SEKARIA 4 - BUKUIT NE TILIL

Ng’ang’utiet agobo keldab tait ne bo tahabu, ak emitik

¹ Ak kinyo kogeny malaikaiyat ne king’alalwa, ak kong’eeta ko u chito ne king’eeti eng’ ruondanyi.

² Ak kilenja, Igeere nee? Ak kiale, Kaageer, ak keero, keldab tait ne bo tahabu tugul, kotinyei tabennyi eng’ baragunnyi, koboto taisiek tisab che bo keloto bo tait; kitinyei tait age tugul kirondoik tisab che mi baragunnyi:

³ ak kimi emitik aeng’u ye negite tainato, kimi age komostab tai ne bo tabet, komi age komostanyi ne bo katam.

⁴ Ak kiawolji malaikaiyat ne king’alalwa, alenji, Nee chu-o, kiptaiyandennyu?

⁵ Kowol anyun malaikaiyat ne king’alalwa, kolenja, Tos mengen kit ne bo tuguchu? Ak kiale, Achicha, kiptaiyandennyu, mangen.

⁶ Yeityo kowol kolenja, Ni ko ng’olyotab Jehovah ne mwachin Serubabel, kolenjin, Ma eng’ kamuktaet, ama eng’ kimnatet, ago eng’ Tamirmiriennyu, mwaei Jehovah ne bo lugosiek.

⁷ I ng’o, ee tulwoni o? Iegu warenget eng’ taitab Serubabel: ak konem koita ne bo barak kowaaktos kolen, Mieindo, mieindo, ingotebe baragunnyi.

⁸ Kinyonja kogeny ng’olyotab Jehovah kole,

⁹ Kilumei Serubabel lumeiywotab goi; ak ko eunekyik che igesu kogeny; ak inai ile Jehovah ne bo lugosiek ne kiiyokwa anyo ole omi.

¹⁰ Amu ng’o ne kigosas betutab tuguk che mengechen? Amu tun boiboitu ichek, ak kogeer kit ne kilititisie eng’ eutab Serubabel, tuguchu tisab, che konyekab Jehovah; bendoti choto eng’ ng’ony komugul.

¹¹ Kiawolu anyun alenji inendet, Nee emitichu aeng’u mi komostab tai ne bo keldab tait ak komi komostanyi ne bo katam?

¹² Ak kiawolu ne bo aeng’, alenji inendet, Bo nee temenichu aeng’u che bo emitik, che mi ole negite kirondoik aeng’ che bo tahabu, che rong’u mwanik?

¹³ Ak kiwolwa kolenja, Mengen kit ne bo chuto? Ak kiale, Achicha, kiptaiyandennyu, mangen.

¹⁴ Kolenja anyun, Chuto ko werik aeng’ che bo mwanik, che tonone ole negite Kiptaiyat ne bo ng’ony komugul.