TAUNET 18 - BUKUIT NE TILIL

Kotaachei Abraham malaikaisiek somok

¹ Kimong’ji Jehovah Abraham eng’ ye negite ketikab Mamre, ye kitebyei eng’ kurgetab emainnyi ko kang’wanit asis;

² ak kitobendo ak kigeer bik somok kotonondos ko kaitoorjigei inendet: ak ye kingogeer, kolabat eng’ kurgetab emainnyi kotorokta icheget, ak kong’uruk agoi ng’ony.

³ Ak kole, Kiptaiyandennyu, ngot ko kaanyoru mieindo eng’ taing’ung’, asain ale, amesiirtoe otwogindeng’ung’:

⁴ ingeibwok beek tutigin, si oune kelyekwok, ak omuuny eng’ ketit kel:

⁵ si aibwok amitwogik tutigin, si ogimegitu; ye ibata osiirte: kobwanjini otwogindeng’wong’ agobo noto. Ak kile ichek, Yai ko u yoto kaimwa.

⁶ Ak kichakta Abraham kwo go ole mi Sara eng’ emait, ak kolenji, Chob kerutik somok che bo busiek che tambulul ak ichokyi si ikwanykwany ak ibeel kobwa makatinik che lebelen.

⁷ Ak kilabat Abraham ole mi tuga kwo koget barnotiot ne mie, ak kogochi otwogindet kochob kochokyi.

⁸ Ak konam mwaitab chego, ak chego, ak barnotiondonoto kaga kochob, koipchi konde tainywa; ak kotonon inendet eng’ ole negite ichek eng’ ketit kel. Koamis anyun bichoto.

⁹ Ak kilenji ichek inendet, Mi ano Sara kwondong’ung’? Kolenji, Mi go.

¹⁰ Ak kimwa inendet kole, Aweekyininge iman eng’ kenyit ne nyonei eng’ betusiechuto; ak keero, sichei kwondong’ung’ Sara werit. Ak kiebe it Sara, komi kurgetab emait, ne kimi batai.

¹¹ Ak kiga koosegitu Abraham ak Sara, kiga kotar kenyisiek che chang’; ak kiga kong’et iyotetab Sara.

¹² Kirori anyun Sara eng’ muguleldanyi, kole, Tos ta abaibaitu ago kogotertera osindo, ak kagoosit agine kiptaiyandennyu?

¹³ Ak kilenji Jehovah Abraham, Amu nee si korori Sara, kole, Tos ta amuchi iman ane asich lakwet, ko kaaositu?

¹⁴ Tos mi kiy age tugul ne temene Jehovah? Aweekyininge eng’ kenyit ne nyonei, eng’ betusiechuto, eng’ betut ne kaachob, ak kosich Sara werit.

¹⁵ Kitiiyo anyun Sara, kole, Ma arori; amu kiiywei. Ak kilenji, Achicha; kerori.

Kosaei Abraham agobo Sodom

¹⁶ King’eetyo anyun bichoto koba eng’ yoto, kotokyigei Sodom: ak kiwa Abraham koboto icheget koyomis.

¹⁷ Ak kile Jehovah, Tos aung’e Abraham kit ne amache ayai;

¹⁸ amu tun egu iman Abraham bororiet ne o ne tinyei kimnatet, ak kiberuri bororiosiek tugul che bo ng’ony eng’ inendet?

¹⁹ Amu kaalewen inendet si komuch koboi lagokyik ak gonnyi che biitu let eng’ inendet, si kobiit korib oretab Jehovah, koyai ne bo iman ak kiruoget; si kobiit kosuldochi Jehovah Abraham kit ne kimwa agobo inendet.

²⁰ Ak kile Jehovah, O kateiyetab Sodom ak Gomora, samisen tengekwogikwak mising’;

²¹ kachortege anyun nguno amu noto si ageer ngo kigoyai iman ko u kateiyenywa, ne kigonyonja; ak ngo ma u noto, anai.

²² Ak kiweeigei bichoto eng’ oloto, koba kotokyigei Sodom: ago kita kotononi Abraham eng’ taitab Jehovah.

²³ Ak kirikyi Abraham Jehovah, ak koteebe kolenji, Tos iwong’u bik che bo iman koboto che yaachen?

²⁴ Ngot komi bik che bo iman konomu eng’ nganaset: ko tos iwong’u amerire nganaset agobo bichoto konom che bo iman che mi oloto?

²⁵ Ingolooit eng’ inye, yaet ne u nito, ibar che bo iman koboto che yaachen, si kogergeit che bo iman ak che yaachen; ingolooit eng’ inye: tos mayaei iman Kiruogindet ne bo ng’onyuni komugul?

²⁶ Ak kile Jehovah, Ngot anyorji Sodom bik konom che bo iman, arire anyun oloto tugul amu ichek.

²⁷ Ak kiwolji Abraham kole, Keero, kaagany ang’alalji Kiptaiyat, ago ane ko a temburiek ak ko a orek kityo:

²⁸ tos ngot ko ma biit bik mutu eng’ bik konom che bo iman: ko tos ing’em nganaset komugul amu bik mut che mami? Ak kile, Mang’eme agot anyorji bik artam ak mut.

²⁹ Ak kita kong’alalji kogeny kolenji, Ngot anyun kenyorji artam? Kole, Mayae kiy amu choto artam.

³⁰ Ak kile, Amat konerech Kiptaiyat, si kota ang’alal: ngot anyun kenyorji sosom? Kole, Mayae kiy, ngot anyorji sosom oloto.

³¹ Ak kile, Keero, kaagany ang’alalji Kiptaiyat: ngot anyun kenyorji tiptem oloton? Kole, Mang’eme amu choto tiptem.

³² Ak kile, amat konerech Kiptaiyat, si kota amwa ni kityo: Ngot anyun kenyorji taman oloto? Kole, Mang’eme amu choto taman.

³³ Kiwa Jehovah anyun bandanyi, ye kingogesgei ng’alalet ne king’alali ak Abraham: ak kiweeigei Abraham kwo oldanyi.