TAUNET 15 - BUKUIT NE TILIL

Koarorjin Jehovah Abram sigetab lakwet, ak ametab Kanan

¹ Kingobata tuguchu koityi Abram ng’olyotab Jehovah eng’ ng’ang’utiet, kolenji, Ameiywei, Abram; a long’eng’ung’ ak melektang’ung’, ne o ne siirtoot.

² Kole Abram, Ee Kiptaiyat Jehovah, igona nee, kawe kalilot amatinye lakwa, ak inendet ne tun indii tugukyuk ko Elieser ne bo Damasko?

³ Ak kole Abram, Keer anyun-o, ma igona iyotet: ak inendet ne kigisikyi gonnyu ko noto ne tun indii tugukyuk.

⁴ Keero, kiityi inendet ng’olyotab Jehovah kolenji, Ma tun namei chichi tuguguk; ago namei tuguguk ne mong’une bortang’ung’.

⁵ Ak kiimut inendet kwo sang’, ak kolenji, Inyal kipsengwet, iit kecheik, ngo tos imuchi iit: ak kolenji, Tenitu choto lagoguk.

⁶ Ak kiiyan Jehovah; ak kiityi inendet imanda amu noto.

Kigimiti kayomiset

⁷ Ak kilenji, Ane Jehovah ne kiamutun imong’une Ur ne bo Kaldeik, si agonin emoni kobunjin.

⁸ Ak kole, Ee, Kiptaiyat Jehovah, anae nee ale tun bunjina?

⁹ Ak kilenji, Namwa roriat ne bo kenyisiek somok, ak subendo ne bo ng’oror ne bo kenyisiek somok, ak mengit ne bo kenyisiek somok, ak cheptuget ak aruetab tarit.

¹⁰ Ak kinam chuto tugul, ak kobet, yeityo konde motwet age tugul kotoorjigei motwennyi: ago ma kibet taritik.

¹¹ Ak kichorjigei motong’wek banyechato, ak kion Abram.

¹² Ye kingororoktoi asista, kobutyi Abram ruondo ne nyigis; ak ogeero, kiimu inendet mesundeito ne o.

¹³ Ak kilenji Jehovah Abram, Nai anyun iman ile, egu lagoguk toek eng’ emet ne ma nenywa, ak koot ichek bichoto; ak konyalil ichek eng’ kenyisiek bogol ang’wan;

¹⁴ ak tun aruokyini bororionoto agine ne tun bendi lagoguk kootei: ak ye ibata noto komong’ koboto tuguk che chang’.

¹⁵ Ago iwendi inye eng’ kalyet ole mi kwanisieguk; kitubin ye tun ilil.

¹⁶ Ak tun weegugei kogeny kobwanei yu eng’ ibinda ne bo ang’wan: amu tomo konyi tengektab Amorik.

¹⁷ Ak kibiit ko u ni, ye kingororoktoi asista, ko kaimenit, kotook mat ne boto iyeto ak mat ne liblibeni ne bunei kwenutab banyechato.

¹⁸ Ak kiiyomisgei Jehovah betunoto ak Abram, kole, Kiagochi iyoteng’ung’ emoni, koboch ainetab Misri agoi ainet ne o, ne kiguure Euprate:

¹⁹ kiagochi ichek Kenik, ak Kenisik, ak Kadmonik,

²⁰ Ak Hitik, ak Perisik, ak Repaik,

²¹ ak Amorik, ak Kananik, ak Girgasik, ak Jebusik.