SEKARIA 5 - BUKUIT NE TILIL

Ng’ang’utiet agobo bukuit ne mamanat ne tirireni

¹ Kiayot met anyun kogeny, ak ageer, ak ogeero, bukuit ne mamanat ne tirireni.

² Ak kilenja, Igeere nee? Ak kiawolji alenji, Ageere bukuit ne mamanat ne tirireni; koindanyi ko kakwautik tiptem che bo eut, ak tebeesindanyi ko kakwautik taman che bo eut.

³ Kimwawa anyun kolenja, Nito ko chubisiet ne wendi koyomu emet komugul: amu age tugul ne chorsei keistoi eng’ komosi ko u ye mwaei; ak age tugul ne iyostos keistoi eng’ komosin ko u ye mwaei bukuinoto.

⁴ Ayoktoi bukuinoto, mwaei Jehovah ne bo lugosiek, ak kochut gotab chorindet, ak kochut gotab chito ne iyostos lembechek eng’ kainennyu: ak kotebe kwenutab gonnyi, ak koges goyoto koboto ketikyik ak koikyik.

Ng’ang’utiet agobo epah, ak kwondo

⁵ Kiwa anyun malaikaiyat ne king’alalwa, ak kolenja, Yot met anyun ak igeer kioto wendi.

⁶ Ak kiale, Nee noto? Ak kilenja, Nito ko epah ne wendi. Kile kogeny, Ni ko kergeindanywa eng’ emet tugul:

⁷ (ak ogeero, kiginamji barak talentait ne bo ngosielait:) ak nito ko kwondo ne tebyei ng’ony eng’ epah orit.

⁸ Ak kile, Nito ko Yaitiet; ak kiwirji inendet epah orit: yeityo konde ngosielait ne nyigis kutitab kioto.

⁹ Kiayot met anyun, ak ageer, oreero, kibwa kwonyik aeng’u ak kimi usonet kebebaikwak; kitinyei kebebaik che u kebebaikab chebokibabaa: ak kinamji barak epahinoto eng’ kwenutab ng’ony ak kipsengwet.

¹⁰ Kialenji anyun malaikaiyat ne king’alalwa, Ibei chu epah kwo ano?

¹¹ Ak kilenja, Kwo koteekyine got eng’ emetab Sinar: ak ye kagochobok, kinde yoto si kotebe oldanyi.