TAUNET 16 - BUKUIT NE TILIL

Komwee Hagar Sara. Sigetab Ismael

¹ Kitom kosikyi Abram Sarai osotiondennyi lakwa; ago kitinyei chepto ne ki otwogindet, Chemisriot, ne kigiguure kainennyi Hagar,

² ak kilenji Sarai Abram, Keero, kirata Jehovah si maii: kaigai iwe oldab chepto otwogindennyu; alen amuchi anyor lagok eng’ inendet. Ak kigas Abram kutitab Sarai.

³ Ak kingo kagomeny Abram emetab Kanan eng’ kenyisiek taman, komut anyun Sarai kwondab Abram Hagar Chemisriot otwogindennyi ak kogochi Abram manong’otiondennyi koek osotiondennyi.

⁴ Ak kiwa Abram ole mi Hagar, ak kimanach: ak kingogeer kole managat, kosas Hagar bounindennyi Sarai.

⁵ Kilenji anyun Sarai Abram, Ingobunjin nyalildanyu: kiagonin chepto otwogindennyu koek neng’ung’; ak ye kingogeer kole managat, korenya: ingobesiewech Jehovah.

⁶ Ago kilenji Abram Sarai, Keero, mi cheptang’ung’ euneguk; yachi ko u ye igeere ile mie. Ak kiusaus anyun Sarai inendet; kot komwee Hagar inendet.

⁷ Kinyorji anyun malaikaiyatab Jehovah inendet ole negite kondab beek eng’ ong’atet, noto ko kondab beek ne mitei oret ne wendi Sur.

⁸ Kotwekyi kolenji, Hagar, otwogindetab Sarai, ibunu ano? Ak iwendi ano? Ak kole, Kamweune bounindennyu Sarai.

⁹ Kolenji malaikaiyatab Jehovah, Iwekyuige bounindeng’ung’ ak iming’injige inendet.

¹⁰ Yeityo kolenji malaikaiyatab Jehovah, Abaroi mising’ iyoteng’ung’, kot koma kimuchi kiit amu chang’indo.

¹¹ Ak kolenji malaikaiyatab Jehovah, Keero, i managat, tun isiche werit; ak iguure kainennyi Ismael, amu kogogasun Jehovah nyalildang’ung’.

¹² Ak tun kergeitu inendet ak sigirietab timin eng’ kwenutab bik; mi eunekyik boriet eng’ inendet ak eng’ bik alak; ak tun meng’oti taitab bikab orenywa tugul.

¹³ Ak kitochi kainet Jehovah ne king’alaljin inendet, koguure, I Kamuktaindet ne keera: amu kimwa kole, Tos kaageer eng’ yu agot inendet ne keera ak kota asobe?

¹⁴ Amu noto anyun kigiguure keringonoto bo beek Beer-lahai-roi; keero, mitei kwenutab Kades ak Beret.

¹⁵ Ak kisikyi Hagar Abram werit: ak kitochi Abram werinnyi kainet koguure Ismael, ne kisich Hagar.

¹⁶ Ak ki bo Abram kenyisiek tamanwogik sisiit ak lo, ye kingosikyin Hagar Abram Ismael.