SEKARIA 9 - BUKUIT NE TILIL

Bwa ne nyonjin bororiosiek che mi ole negit

¹ Lautietab ng’olyotab Jehovah agobo emetab Hadrak, ak egu Damasko ole tebe: amu tokyingei Jehovah bik tugul ak bororiosiek tugul che bo Israel:

² koboto Hamat agine ne mi kiwotennyi: Turo ak Sidon, amu ng’omen mising’.

³ Ak kiteekyigei Turo irimet, ak kiiyum feda ko u temburiek, ak koyum tahabu che kororon ko u ng’atatekab ortinwek.

⁴ Ogeero, onei Kiptaiyat inendet, ak kowirji kimnatennyi nyanjet; ak kebeel.

⁵ Keerei Askelon ak koiyweis; keerei Gasa agine, ak konyor ng’wanindo ne o; ak Ekron agine, amu ililani eng’ kamang’unennyi: ak kobet laitoriat eng’ Gasa, ama kemenyei Askelon.

⁶ Ak komeny chito ne bo sarbuch Asdod, ak agesu menotetab Pilistik.

⁷ Ak aiste korotikyik eng’ kutinnyi, ak aiste tugukyik che kiweechei eng’ kelekyik; ak koek inendet agine ne ng’etu agobo Kamuktaindennyo: ak koigei bounindet eng’ Juda, ak koigei Ekron Jebusindet.

⁸ Ak ameng’isie ayiem gonnyu si agirinda luget, si mabun chi yoto anan koweegegei: ama mi usindet ne bunei kwenunywa agoi: amu kaageer nguno eng’ konyekyuk.

Laitornatetab kalyet ne bo laitoriatab Sion

⁹ Baibaitu mising’, ee cheptab Sion; waach, ee cheptab Jerusalem: keero, nyonjinin laitoriandeng’ung’: bo iman inendet, ak kotinyei yetunet; iming’inegei, ak kolong’onu sigiriet, moitab sigiriet ne kirgit.

¹⁰ Ak ang’em karitab luget eng’ Epraim, koboto mbartanyit eng’ Jerusalem, ak kiges kwangetab boriet; ak komwachi bororiosiek kalyet: ak iboch bounatennyi nyanjet age agoi nyanjet age, ak koboch Ainet agoi tabanwekab ng’ony.

Kaberuretab Jehovah eng’ Juda ak Israel

¹¹ Ago eng’ inye, ko kiayokte kimonjororiniguk eng’ keringet ne mami beek, amu korotikab kayomiseng’ung’.

¹² Oweekyige irimet, okwek kimonjororinik che otinye kamang’unet: agot rani amwae ale, ageerun konyil aeng’.

¹³ Amu kiarikyige Juda ko u kwanget, ak agersach Epraim; ak ang’eet weriguk, ee Sion, kobargei ak weriguk, ee, emetab Yunanik, ak ayain iige rotwetab chok ne bo chito ne nyigan.

¹⁴ Ak kotook Jehovah eng’ baragunywa, ak kwo ne kipchabennyi ko u kalyelet: ak koguut Kiptaiyat Jehovah iriaget, ak kwo koboto kipchurjurinik che bo murot ne bo tai.

¹⁵ Ak korib Jehovah ne bo lugosiek ichek; ak koges, ak kotiekyi ng’ony koik che kiwirtoe borowet; ak koeeiso, ak kowaakyo ko u che kaee divaik: ak kinyiit ko u tabok, ko u luukwekab kaptisisiet.

¹⁶ Ak kosor Jehovah Kamuktaindenywa ichek eng’ betunoto ko u akwetab kechirekab bikyik: amu tun kergeitu ak koik che bo chepkulet, ne kinamjin barak mising’ eng’ emennyi.

¹⁷ Amu o ne tia mieindanyi, ak o ne tia kororonindanyi! Igochin bek murenik konerio, ak kogochin divaik che leelach tibik konerio.