne o mising’.

²⁹ Ak kingo kagong’em Kamuktaindet nganasok che bo atebwet kowong’, kobwat anyun Kamuktaindet Abraham ak komaanda Lot komandae ng’emisiet, ye kingo kagong’em kowong’ nganasok, ole kimenyei Lot.

³⁰ Kitogosta anyun Lot kwo Soar, kwo komeny tulwet, koboto tibikyik aeng’; amu kiiywei komeny Soar; ak kimeny kebenet, inendet ak tibikyik aeng’.

³¹ Kilenji anyun ne o ne ming’in, Kagoosit kwandanyo, ak mami mureno emet komugul ne imuchi korikyech ko u biteetab ng’ony komugul:

³² nginage kwandanyo maiyek si kobiit keruiye ak inendet, si kerib iyotetab kwandanyo.

³³ Ak kiinaga kwandanywa maiyek kemounoto ak kiwa ne o kwo koruiyo ak kwandanyi, ak kima nai inendet ye kiruitos tuwai, anan ye king’eetei.

³⁴ Ak eng’ betut ne kiisubi noto, kolenji ne o ne ming’in, Keero, kogiruiye lagat ak baba: nginage maiyek kemouni bo ra kogeny; ak iwe inye oruiye tuwai, si kerib iyotetab kwandanyo.

³⁵ Ak kiinaga maiyek kwandanywa kogeny kemounoto: king’eet anyun ne ming’in, kwo koruiyo ak inendet ak kima nai inendet ye kiruitos tuwai, anan ye king’eetei.

³⁶ Kimanach anyun tibikab Lot tuwai komanage kwandanywa.

³⁷ Ak kisich ne o werit, ak kiguure kainennyi Moab: inendet ko kwandab Moabik agoi ra.

³⁸ Ak kisich ne ming’in agine werit, ak kiguure kainennyi Ben-ami: inendet ko kwandab Amonik agoi ra.