SEKARIA 14 - BUKUIT NE TILIL

Boriet ne baregei Jerusalem ak bororiosiek

¹ Ogeero, nyonei betutab Jehovah, ye tun kipcheei baruneniguk eng’ kwenung’ung’.

² Amu tun ayumi bororiosiek tugul kobokyi Jerusalem kobargei; ak kenam nganaset, ak keluul gorik, ak kesuub kwonyik: ak kimut kebebertab nganaset koek luulenik, ama kibarei bik che kang’et eng’ nganaset.

³ Yeityo kwo Jehovah, kwo kobargei ak bororiosiechoto, ko u ye kiyaei boriet eng’ betutab luget.

⁴ Ak tun tononie kelyekyik eng’ betunoto tulwetab Emitik, ne mi taitab Jerusalem eng’ komostab kong’asis, ak kobetak kwenutab tulwetab Emitik ole tokyingei kong’asis ak cherongo, ak kobiit eng’ yoto atebwet ne o; ak kwo kebebertab tulwonoto kotokyingei murot ne bo katam, ak kwo kebeberta age kotokyigei murot ne bo tai.

⁵ Ak omwei obun atebwetab tulonokyuk; amu itei atebwetab tulonok Asel: ee, omwei, ko u ye kiomwei ye kibotani ng’ony eng’ betusiekab Usia laitoriatab Juda: ak konyo Jehovah Kamuktaindennyu, komi bik tugul che tililen koboto inendet.

⁶ Ak mailuu lapkeiyet eng’ betunoto amaimenitu:

⁷ ago betut agenge ne naat eng’ Jehovah; ma bet, ama kemoi: ago lapkeitu koskoleny.

⁸ Ak tun mong’une beek che soptos Jerusalem eng’ betunoto; bendi kebeberta age kotokyingei nyanjet ne mi kong’asis, kobendi kebeberta age kotokyingei nyanjet ne mi cherongo: bendi ko u noto eng’ kemei ak iwot.

Katerteretab Jehovah ak laitornatennyi eng’ony komugul

⁹ Ak koek Jehovah laitoriatab ng’ony komugul: egu agenge Jehovah eng’ betunoto, ak koek agenge kainennyi.

¹⁰ Kiwalei emet tugul koigei Araba, koboch Geba agoi Rimon murot ne bo tai ne bo Jerusalem; ak kieeti, ak komeny oldanyi, koboch ormarichetab Benjamin, agoi komostab ormarichet ne bo tai, agoi ormarichetab luita, koboch teekset ne koi ne bo Hananel, agoi komoswekab laitoriat ole kitue sabibuk.

¹¹ Ak komeny bik oloto, ama komi chubisiet kogeny; ago meng’isiei Jerusalem eng’ chametab ge.

¹² Ak biitu koroitab ng’ony ne bire Jehovah bik tugul che kibargei ak Jerusalem: nundos borwekwak kota kotonondos, ak konunio konyekwak eng’ kelongonikwak, ak konunio ng’elyebwekwak eng’ kutuswekwak.

¹³ Bunu Jehovah eng’ betunoto wasetab ge ne o, ne nyonei kwenunywa; ak konam age tugul eng’ ichek eutab chitab kokwennyi, ak kobargei inendet ak chitab kokwennyi.

¹⁴ Ak kobargei Juda agine ak Jerusalem; ak kiyomo magornatosiek che bo bororiosiek tugul, che mi komoswek tugul, tahabu, feda, ak ngoroik, eng’ chang’indo ne o.

¹⁵ Ak biitu ko u noto, koroito ne bo mbartanyit, ak ne bo nyumbut, ak ne bo tambesiet, ak ne bo sigiriet, ak ne bo tiong’ik tugul che mitei meng’otosiechoto, ko u koroiyoto.

¹⁶ Ak age tugul ne ng’etu eng’ bororiosiek tugul che kiibokyin Jerusalem, kotogostoi oloto eng’ kenyit age tugul, kolosu Laitoriat, Jehovah ne bo lugosiek, ak koyai igorta ne bo keriosiek.

¹⁷ Ak age tugul ne bo ortinwek tugul che bo ng’ony ne matogostoi Jerusalem kolosu Laitoriat, Jehovah ne bo lugosiek, ko manyoru choto ropta.

¹⁸ Ak ngot ko matogosta oretab gotab Misri, amabwa, ko marobonjin agichek; biitu koroito ne bire Jehovah bororiosiek che matogosta koba koyai igorta ne bo keriosiek.

¹⁹ Egu nito biretab Misri, ak biretab bororiosiek tugul che matogosta koba igorta ne bo keriosiek.

²⁰ Tun kisirjin eng’ betunoto chepchingilokab mbartanyisiek kole, TILIL ENG’ JEHOVAH; igeitu terenik che mi gotab Jehovah tabok che mi taitab kaptisisiet.

²¹ Ee, kitililjin Jehovah ne bo lugosiek teret age tugul eng’ Jerusalem ak eng’ Juda; ak kobwa ichek tugul che eng’sei, koib terenichoto ak koyoise: ama komitei kogeny eng’ betunoto chemung’araindet eng’ gotab Jehovah ne bo lugosiek.