SEPANIA 1 - BUKUIT NE TILIL

Nyonjin kiruogetab Jehovah Juda ak Jerusalem

¹ Ng’olyotab Jehovah ne kinyonji Sepania weritab Kusi, weritab Gedalia, weritab Amaria, weritab Hesekia, eng’ betusiekab Josia weritab Amon, laitoriatab Juda.

² Agesu tuguk tugul eng’ ng’ony, mwaei Jehovah.

³ Agesu chi ak tiony; agesu taritikab barak, ak njirenikab nyanjet, koboto kanagutik ak kiptengeginik; ak abar bik eng’ ng’ony, mwaei Jehovah.

⁴ Ak atokyini eunnyu Juda, ak bik tugul che menyei Jerusalem; ak abar che king’et che bo Baal eng’ olito, koboto kainetab Kemarik ak tisiik;

⁵ ak ichek che ilosu tuguk tugul che bo kipsengwet, eng’ gorik barak; koboto icheget che ilosu, che iyosiechin Jehovah, ak koyostos eng’ kainetab Malkam;

⁶ ak ichek che kiweek kometo Jehovah; koboto ichek che ma cheng’ Jehovah, anan koteepse inendet.

⁷ Sis eng’ taitab Kiptaiyat Jehovah: amu kagorik betutab Jehovah: amu kagochob Jehovah tiseiywot, kagoanyiny toekyik.

⁸ Ak tun abire eng’ betutab tiseiywotab Jehovah, bounik, werikab laitoriat, koboto ichek tugul che ilaachi ngoroikab toek.

⁹ Ak abire eng’ betunoto tugul che torombenjin tugatuk, che inyiiti gotab kiptaiyandenywa koromnatet ak ng’alset.

¹⁰ Mwaei Jehovah kole, Tun biitu eng’ betunoto waagatab rirek ne bunu ormarichetab njirenik, ak waagat ne bunu kebebertab nganaset, koboto cheet ne o ne bunu tulonok che mengechen.

¹¹ Owaach okwek bik che omenye Maktes, amu kabek chemung’arainik tugul: ak kibarei ichek tugul che kitinyei fedaisiek ng’isiat.

¹² Ak asiach Jerusalem eng’ betusiechoto akweng’ate; ak abir bik che kigotepto kimnatenywa ko u divaik che mi ak misigikyik, che mwaei eng’ mugulelwekwak kole, Mayaei Jehovah ne mie, ama yaei yaitiet.

¹³ Ak keluul magornatenywa, ak koguber gorikwak: ee, teechei gorik, ago mamenyei; ak komin mbarenikab sabibuk, ago maeei divaikwak.

¹⁴ Karik betut ne o ne bo Jehovah, negit ak kochogu mising’, agot twegunetab betutab Jehovah; rirei eng’ ng’wanindo eng’ oloto chito ne kim.

¹⁵ Egu betunoto betutab neregek, betutab nyalilda ak bichiindo, betutab ng’emisiet ak kubernatet, betutab mesundeito ak tuuindo, betutab bolik ak mesundeito ne nyigis.

¹⁶ Betutab iriaget ak waagat, agobo nganasok che ng’ototin, ak irimoik che tororen.

¹⁷ Ak aipchi bik bichiindo, kot kobendat ko u bik che koriotin, amu kigoyachi Jehovah tengekto: ak ketumda korotikwak ko u temburiek, ak keranda borwekwak ko u ng’atatek.

¹⁸ Ama imuchi fedaisiekwak anan tahabusiekwak kosor ichek eng’ betutab neregekab Jehovah; ago kibeelei emet komugul eng’ matab ng’etkondanyi: igesu, ee, igesu eng’ kamuiset, ichek tugul che menyei emet.