SEKARIA 3 - BUKUIT NE TILIL

Josua, tisiindet ne o, ne kaborunetab temet

¹ Ak kiiborua inendet tisiindet ne o Josua kotonone taitab malaikaiyatab Jehovah, ak kotonone agine Setani komostab eunnyi ne bo tai koek ne kirindoi.

² Ak kilenji Jehovah Setani, Ingogeerin kong’ Jehovah, ee Setani; ee, ingogerin kong’ Jehovah ne kilewen Jerusalem: tos ma mecheita nito ne kaginemune ma?

³ Kiilaachi Josua ngoroik che muruonen, ak kitonon eng’ taitab malaikaiyandanato.

⁴ Ak kiwol inendet kolenji ichek che kitonone tainnyi, Oreegune inendet ngoroikyik che muruonen. Ak kimwachi inendet kolenji, Keero, kaistoenen tengektang’ung’, ak alaagun ngoroik che kororon.

⁵ Kiale anyun, Ingogerjine ichek inendet metinnyi chepkulet ne kararan. Kiilaakyi anyun inendet chepkulet ne kararan, ak kolaakyi ngoroik; ak kitonone malaikaiyatab Jehovah ole negite inendet.

⁶ Ak kibaorianji malaikaiyatab Jehovah Josua eng’ kimnatet, kolenji,

⁷ Mwaei Jehovah ne bo lugosiek ko u ni kole: Ngot iwendote ortinwekyuk, ak ngot irib ng’atutikyuk, iruoksechi anyun aginye gonnyu, ak irib seremusiekyuk, ak ayatun ole ibunoti eng’ kwenutab chu tonondos eng’ yuto.

⁸ Kas anyun nguno, ee Josua tisiindet ne o, inye koboto choronoguk che ibuuri eng’ taing’ung’; amu kaborunet bichoto: amu, keero, amutu otwogindennyu ne Temet.

⁹ Amu, ogeero, koita ne kiande taitab Josua; tinyei koita agenge konyek tisab: ogeero, asirjini sirutik koyato eng’ waet, mwaei Jehovah ne bo lugosiek, ak aiste tengektab emonoto betunak.

¹⁰ Mwaei Jehovah ne bo lugosiek, kole, Tun kuurei chi age tugul eng’ okwek chitab kokwennyi, eng’ betunoto, konyo kelutab ketitab sabibuk, ak ne bo mogoiywet.