TAUNET 13 - BUKUIT NE TILIL

Kobestos Abram ak Lot

¹ Ak kitogosta anyun Abram kong’eete Misri, inendet ak osotiondennyi, ak tugul che kitinyei, koboto Lot, koba Murot ne bo Tai.

² Ak ki magorio Abram mising’ eng’ tuga, ak feda, ak tahabu.

³ Ak kiwa eng’ bandanyi, kong’eete Murot ne bo Tai, agoi Betel, agoi koit ole kimi emainnyi eng’ tai, kwenutab Betel ak Ai;

⁴ agoi ole kimi kaptisisiet, ne kiga koteech eng’ tai: ak koguur Abram kainetab Jehovah eng’ oloto.

⁵ Ak kitinyei Lot agine nego, ak tuga, ak emaisiek, inendet ne kibendi ak Abram.

⁶ Ak kima imuch koyam ichek emonoto, komeny tuwai: amu ki chang’ tugukwak, kot ko mata komuch komeny tuwai amu noto.

⁷ Ak kibiit boriet eng’ mestowek che kiiyagi tugab Abram ak che kiiyagi tugab Lot; ak kimenyei Kananik ak Perisik emonoto eng’ betusiechoto.

⁸ Kilenji anyun Abram Lot, Ma mie kota kobiit boriet eng’ kwenunnyo, inye ak ane, anan eng’ kwenutab mestowek chechuk ak cheguk; amu kitupche.

⁹ Tos mami emet komugul taing’ung’? Kaigai istegei eng’ ole ami: ngot iwe komostab katam, awe anyun komostab tai, anan ngot iwe komostab tai, awe anyun komostab katam.

¹⁰ Kitobendo anyun Lot kogeerot atebwet komugul ne bo Jordan, kole emet ne tinyei beek eng’ olda tugul, ko u mbaretab Jehovah, ko u emetab Misri, ne tokyingei komostab Soar; ye ki tomo kong’em Jehovah Sodom ak Gomora.

¹¹ Kilewenjigei anyun Lot atebwet komugul ne bo Jordan, ak kouuot Lot kotokyigei kong’asis: ak kopcheigei ichegei.

¹² Kimeny anyun Abram emetab Kanan, ak komeny Lot nganasok che bo atebwet, ak kichecheiyot kot koit Sodom.

¹³ Ago ki yaachen bikab Sodom, ak ki kiptengeginik mising’ kosiir, eng’ taitab Jehovah.

¹⁴ Kingo kagobesio Lot ak Abram, kolenji Jehovah Abram, Tobende nguno anyun, ak igeerote kong’eete ole imitei komostab katam, ak komostab tai, ak komostab kong’asis, ak komostab cherongo:

¹⁵ amu agonin emet tugul ne igeere koboto iyoteng’ung’ koigeny.

¹⁶ Ak ayae lagoguk kochang’ait ko u temburiek che bo ng’ony, si ngot komugaksei koiit chi temburiek che bo ng’ony, ko kaga iitoksei lagoguk agichek.

¹⁷ Ng’eet, wendote koindab emoni, ak tebeesindanyi, amu agonin emoni kobunjin.

¹⁸ Ak kiu Abram ak emainnyi, ak kwo komeny ye negite ketik che bo Mamre, che mi Hebron, ak koteekyi Jehovah kaptisisiet eng’ oloto.