SEKARIA 6 - BUKUIT NE TILIL

Ng’ang’utiet agobo karisiek ak mbartanyisiek

¹ Kiayot met kogeny, ak ageer, ogeero, kibwa karisiek ang’wanu che bo luget kobunu kwenutab tulonok aeng’; ak ki bo sugunwet tulonochoto.

² Ki biriren mbartanyisiek che bo karit ne bo tai, ak ki tuuen mbartanyisiekab karit ne bo aeng’;

³ ak ki leelach mbartanyisiekab karit ne bo somok; ak ki busienen mbartanyisiekab karit ne bo ang’wan ak ko muruonen.

⁴ Kiawolji anyun malaikaiyat ne king’alalwa, alenji, Nee chu-o, kiptaiyandennyu?

⁵ Ak kiwol malaikaiyat kolenja, Chuto ko usonaik ang’wan che bo kipsengwet che bendi eng’ ole katonone eng’ taitab Kiptaiyat ne bo ng’ony komugul.

⁶ Wendi karit ne bo mbartanyisiek che tuuen kotokyingei emet ne bo murot ne bo katam; ak kiba che leelachen kosub choto, ak kiba che busienen kotokyigei emet ne bo murot ne bo tai.

⁷ Ak kiba mbartanyisiek che muruonen, ak komach koba kobendate ng’ony tugul: ak kimwa kole, Oba eng’ olito, obendate ng’ony tugul. Kibendat anyun eng’ ng’ony tugul.

⁸ Kiguura anyun, ak kolenja, Keero, kagogaigai tamirmiriennyu ichek che kaba kotokyigei murot ne bo katam eng’ emet ne bo murot ne bo katam.

Kilaakyin Josua tisiindet chepkuloik

⁹ Ak kinyonja ng’olyotab Jehovah kolenja,

¹⁰ Imut bik alak eng’ che kigiluul, che bo Heldai, ak che bo Tobija, ak che bo Jedaia; ak inyo eng’ betunoto, ak iwe agoi gotab Josia weritab Sepania, ole kobunu ichek koyabu Babulon.

¹¹ Ee, ibe ichek feda ak tahabu, ak iyae chepkuloik, yeityo igerjine metit Josua weritab Jeosadak, tisiindet ne o;

¹² ak imwachi inendet ilenji, Mwaei Jehovah ne bo lugosiek ko u ni kole, Keero, chito ne kiguure kainennyi Temet; eetu eng’ oldanyi, ak koteech hekalutab Jehovah:

¹³ ee, inendet ne teechei hekalutab Jehovah; ak konam torornatet, ak kotebe ng’echerennyi ne bo laitornatet, ak kobounis; ak koek tisiindet eng’ ng’echerennyi ne bo laitornatet, ak kotebe kiruogetab kalyet kwenunywa ichek tuwai.

¹⁴ Ak kobunjin chepkuloichoto Helem, Tobija, Jedaia, ak Hen weritab Sepania, koek kabwatet eng’ hekalutab Jehovah.

¹⁵ Ak kobwa ichek che mi ole loo ak koteech hekalutab Jehovah, ak onai ole kiiyokwa Jehovah ne bo lugosiek anyo ole omi. Ak isuldoi nito, ngot ogas it eng’ kagiiletab ge kutitab Jehovah Kamuktaindeng’wong’.