TAUNET 12 - BUKUIT NE TILIL

Ng’olyot agobo Abraham: kuursetab Jehovah: Bandab Abram kowendi kanan

¹ Kilenji anyun Jehovah Abram, Ui inye eng’ emeng’ung’, ak eng’oldab tilionutiguk, ak eng’ gotab kwandang’ung’, ui emet ne amache aborun;

² ak ayain iegu bororiet ne o, ak aberurin, atoror kaineng’ung’ koeet; ak iegu kaberuret.

³ Ak aberuri ichek che iberurin, ak achube agot ne sasin: ak kiberuri ortinwek tugul che bo ng’ony eng’ inye.

⁴ Kiwa Abram anyun ko u ye kiga komwachi Jehovah; kiba koboto Lot: kiga kotar Abram kenyisiek tamanwogik tisab ak mut ye kingomandoi eng’ Haran.

⁵ Kiimut Abram osotiondennyi Sarai, koboto Lot weritab ng’etab kamet, ak tugukwak tugul che kiga koyumjigei, ak bik che kiga konyor eng’ olin bo Haran; ak kimanda koba emetab Kanan; kiit anyun emetab Kanan.

⁶ Ak kibun Abram emet kwenut agoi oldab Sekem, kot koit ketitab More. Ak kimi Kananik emonoto eng’ betusiechoto.

⁷ Ak kimong’ji Jehovah Abram, ak kolenji, Agochini iyoteng’ung’ emoni: ak kiteekyi kaptisisiet Jehovah, ne kimong’ji inendet.

⁸ Ak kiu kwo eng’ oloto agoi koit tulwet eng’ komostab kong’asis ne bo Betel, ak kiteech emainnyi, kimi Betel komostab cherongo, ak kimi Ai komostab kong’asis: ak kiteekyi kaptisisiet Jehovah eng’ oloto, ak kiguur kainetab Jehovah.

⁹ Ak kiu Abram kogeny, kotokyigei Murot ne bo Tai.

Komi Abram Misri

¹⁰ Ak kibiit rubet eng’ emonoto: kochortagei anyun Abram kwo Misri ak kotebe oloto; amu kieet rubet mising’ kong’wanit eng’ emet.

¹¹ Ak ye ki negit komong’ji Misri, kolenji osotiondennyi Sarai, Kas anyun nguno, angen ale i kobogoriot ne kararan;

¹² ak ye keerin bikab Misri, kole, Osotiondennyi ni: kobara, ak kobagakten isob.

¹³ Kaigai imwa ile i tupchennyu, si komieit eng’ ane agobo inye, ak kosob sobondanyu amu inye.

¹⁴ Ak ye kingoit Abram Misri, kogeer bikab Misri kobogoriondonoto kole kararan mising’.

¹⁵ Ak kigeer bounik che bo Parao, kochoi inendet eng’ taitab Parao: ak kigimut kobogoriondonoto kwo gotab Parao.

¹⁶ Ak koyachi Abram ne mie agobo inendet: ak kinyor kechirek, ak tuga, ak kirugikab sigirok, ak otwogik murenik, ak otwogik tibik, ak iyuogikab sigirok, ak tambesik.

¹⁷ Kibir anyun Jehovah Parao ak gonnyi eng’ korotwek che yaachen amu Sarai kwondab Abram.

¹⁸ Ak kiguur Parao anyun Abram ak kolenji, Nee ni kiiyaiywa? Kilya si memwawa ile inendet ko osotiondeng’ung’?

¹⁹ Kilya si imwa ile, Inendet ko tupchennyu? Ak kiamutyigei anyun amu noto alen koek osotiondennyu: ineno anyun osotiondeng’ung’, imut, ak iwe.

²⁰ Ak king’at Parao bik agobo inendet: komut eng’ oret koboto osotiondennyi ak tugul che kitinyei.