SEKARIA 2 - BUKUIT NE TILIL

Ng’angutietab chito ne tinyei borowet ne kikwaise

¹ Ak kiayot met ak ageer, ogeero, chito ne tinyei eng’ eunnyi borowet ne kikwaise.

² Yeityo ateebe alenji, Iwendi ano? Ak kilenja, Awendi akwai Jerusalem, si kobiit anai ole te tebeesindanyi ak koindanyi.

³ Ak ogeero, kiwa malaikaiyandanato king’alalwa, ak kiwa malaikaiyat age kotuiyo ak inendet,

⁴ ak kolenji inendet, Labat, ng’alalji murenoni, ilenji, Kimenyei Jerusalem ko u ye kimenyei nganasok che mengechen che matinyei irimoik, amu chang’indab bik ak tuga che mi.

⁵ Amu mwaei Jehovah kole, Aegu irimet ne bo mat eng’ komoswek tugul, ak aegu torornatet eng’ kwenunnyi.

Chametab Jehovah eng’ Sion

⁶ Eiye, eiye, omwei eng’ emetab murot ne bo katam, mwaei Jehovah: amu kiaseerak ko u usonaik ang’wan che bo kipsengwet, mwaei Jehovah.

⁷ Ee Sion, soruge inye, ne omeng’isiei ak cheptab Babulon.

⁸ Amu mwaei Jehovah ne bo lugosiek kole, Kagoyokta inendet agobo torornatennyi, awa oldab bororiosiek che kiluulok, amu inendet ne twaok, ko katwa laptetab kondanyi.

⁹ Ogeero, ang’werei ichek, ak koek luulenik eng’ ichek che kiotei ichek: ak onai ole kiiyokwa Jehovah ne bo lugosiek.

¹⁰ Tien ak ibaibaitu, ee cheptab Sion: amu, keero, anyone amenye kwenung’ung’, mwaei Jehovah.

¹¹ Ak konamgei bororiosiek che chang’ ak Jehovah eng’ betunoto ak koek bikyuk: ak ameny kwenung’ung’, ak inai ile kiiyokwa Jehovah ne bo lugosiek anyo ole imi.

¹² Ak konam Jehovah Juda koek kebebertanyi eng’ emet ne tilil, ak kolewen kogeny Jerusalem.

¹³ Osisye, okwek bik tugul eng’ taitab Jehovah: amu kagong’eet eng’ meng’otennyi ne tilil.