TAUNET 11 - BUKUIT NE TILIL

Teekset ne koi ne bo Babel

¹ King’alale ng’ony komugul kutit agenge ak ng’alalet agenge.

² Ak ye kita kouuote kong’asis, konyor atebwet eng’ emetab Sinar; ak kimeny oloto.

³ King’alaljigei anyun ichegei kole, Ong’eetye keyai matabaruk ak kebeel komie. Kiboisie matabaruk che kita koik, ak kiboisie lamit komale.

⁴ Ak kimwa kole, Obwa keteekyigei nganaset, ak keteech teekset age ne koi ne togostoi barak, ne itei kimonjogunnyi kipsengwetisiek, si keyaige keegu che toogunotin, si mata keyeste eng’ ng’ony komugul.

⁵ Ak kichorgei Jehovah konyo kogeer nganaset ak teekset ne koi ne kitogosta kwo barak, ne kiteech werikab bik.

⁶ Ak kile Jehovah, Ogeero, agenge bichu, ak ko bo tugul kutit agenge; ak kagotoi koyai kiy ne u ni: ak mami kiy ne ranyei ichek si mayai kiy ne machei.

⁷ Ongebe, kechortege anyun, kitoiye kutuswekwak si mata kogasyin ichegei eng’ ng’alalet.

⁸ Eng’ noto anyun, koiyestaat Jehovah ichek koba eng’ oloto agoi ng’ony komugul: ak kimeto teeksetab nganaset.

⁹ Kigiguure nganasanato Babel anyun, amu noto: amu kiitoiye Jehovah oloto kutuswek che bo ng’ony komugul; ak kiiyesta Jehovah ichek koba eng’ oloto, koba ng’ony komugul.

Bik che kibiitu let eng’ oretab Sem agoi Abraham

¹⁰ Chu ortinwekab Sem. Kitar Sem kenyisiek bogol, si kosichei Arbaksat eng’ kenyit ne bo aeng’ ye kingo kagobata maranet:

¹¹ ak kitar Sem kenyisiek bogol mut ye kingo kagosich Arbaksat, ak kisich werik ak tibik.

¹² Kitar Arbaksat kenyisiek sosom ak mut kosich Sela:

¹³ ak kitar Arbaksat kenyisiek bogol ang’wan ak somok ye kingo kagosich Sela, ak kisich werik ak tibik.

¹⁴ Kitar Sela kenyisiek sosom, kosich Eber:

¹⁵ ak kitar Sela kenyisiek bogol ang’wan ak somok ye kingo kagosich Eber, ak kisich werik ak tigik.

¹⁶ Kitar Eber kenyisiek sosom ak ang’wan, kosich Peleg:

¹⁷ ak kitar Eber kenyisiek bogol ang’wan ak sosom ye kingo kagosich Peleg, ak kisich werik ak tibik.

¹⁸ Kitar Peleg kenyisiek sosom, kosich Reu:

¹⁹ kitar Peleg kenyisiek bogol aeng’ ak sogol ye kingo kagosich Reu, ak kisich werik ak tibik.

²⁰ Kitar Reu kenyisiek sosom ak aeng’, kosich Serug:

²¹ kitar Reu kenyisiek bogol aeng’ ak tisab ye kingo kagosich Serug, ak kisich werik ak tibik.

²² Kitar Serug kenyisiek sosom, kosich Nahor:

²³ kitar Serug kenyisiek bogol aeng’ ye kingo kagosich Nahor, ak kisich werik ak tibik.

²⁴ Kitar Nahor kenyisiek tiptem ak sogol, kosich Tera:

²⁵ kitar Nahor kenyisiek bogol ak taman ak sogol ye kingo kagosich Tera, ak kisich werik ak tibik.

²⁶ Kitar Tera kenyisiek tamanwogik tisab, kosich Abram, Nahor, ak Haran.

²⁷ Chu ortinwekab Tera. Kisich Tera Abram, Nahor, ak Haran; ak kisich Haran Lot.

²⁸ Kime Haran eng’ taitab kwandanyi Tera eng’ emet ne kigisikyin, eng’ Ur ne bo Kaldeik.

²⁹ Ak kiitunis Abram ak Nahor: kigiguure osotiotab Abram Sarai; ak kigiguure osotiotab Nahor Milka, cheptab Haran, kwandab Milka ak Iska.

³⁰ Kisonen Sarai; kima kotinyei lakwa.

³¹ Ak kiimut Tera werinnyi Abram, ak Lot weritab Haran, weritab werinnyi, ak Sarai osotiotab werinnyi Abram; kiba tugul eng’ emetab Ur ne bo Kaldeik, koba emetab Kanan; kiit Haran, koba komeny oloto.

³² Ak betusiekab Tera ko ki kenyisiek bogol aeng’ ak mut: ak kime Tera eng’ Haran.