SEPANIA 2 - BUKUIT NE TILIL

Nyonjin kiruoget bororiosiek che bunik che mi komoswechoto

¹ Oyumge, ee, oyumge, ee bororiet ne matinyei kalilanet;

² kotom kosulda ng’atutiet, kotom kosiirto betut ko u metetek, kotom kobwanjok neregek che koromen che bo Jehovah, kotom konyonjok betutab neregekab Jehovah.

³ Ocheng’ Jehovah, okwek tugul che o taloen che o bo ng’ony, che kigoyai kiruogutikyik; ocheng’ imanda, ocheng’ talasiet: abere tun kiunyok eng’ betutab neregekab Jehovah.

⁴ Amu tun kimetoi Gasa, ak koek karatia Askelon: kionei Asdod ko katelel asis, ak kitutu Ekron.

⁵ Bwa bik che menyei ngegut, bororietab Keretik! Borienen ng’olyotab Jehovah, ee Kanan, emetab Pilistik; ang’emin, kot ko ma komi chi ne meng’isiei.

⁶ Ak koek ngegusiek ole kiyagisie, ak ole mi gorikab mestowek koboto biusiekab akwotisiekab kechirek.

⁷ Ak kobunji ngegut bik che king’et che bo gotab Juda; iyage akwotisiekwak oloto: ruitos eng’ gorikab Askelon koskoleny; amu rutochin Jehovah Kamuktaindenywa, ak komut ichek kogeny eng’ ole kiga kiluulji.

⁸ Kiagas chotisietab Moab, ak churisiosiekab lagokab Amon, che kichote bikyuk, ak kochaunegei kiwotenywa.

⁹ Mwaei anyun Jehovah ne bo lugosiek, Kamuktaindetab Israel kole, Ko u ye asobe, koigeitu Moab Sodom, ak koigei lagokab Amon Gomora, bunjin siwek, ak keringonikab munyuk, ak koguber agoi: luulei bikyuk che ng’etu ichek, ak konam bororiennyu ne king’et ichek koek borotenywa.

¹⁰ Nyoru nito amu menotenywa, amu kigochot ak kochaunegei bikab Jehovah ne bo lugosiek.

¹¹ Egu Jehovah kamuiset eng’ ichek: amu itenyi cheptalelisiek tugul che bo ng’ony; ak kolos bik tugul inendet, ilosu chi age tugul eng’ oldanyi, koboto ngegusiek tugul che bo bororiosiek.

¹² Okwek Etiopik, barok rotwennyu bo chok.

¹³ Ak kochuul eunnyi kotokyi komostab katam, ak kong’em Asuria; ak koyai Ninebe koek karatia, ak koyaam, ko u ong’atet.

¹⁴ Ak koruiye akwotisiek kwenunnyi, tiong’ik tugul che bo bororiosiek: ak kotebe chebokibabaa ak chepswererit metowekab tolochikwak: tiendos eng’ tirisiok: tebe kubernatet tugatugik: amu kigong’any tuguk che kigituge taragonik.

¹⁵ Ni nganaset ne baibai ne maiiti kiy, ne kimwa eng’ muguleldanyi kole, Ane kityo, mami age kobatena: kagoek karatia ne tia, ole ruitos tiong’ikab timin! Renyei inendet age tugul ne siirtoi, ak kong’wereri.