SEKARIA 13 - BUKUIT NE TILIL

Katililet ne kitilili Jerusalem

¹ Tun kiyatyin gotab Daudi ak bik che menyei Jerusalem, kondametutab beek eng’ betunoto, amu tengekto ak muruonindo.

² Ak mwaei Jehovah ne bo lugosiek kole, Tun aistoi eng’ betunoto kainaikab kanamonik eng’ emet, ama kibwati kogeny: ak aiste kogeny maotik ak tamirmiriet ne muruon eng’ emet.

³ Ak ngot ko tun komaoten age tugul, kolenji anyun kwanda ak kamet che kisichei chichoto, Mesobe; amu imwae lembechek eng’ kainetab Jehovah: ak kotoor inendet kwanda ak kamet che kisichei inendet, ye kamaoten.

⁴ Ak tun ililandos maotik eng’ betunoto, ililani age tugul agobo ng’ang’utiennyi, ye kamaoten; ama kolaachi ngoriet ne sabul si kobiit koberber bik:

⁵ ago mwaei kole, Ma a maotiot, a kabatindet; amu kigiyaa aek otwogindet koboch ming’inatennyu.

⁶ Ak keteebe kelenji, Bo nee berutichu mi euneguk? Kowol anyun kole, Bo berutichu kaguotenet ne kigiguotena eng’ gotab choronokyuk.

Kiberei mestowotab Jehovah

⁷ Ng’eet, ee rotwetab chok, borie mestowondennyu, borie chito ne kimi tuwai, mwaei Jehovah ne bo lugosiek: bir mestowot, si koiyesta kechirek; ak atokyi eunnyu che mengechen.

⁸ Kiistoi, ak kobek eng’ betunoto eng’ emet komugul, kebeberwek aeng’, mwaei Jehovah; ago kibagakyin oloto kebeberta agenge eng’ somok.

⁹ Ak amut kebeberato bo somok kobun mat, ak atilil ichek ko u ye kitilili feda ak atiem ichek ko u ye kitiemei tahabu: kuurei ichek kainennyu, ak agas ichek: amwae ale, Icheget ko bikyuk; ak kole, Jehovah ko Kamuktaindennyu.