SEKARIA 7 - BUKUIT NE TILIL

Ng’olyot agobo karugutetab ge

¹ Kinyonji ng’olyotab Jehovah Sekaria, eng’ kenyitab ang’wan ne bo laitoriat Darius, eng’ betut ab ang’wan ne bo arawetab sogol, noto ko Kisleb.

² Kiga koyokto anyun ichek che bo Bet-el Sareser ak Regem-melek, koboto bikwak, koba kosom chamet eng’ Jehovah,

³ ak kong’alalji tisiikab gotab Jehovah ne bo lugosiek, ak maotik, kolenji, Tos kanyolja arir eng’ arawet ne bo mut, atabange, ko u ye kiayai eng’ kenyisiechu chang’ kot?

⁴ Kinyonja anyun ng’olyotab Jehovah ne bo lugosiek kolenja,

⁵ Ng’alalji bik tugul che bo emet, ak tisiik, ilenji, Ye kigorugutge ak oririe eng’ arawetab mut ak ne bo tisab, eng’ kenyisiechoto tamanwogik tisab, ko tos kiorugutge agobo ane, anendet?

⁶ Ak ye oame, ak ye oee, ko tos moamjinige, ak oeechinige?

⁷ Tos manyoljok ogas ng’alek che kimwa Jehovah eng’ maotik che bo tai, ye kigimenyei Jerusalem, ak komi berurto, ak nganasokyik che mi komoswekyik tugul, ak ye kigimenyei Murot ne bo Tai ak soito?

Kamutet ne biitune ngelelnatet

⁸ Ak kinyonji ng’olyotab Jehovah Sekaria kolenji,

⁹ Kamwa Jehovah ne bo lugosiek ko u ni kole, Oyai kiruoget ne bo iman, ak oyachi chi age tugul eng’ okwek tupchennyi mieindo ak rirenet:

¹⁰ amous mosok, anan ne matinyei kwanda, anan ne too, anan ne banan; amat kobwat chi age tugul eng’ okwek yaitiet eng’ muguleldanyi agobo tupchennyi.

¹¹ Ago kiesio kogas it, ak kililich tigigoikwak, ak kotim itikwak, si magas.

¹² Ee, kiiuuiit mugulelwekwak koigei kibargoiyet, si magas ng’atutiet, ak ng’alek che kiga koyok Jehovah ne bo lugosiek eng’ Tamirmiriennyi eng’ eunekab maotik che bo tai: kimong’ anyun neregek che eechen kobunu Jehovah ne bo lugosiek, amu noto.

¹³ Ak ko u ye kingorirji inendet ichek, ama kogas, ko u noto tun rirtos ichek, amagase, mwaei Jehovah ne bo lugosiek;

¹⁴ ago aiyestoi ichek eng’ kipchurjuriet eng’ bororiosiek tugul che kitomo konai. Kiek anyun emet karatia eng’ let, kot ko mata kobun chi yoto anan koweegegei: amu kiigochi emet ne ki kararan koguber.