SEPANIA 3 - BUKUIT NE TILIL

Tengektab Jerusalem ak imandab Jehovah

¹ Bwa inendet ne ngeleliot ne kigong’wanit, nganaset ne usisiei!

² Kima kas it mwaet; kima taach kotigonet; kima imang’ Jehovah; kima rikyi Kamuktaindennyi.

³ Ng’etunyik che borisendos bounikyik che mi kwenunnyi; suikab koskoleny kiruogikyik; maituuchi kiy agoi koeech.

⁴ Bik che tangusen ak koberberisiei maotikyik: kigomuruon tisiikyik ole tilil, kigong’em ng’atutik.

⁵ Bo iman Jehovah ne mi kwenunnyi; mayaei tengekto; ibortoi kiruogennyi karonet age tugul, yaei kosulda; ago maililandos bik che ma bo iman.

⁶ Kiabar bororiosiek; kigong’emogis irimoikwak che tororen; kiabut ortinwekwak kot ko ma kobunei chi: kigong’emogis nganasokwak, kot ko ma komi chi, kot ko ma komi chi ne menyei.

⁷ Kiamwa ale, Iywea iman, itaache kotigonet; si ma kiisto meng’otennyi, ko u tugul che kiang’at agobo inendet: ago king’eetyo karon mising’ ak kong’em boisionikwak tugul.

Kaweegunetab Israelik che ng’etunotin

⁸ Ogena anyun, mwaei Jehovah, kot koit betut ne abarisiei: amu kiatil ale ayumi bororiosiek, ale ayumi bounatosiek, si arong’ji ichek neregekyuk, neregekyuk tugul che koromen; amu kibeelei ng’ony tugul eng’ matab ng’etkondanyu.

⁹ Amu tun aweekyini anyun bik eng’ betunoto, kutit ne mie, si koguur tugul kainetab Jehovah, si koboisiechi inendet eng’ maget agenge.

¹⁰ Tun ibwa kagochinennyu bikyuk che saa, cheptab bikyuk che kigoyesta, kobunu bitonin eng’ ainosiekab Etiopia.

¹¹ Matun ililani eng’ betunoto eng’ boisioniguk tugul, che kiiyaiywa ibistoe: amu tun aistoi komong’ eng’ kwenung’ung’ menotiguk che itororigei, si ma ichauge kogeny eng’ tulwennyu ne tilil.

¹² Ago abagachi eng’ kwenung’ung’ bik che kinyalili ak ko kibananok, ak komang’ ichek kainetab Jehovah.

¹³ Ma koyaei tengekto bik che king’et che bo Israel, ama komwaei lembechek; ama kinyorjin ng’olyot ne bo ng’alset kutuswekwak: amu tun amisiei ak koruiyo, ama biitu chi ne imui ichek.

¹⁴ Tien, ee cheptab Sion; waach, ee Israel; igasge ak ibaibaitu eng’ muguleldang’ung’ tugul, ee cheptab Jerusalem.

¹⁵ Kagoisto Jehovah kiruogutiguk, kigoon bunyondeng’ung’: mi kwenung’ung’ laitoriatab Israel, inendet Jehovah: ma iywei yaitiet agoi.

¹⁶ Kimwachin Jerusalem eng’ betunoto, kelenjin, Ameiywei: ee Sion, amatingochorirenso euneguk.

¹⁷ Mi kwenung’ung’ Jehovah Kamuktaindeng’ung’, inendet ne bo kamuktaet, ne soru: boiboitunenen eng’ boiboiyet, sisei eng’ chamnyennyi, boiboitunenen eng’ tiendo.

¹⁸ Ayumi ichek che arogendos agobo tuiyet ne bo kaming’inetab ge, che ki chechuk, che kigas nyigisindo eng’ chotisionoto.

¹⁹ Keero, aborie eng’ betusiechoto ichek tugul che inyalilin: ak asoru inendet ne ing’wali, ak amutu inendet ne kigion; ak ayae ichek koek kalosunet ak kainet, ne kigoyom ng’ony tugul kalilanenywa.

²⁰ Amutwok eng’ betusiechoto, ak ayumak eng’ betusiechoto: amu ayaok oegu kainet ak kalosunet eng’ kwenutab bororiosiek tugul che bo ng’ony ye tun amutwok kogeny ogeere eng’ ole kigiluuljok, mwaei Jehovah.