TAUNET 14 - BUKUIT NE TILIL

Lugetab laitorinik. Luuletab Lot ak ole kigisorundo

¹ Ak kibiit ko u ni eng’ betusiek che bo Amrapel, laitoriatab Sinar, ak Ariok, laitoriatab Elasar, ak Kedolaomer, laitoriatab Elam, ak Tidal, laitoriatab Goim,

² kiborio laitorinichuto ak Bera, laitoriatab Sodom, ak Birisa, laitoriatab Gomora, ak Sinab, laitoriatab Adma, ak Semeba, laitoriatab Seboim, ak laitoriatab Bela (noto ko Soar).

³ Kiiyomogei chuto tugul eng’ atebwetab Sidim (noto ko Araraita ne bo Munyuk).

⁴ Kiot ichek Kedolaomer kenyisiek taman ak aeng’, ak eng’ kenyitab taman ak somok kongelelso.

⁵ Ak kinyo Kedolaomer koboto laitorinik che kimi ak inendet, eng’ kenyitab taman ak ang’wan, kwo kobar Repaik eng’ Asterot-Karnaim, ak Susik eng’ Am, ak Emik eng’ Sabe-Kiriataim,

⁶ ak Horik, eng’ tulwenywa Seir, agoi El-paran, ne negite ong’atet.

⁷ Ak koweek kobwa En-mispet (noto ko Kades) ak kobar koret tugul ne bo Amalekik, ak Amorik agichek, che kimenyei Hasason-tamar.

⁸ Ak kimanda laitoriatab Sodom, ak laitoriatab Gomora, ak laitoriatab Adma, ak laitoriatab Seboim, ak laitoriatab Bela (noto ko Soar); kitet luget kotuiyo eng’ atebwetab Sidim,

⁹ kiba koborio ak Kedolaomer, laitoriatab Elam, ak Tidal, laitoriatab Goim, ak Amrapel, laitoriatab Sinar, ak Ariok, laitoriatab Elasar; koborio laitorinik ang’wanu ak laitorinik mut.

¹⁰ Ki nyiitat atebwetab Sidim keringonik che bo lamit; ak kimwei laitorinik che bo Sodom ak che bo Gomora, ak kirorokyi oloto, ak kimwechi chun kang’et tulwet.

¹¹ Ak kiluul tuguk tugul che bo Sodom ak che bo Gomora, ak amitwogikwak tugul, ak koba bandanywa.

¹² Ak kiluul Lot weritab ng’etab kametab Abram, ne kimenyei Sodom, ak tugukyik, ak koba.

¹³ Ak kiwa chito ne kigachilil, si komwachi Abram Hebranindet: ne tebune ole negite ketikab Mamre, Amorindet ne tupcho ak Eskol, ng’etab kam bo Aner; ak kinamegei bichuto ak Abram.

¹⁴ Ak kingogas Abram kole, Kageluul ne bo ornywa, koawen koboto otwogikyik che kiginet luget, che kigisikyin gonnyi, bik bogol somok ak taman ak sisit, ak kiisub laitorinichoto agoi koit Dan.

¹⁵ Ak kiyiem inendet ak otwogikyik bunik kemoi, ak kobar ichek, ak kiisub agoi koit Hoba ne mi eutab katam ne bo Damasko.

¹⁶ Ak kisor tuguk tugul, ak koweech Lot ne bo ornywa, ak tugukyik, ak kobogorisiek agichek, ak bik.

Koberuri Melkisedek Abram

¹⁷ Kimong’ anyun laitoriatab Sodom kotorok inendet, ye kiweeksei kobunu baretab Kedolaomer ak laitorinik che kimitei koboto inendet, eng’ atebwetab Sabe (noto ko atebwetab laitoriat).

¹⁸ Ak kiibu Melkisedek laitoriatab Salem makatinik ak divaik: ki tisiindetab Kamuktaindet ne Toror Mising’.

¹⁹ Ak kiiberur inendet, ak kole, Ingoberurok Abram eng’ Kamuktaindet ne Toror Mising’ ne chechik kipsengwetisiek ak ng’ony.

²⁰ Iberurot Kamuktaindet ne Toror Mising’, ne kiinde buniguk euneguk. Ak kiigochi Abram inendet kebeberta ne bo taman ne bo kiy tugul.

²¹ Ak kilenji laitoriatab Sodom Abram, Kona bik, ak iib inye tuguk kobunjin.

²² Kolenji Abram laitoriatanb Sodom, Kaaiitochi eunnyu Jehovah, Kamuktaindet ne Toror Mising’, ne chechik kipsengwetisiek ak ng’ony,

²³ ale maname agot inet anan tapsiniet, agot kiy age tugul neng’ung’, si memwa ile, Kaayai Abram koek magorio:

²⁴ kobate choto che kigoam murenik, ak motwetab bik che kigibe tugul; Aner, ak Eskol, ak Mamre, ingoib ichek kebebertanywa.